ކުރިއަށް އޮތް ރިޔާސީ އިންތިޚާބުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހާއި ވާދަކުރެއްވުމަށް، ވާދަވެރި ކެމްޕޭނަށް އެމަނިކުފާނާއި އިދިކޮޅު ކެންޑިޑޭޓުން ނިކުމެވަޑައިގަތުމަށް ރައީސް ޞާލިހު ގޮވާލައްވައިފި އެވެ.
އެމަނިކުފާނު މިފަދައިން ގޮވާލައްވާފައި ވަނީ މ އަތޮޅަށް ކުރައްވާ ދަތުރުފުޅުގައި އެ އަތޮޅުގެ ދިއްގަރަށް ވަޑައިގެން އެ ރަށުގެ ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި ވާހަކަދައްކަވަމުން ނެވެ.
ރައީސް ޞާލިހު ވިދާޅުވީ އެމަނިކުފާނު ހުންނެވީ ރިޔާސީ އިންތިޚާބުގައި ވާދަކުރައްވަން ތައްޔާރަށް ކަމަށެވެ. އަދި ރިޔާސީ އިންތިޚާބުގައި ވާދަވެރި ކެމްޕޭނެއްގެ ތެރެއިން އެމަނިކުފާނާއި ވާދަކުރެއްވުމަށް ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންނަށް އިލްތިމާސް ކުރައްވާކަމަށް ރައީސް ޞާލިހު ވިދާޅުވި އެވެ.
"އަޅުގަނޑު ވަރަށް އިހުތިރާމާ އެކު މި ދަންނަވާލަނީ ދޫކޮށްލައްވާށޭ. ރަނގަޅަށް ވާދަވެރި ކެމްޕެއިނެއް ކުރައްވާށޭ. އަޅުގަނޑުމެން މި ތިބީ ރަނގަޅަށް ވާދަކޮށް، ކުރިއަށް އޮތް ރިޔާސީ އިންތިހާބު ބޮޑު ތަނުން ކާމިޔާބު ކުރަން"
ރައީސް ޞާލިހު
ރައީސް ޞާލިހު ވިދާޅުވީ ދިވެހިރާއްޖެއަށް ޒަމާނީ ޑިމޮކްރަސީ ގެނައުމަށް މީގެ އެތައް އަހަރެއް ކުރިން ކުރެވުނު މަސައްކަތުން މިހާރު ރާއްޖެ ދެކެމުންމިދާ ކާމިޔާބީތައް ހޯދުނީ އިންތިޚާބުތަކުގައި ވާދަކޮށް ވޯޓުން ނަތީޖާ ދައްކައިގެން ކަމަށެވެ.
އެގޮތުން އެމްޑިޕީ އޮތީ ރިޔާސީ އިންތިޚާބުގައި ވާދަކުރަން ޖެހުނު ކޮންމެ ބަޔަކާއި ވެސް ވާދަކުރަން ތައްޔާރަށްކަމަށާއި، އިންތިޚާބު ކާމިޔާބު ކުރާނެކަމުގެ ފުރިހަމަ ޔަގީންކަން އޮތްކަމަށް ވެސް ރައީސް ޞާލިހު ވިދާޅުވި އެވެ.
ރައީސް ޞާލިހު އިތުރަށް ވިދާޅުވީ ސިޔާސީ ގޮތުން ގައުމު ހަލަބޮލިކޮށް، ގައުމުގެ އަމާންކަން ނަގާލުމަށް ފުރުސަތު ނުދެއްވާނެ ކަމަށެވެ. އަދި އިންތިޚާބުތަކުގައި ވާދަކުރުމުގެ ރޫހު ގެންގުޅެން ޖެހޭނެ ކަމަށެވެ.
އެގޮތުން އެމަނިކުފާނު އެދިވަޑައިގަންނަވަނީ ރިޔާސީ އިންތިޚާބުގައި އެމަނިކުފާނާއި ވާދަކުރައްވަން ނިކުމެ ވަޑައިގަތުން ކަމަށާއި، އަދި ރައްޔިތުންގެ ކިބައިން އެދިވަޑައިގަންނަވަނީ އަމާން ރާއްޖެއެއް ގާއިމްކުރުމަށް އަދި އިތުރު ދައުރެއް ދެއްވުމަށްކަމަށް ރައީސް ޞާލިހު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
