ދަ ޑިމޮކްރެޓްސްގެ ރިޔާސީ ޓިކެޓުގައި އިންތިޚާބުގައި ވާދަކުރާނެ ކެނޑިޑޭޓް ކަނޑައެޅުމަށް ކުރިއަށް އޮތް ދެތިން ދުވަހުގެ ތެރޭގައި ޕްރައިމަރީއަށް ހުޅުވާލާނެ ކަމަށް އެ ޕާޓީގެ ޗެއާޕާސަން އަދި މުއައްސިސް ހަސަން ލަތީފް ހާމަކުރައްވާފިއެވެ.

އެގޮތުން ރޭ ބޭއްވުނު ދަ ޑިމޮކްރެޓްސްގެ ފުރަތަމަ ކައުންސިލް ބައްދަލުވުމުގައި ހަސަން ވިދާޅުވީ އެ ޕާޓީގެ އިލެކްޝަންސް ކޮމިޓީއާއިއެކު މަސައްކަތް ކޮށް ކުރިއަށް އޮތް ދެތިން ދުވަހެއްގެ ތެރޭގައި ޕްރައިމަރީއަށް ހުޅުވާލައި އިއުލާން ކުރެވޭނެ ކަމަށެވެ.

މިއާއިއެކު ކުރިމަތިލާން ލިބޭ މުއްދަތާއި ޕްރައިމަރީގެ އިންތިޚާބު ބާއްވާނެ ދުވަސް ކަނޑައެޅުމުގެ މަސައްކަތް ވެސް އެ ޕާޓީގެ އިލެކްޝަންސް ކޮމިޓީ އިން ކުރިއަށް ގެންދާނެ ކަމަށް ހަސަން ލަތީފް ވިދާޅުވިއެވެ.

ރޭގެ ކައުންސިލްގެ ބައްދަލުވުމުގައި އެ ޕާޓީގެ މުހިންމު ކޮމިޓީތަކަށް ބޭފުޅުން ވަނީ އައްޔަންކޮށްފައެވެ. އެގޮތުން ޕާޓީގެ ޕްރައިމަރީ ކުރިއަށް ގެންދިޔުމަށް 3 މެމްބަރުންގެ އިންތިޚާބާ ބެހޭ ކޮމިޓީ އެއްވެސް ވަނީ އެކުލަވާލައިފައެވެ.

ދަ ޑިމޮކްރެޓްސްގެ ފަރާތުން ރިޔާސީ ކެނޑިޑޭޓެއް ނެރެން ނިންމާފައިވާއިރު ގިނަ ބަޔަކު އަންނަނީ ކެނޑިޑޭޓަކީ އެ ޕާޓީއަށް ދާދި ފަހުން ސޮއި ކުރެއްވި ރައްޔިތުން މަޖިލީހުގެ ރައީސް މުހައްމަދު ނަޝީދު ކަމަށް ބުނަމުންނެވެ.