އެއްވެސް ކަސްޓަމަރެއްގެ ބޭންކު ކާޑުގެ މަޢުލޫމާތު ބޭނުންކޮށްގެން ނާޖާއިޒު ފައިދާއެއް ނެގޭފަދަ މަޢުލޫމާތެއް ރާއްޖެ ޓްރާންސްޕޯޓް ލިންކް (އާރްޓީއެލް) ގެ ސިސްޓަމްތަކުގައި ރައްކާކުރެވިފައި ނުހުންނާނެ ކަމަށް އެމްޓީސީސީއިން ބުނެފިއެވެ.

އެމްޓީސީސީއިން މިފަދައިން ބުނެފައިވަނީ އާރްޓީއެލް އެޕްގެ ޑިޖިޓަލް ސިސްޓަމްއާއި ބެހޭގޮތުން ފަތުރަމުންދާ ވާހަކަތަކާ ގުޅޭ ގޮތުން ނެރުން ނޫސް ބަޔާނެއްގައެވެ.

އެގޮތުން އެމްޓީސީސީިއިން ވަނީ އާރްޓީއެލް ޚިދުމަތް ފެށީނީއްސުރެ، މި ޚިދުމަތް އިތުރަށް ހަރުދަނާކޮށް ރަނގަޅުކުރުމަށްޓަކައި އެކިއެކި ފަރާތްތަކުން ލިބެމުންދާ ހިޔާލުތަކާއި މަޢުލޫމާތުތަކަށް ރިޢާޔަތްކުރަމުން އަންނަ ކަމަށް ފާހަގަކޮށްފައެވެ.

Advertisement

އަދި މިކަމުގެ ތެރެއިން އާރްޓީއެލް އެޕްގައި ސެކިޔުރިޓީ ވަލްނަރަބިލިޓީއެއް އުޅޭކަމުގެ ރިޕޯރޓް ޖުލައި މަހުގެ ކުރީކޮޅު ލިބިފައިވާ ކަމަށް އެމްޓީސީސީއިން ވަނީ ބުނެފައެވެ.

މިއާއިއެކު މި މައްސަލަ އިތުރަށް ބެލުމަށްފަހު ބޭނުންވާ ރައްކާތެރިކަމުގެ ފިޔަވަޅުތައް އަޅައި މިކަން ވާނީ ވަގުތުން ހައްލުކޮށްފައި ކަމަށް އެ ކުންފުނިން ވަނީ ބުނެފައެވެ.

އަދި ސިސްޓަމް ސެކިޔުރިޓީ އިތުރަށް ވަރުގަދަ ކުރުމުގެ މަސައްކަތްތައްވެސް ކުރަމުން އަންނަ ކަމަށް އެމްޓީސީސީއިން ވަނީ ފާހަގަކޮށްފައެވެ.

މީގެ އިތުރުން އާރްޓީއެލްގެ އެއްވެސް ކަސްޓަމަރެއްގެ ބޭންކު ކާޑުގެ މަޢުލޫމާތު ބޭނުންކޮށްގެން ނާޖާއިޒު ފައިދާއެއް ނެގޭފަދަ މަޢުލޫމާތެއް އެ ކުންފުނީގެ ސިސްޓަމްތަކުގައި ރައްކާކުރެވިފައި ނުހުންނާނެކަމުގެ ޔަޤީންކަން އެމްޓީސީސީއިން ވަނީ ދީފައެވެ.

އެގޮތުން އެމްޓީސީސީން އަޅާފައިވާ ރައްކާތެރިކަމުގެ ފިޔަވަޅުތަކުގެ ތެރެއިން ކަސްޓަމަރުންގެ ބޭންކިންގ މަޢުލޫމާތު ސެކުޔަރ ޕޭމަންޓްއެއް ހަދަން ބޭނުންވާ މިންވަރަށް އަދި މިންގަނޑަށް މެނުވީ ރައްކާ ކޮށްފައި ނުބަހައްޓާ ކަމަށް އެ ކުންފުނިން ވަނީ ބުނެފައެވެ.

އަދި އާރްޓީއެލް ސިސްޓަމްގައި ބޭންކު ކާޑު ބޭނުންކުރެވޭނީ ޕާޓްނަރިންގ ބޭންކުގެ ސެކިޔުރިޓީ ސްޓެންޑަރޑްތަކާއި އެއްގޮތަށް ކަމުގައިވެސް އެމްޓީސީސީއިން ވަނީ ފާހަގަކޮށްފައެވެ.

މިއާއިއެކު އާރްޓީއެލް ސިސްޓަމްގައި ކާޑު ޓްރާންސެކްޝަން ހެދުމަށް ބޭނުންކުރާ ޑިޖިޓަލް އާލަތްތަކަކީވެސް ބައިނަލްއަޤްވާމީ ޕޭމަންޓް ކާޑު އިންޑަސްޓްރީގެ ސްޓޭންޑަޑްއަށް ސަރޓިފައި ކޮށްފައިވާ ވަސީލަތްތަކެއްކަމުގައިވެސް އެ ކުންފުނިން ވަނީ ފާހަގަކޮށްފައެވެ.

އަދި ފައިސާ ބަލައިގަތުމަށް އެ ކުންފުނިން ބޭނުންކުރަމުން ދަނީ ބޭންކް އޮފް މޯލްޑިވްސްގެ ޕޭމަންޓް ގޭޓްވޭކަމުން، ކަސްޓަމަރުންގެ ހުރިހާ ބޭންކިން މަޢުލޫމާތެއް ހިއްސާކުރާނީ ބީއެމްއެލްގެ ސެކުޔަރ ޕްލެޓްފޯރމްއެއްގައި ކަމަށް ވެސް އެކުންފުނިން ވަނީ ފާހަގަކޮށްފައެވެ.

އެހެންކަމުން އާރްޓީއެލް އެޕް ބޭނުންކޮށްގެން ފައިސާ ދެއްކުމުގައި ކަސްޓަމަރުން ބޭނުންކުރާ އެއްވެސް ބޭންކިންގ މަޢުލޫމާތެއް އެމްޓީސީސީގެ ސިސްޓަމްގައި ރައްކާކުރެވިފައި ނުހުންނާނެ ކަމުގެ ފުރިހަމަ ޔަޤީންކަން އެމްޓީސީސީއިން ވަނީ ދީފައެވެ.

އަދި ދިވެހި ރައްޔިތުންނަށް ހަޤީގަތް އޮޅޭ ފަދަ ގޮތްގޮތަށް ފަތުރާ މިފަދަ މަޢުލޫމާތުތަކާ މެދު ސަމާލުވުމަށް އެމްޓީސީީސީއިން ވަނީ އިލްތިމާސް ކޮށްފައެވެ.