މަންމަ މަރާލާނެކަމަށާއި ކަތިލާނެ ކަމަށް ބުނެ ބިރު ދެއްކި މީހަކު 3 މަސްދުވަހާއި 25 ދުވަހަށް ޖަލަށް ލުމަށް ކްރިމިނަލް ކޯޓުން ހުކުމް ކޮށްފިއެވެ.

މި މައްސަލައިގެ ދައުވާގެ އިތުރުން މާލެއަށް ނިސްބަތްވާ އަހްމަދު ޖަޒީލްގެ މައްޗަށް 2 ދައުވާއެއް އުފުލާފައިވެއެވެ.

އެގޮތުން ގޭގައި މަސައްކަތއް ކުރާ މެއިޑަކަށް ބިރު ދެއްކުމާއި ތަޅާލައިފައިވާ ބިއްލޫރި ފުޅިއަކުން މަންމަ އަށް ބިރުދެއްކުމާއި މަންމަ މަރާލާނެކަމަށާއި ކަތިލާނެ ކަމަށް ބުނުނެ ބިރުދެއްކުމުގެ ދައުވާ ޖަޒީލްގެ މައްޗަށް ވަނީ ކޮށްފައެވެ.

Advertisement

އެހެންނަމަވެސް މީގެ ތެރެއިން ސާބިތުވެފައިވަނީ ހަމައެކަނި މަންމަ އަށް ބިރުދެއްކުމުގެ އެއް ދައުވާއެވެ.

އެގޮތުން 30 ޑިސެމްބަރު 2021 ގެ މެންދުރު އޭނާ ދިރިއުޅެމުންދާ ގޭގައި ހަޑިހުތުރު ބަހުން މުއާމަލާތްކޮށް، ގޭގައި ގެންގުޅޭ ތަކެއްޗަށް ގެއްލުންދޭތީ، އެކަން ނުކުރުމަށް އެންގުމުން މަންމަ މަރާލާނެ ކަމަށް ޖަޒީލު ވަނީ އިންޒާރު ދީފައެވެ. 

އަދި އެ ދުވަހު އެކި ވަގުތުތަކުގައި މަންމަ މަރާލާނެ ކަމަށާއި، ކަތިލާނެ ކަމަށް ބުނެ ބިރު ދައްކައިފައިވާކަމަށް ކްރިމިނަލް ކޯޓުން ވަނީ ބުނެފައިވެއެވެ.

ޖަޒީލު ދައުވާއަށް އިންކާރު ކުރިނަމަވެސް އޭނާއާއި ދެކޮޅަށް ހުށަހަޅާފައިވާ ހެކީގެ ސަބަބުން ކްރިމިނަލް ކޯޓުން ވަނީ އޭނާގެ މައްޗަށް އެކަން ސާބިތުވާ ކަމަށް ކަނޑައަޅާފައިވެއެވެ.

އަދި ބިރުދެއްކުމުގެ އަދަބުގެ ގޮތުން އޭނާއަށް ވަނީ 6 މަސްދުވަހުގެ ޖަލު ހުކުމެއް ކަނޑައަޅާފައެވެ.

އެހެންނަމަވެސް މި މައްސަލައިގެ ޝަރީއަތުގެ މައްސަލާގައި 65 ދުވަހު ބަންދުގައި ޖަޒީލް ހޭދަކޮށްފައިވާތީ އެ ދުވަސްތައް ކެނޑުމަށްފަހު އޭނާގެ މައްޗަށް ކޯޓުން ކަނޑައަޅާފައިވަނީ 3 މަހާއި 25 ދުވަހުގެ ޖަލު ހުކުމެކެވެ.