މަގުމަތީގެ ސަލާމަތާ ގުޅޭ ޤާނޫނުތަކާއި ޤަވާޢިދުތައް ތަކުރާރުކޮށް މުގުރާ ފަރާތްތަކާ ދެކޮޅަށް ޤާނޫނީ ގޮތުން އެޅެން އޮތް އެންމެ ބޮޑެތި ފިޔަވަޅުތައް އެޅުމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ފުލުހުންގެ އެކި ބަހާތަކަށާއި ކަމާ ގުޅޭ މުއައްސަސާތަކަށް ރޭ އަންގަވައިފިއެވެ.

ސީޕީ ނެރުއްވި ޚާއްޞަ މެސެޖުގައި ވިދާޅުވެފައިވަނީ މަގުމަތީގެ ރައްކާތެރިކަން ޔަޤީންކުރުމުގެ ގޮތުން ޤަވާޢިދުތަކާ އެއްގޮތަށް ޢަމަލުނުކުރާ ފަރާތްތަކާ މެދު މިހާރުން ފެށިގެން ޚާއްޞަ ފިޔަވަޅުތަކެއް އެޅުމަށް ނިންމަވާފައިވާ ކަމަށެވެ.

މި އެންގެވުން ތަންފީޒުކުރާނީ ފުލުހުންގެ ތަފާތު ޑިޕާޓްމަންޓްތައް ގުޅިގެން "އެންމެ މަތީ ދަރަޖައިގައި" ކަމަށް ވެސް ސީޕީ ވިދާޅުވިއެވެ.

ގްރޭޓަރ މާލެ ސަރަޙައްދުގެ އިތުރުން އަތޮޅުތެރޭގެ ރަށްރަށުގައި ވެސް މި މަސައްކަތް ހަމަ އެއް މިންގަނޑެއްގައި ކުރިއަށް ގެންދާނެ ކަމަށް ސީޕީ ވިދާޅުވިއެވެ. އޭނާ ވަނީ މިކަމުގައި ރައްޔިތުންގެ ފުރިހަމަ އެއްބާރުލުން ދެއްވުމަށް ވެސް އެދިވަޑައިގެންފައެވެ.

"މި ފިޔަވަޅުތަކުގެ މައިގަނޑު މަޤްޞަދަކީ އެންމެހައި ރައްޔިތުންނަށް މަގުމަތީގެ އަމާންކަމާއި ރައްކާތެރިކަން ކަށަވަރުކޮށްދިނުމާއި މަދު ބައެއްގެ ޒިންމާދާރުކަން ކުޑަ އަމަލުތަކުގެ ސަބަބުން ތަކުރާރުކޮށް ހިނގަމުންދާ ނުރައްކާތެރި ހާދިސާތައް ހުއްޓުވުމަށްޓަކައި އެޅެންހުރި އެންމެ ހަރުކަށި ފިޔަވަޅުތައް އެޅުމެވެ" ސީޕީގެ މެސެޖުގައި ފާހަގަކުރައްވާފައިވެއެވެ.

ސީޕީ މިފަދަ އެންގެވުމެއް އަންގަވާފައިވާއިރު، މިފަހުން މާލެ ސަރަހައްދުގައި އެކްސިޑެންޓް ހިނގާ މިންވަރު ވަނީ ވަރަށް ބޮޑުތަނުން އިތުރުވެފައެވެ. އެފަދަ އެކްސިޑެންޓްތަކުގެ ސަބަބުން މީހުންނަށް ބޮޑެތި އަނިޔާވެ، ދެ މީހަކާއި ކުޑަކުއްޖެއް ވަނީ ނިޔާވެސްވެފައެވެ.