މަގު ކޮނުމުގެ މަސައްކަތްތަކުގެ ތެރޭގައި ކަރަންޓު ކޭބަލްތަކަށް ގެއްލުން ލިބި ޚިދުމަތް މެދުކެނޑޭ ހާދިސާތައް އިތުރުވަމުންދާތީ ގެއްލުމުގެ ޒިންމާ އުފުލަންޖެހޭ ފަރާތުގެ އަތުން ޚަރަދު ހޯދުމަށް ސްޓެލްކޯ އިން ނިންމައިފިއެވެ.
އެ ކުންފުނީގެ ކަރަންޓު ވިއުގައިގައި ހިމެނޭ ކޭބަލްތަކަށް މަގު ކޮނުމުގައި ހަރަކާތްތެރިވާ ފަރާތްތަކުގެ އިހުމާލުން ލިބޭ ގެއްލުމާ ހެދި ކަރަންޓު ކެނޑޭ ހާލަތްތައް ދުވަހެއް ދުވަހަކަށް ގިނަވެ ރައްޔިތުންނަށް ބޮޑެތި ތަކުލީފުތައް ކުރިމަތިވަމުންދާ ކަމަށް ސްޓެލްކޯ އިން ބުނެފައިވެއެވެ.
އެހެންކަމުން މިފަދަ ހާދިސާއެއް ހިނގައިފި ހާލަތެއްގައި ގެއްލުން ލިބުނު ކޭބަލް މަރާމާތުކޮށް އަލުން ޚިދުމަތް ދިނުމަށް ހިނގާ ޚަރަދު އެ އިހުމާލުވީ ފަރާތެއްގެ އަތުން ހޯދުމަށް އެ ކުންފުނިން ވަނީ ނިންމާފައެވެ.
މި ނިންމުން ނިންމީ ކަރަންޓު ކެނޑުމުގެ ސަބަބުން ޢާންމު ރައްޔިތުންނަށް ލިބޭ ދަތިތައް ކުޑަކޮށް ދެމެހެއްޓެނިވި ގޮތެއްގައި ޚިދުމަތުގެ ފެންވަރު ހިފެހެއްޓުމުގެ މަޤުޞަދުގައި ކަމަށް އެ ކުންފުނިން ބުނެފައިވެއެވެ.
ހަމައެއާ އެކު މަގު ކޮނުމުގެ މަސައްކަތް ކުރާ ހުރިހާ ފަރާތްތަކުން ވެސް ކަރަންޓު ވިއުގައަށް ގެއްލުން ނުލިބޭނެ ފަދައިން ޒިންމާދާރުކަމާ އެކު މަސައްކަތް ރާވައި ކުރިއަށް ގެންދިއުމަށް ސްޓެލްކޯ އިން ވަނީ އިލްތިމާސްކޮށްފައެވެ.
ސްޓެލްކޯއިން މިފަދައިން ނިންމާފައިވާއިރު، މިދިޔަ ހޮނިހިރު ދުވަހާއި ނިމުނު. ހަފްތާގެ ބުރާސްފަތި ދުވަހުވެސް މަގު ކޮނުމުގެތެރޭގައި ކޭބަލްއަށް ގެއްލުންވެ ހުޅުމާލެއިން ވަނީ ކަރަންޓް ކެނޑިފައެވެ.
Advertisement
This content is created and paid for by advertisers and does not involve Voice Journalists
