އަމާން ރާއްޖެއެއް ހޯދުމަށް ކުރައްވަމުން ގެންދަވާ މަސައްކަތްޕުޅުތަކުގެ ތެރެއިން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ވެރިކަމުގެ ދެވަނަ ދައުރެއް ލިބިވަޑައިގެންފި ނަމަ މަގުމަތީގައި މުޒާހަރާކޮށްގެން ސިޔާސީ ހަރަކާތްތައް ހިންގުން ނިމުމަކަށް ގެންނާނެކަމަށް ހޯމް މިނިސްޓަރު އިމްރާނު އަބްދުالله ވިދާޅުވެއްޖެ އެވެ.
ހޯމް މިނިސްޓަރު އިމްރާނު އަބްދުالله މިފަދައިން ވިދާޅުވެފައިވަނީ މ އަތޮޅު ދިއްގަރުގައި ބޭއްވި ރައީސް ޞާލިހުގެ ރިޔާސީ ކެމްޕޭނު ޖަލްސާއެއްގައި ވާހަކަދައްކަވަމުން ނެވެ.
ރައީސް ޞާލިހު ދިއްގަރަށް ވަޑައިގަތުމުން އެރަށުގައި ދިރިއުޅޭ ޕީޕީއެމްގެ ސަޕޯޓަރުން ވަނީ ރައީސް ޞާލިހުގެ އިސްތިއުފާއަށް ގޮވާލާ މުޒާހަރާކޮށްފަ އެވެ. އަދި ދިއްގަރުގައި ކުރިއަށް ގެންދިޔަ އެ މުޒާހަރާ ހޫނުވެ މުޒާހަރާގެ ތެރެއިން 3 މީހަކު ހައްޔަރުވެސް ކުރިއެވެ.
ދިއްގަރު ޖަލްސާގައި ވާހަކަދައްކަވަމުން އިމްރާނު ވަނީ އެކަމަށް އަލިއަޅުވާލައްވާފަ އެވެ.
އެގޮތުން އިމްރާނު ވިދާޅުވީ ރައީސް ޞާލިހުގެ ސިޔާސީ ވާދަވެރިން އަދިވެސް ތިއްބެވީ ވަރަށް ފަހަތުގައި ކަމަށެވެ. އެގޮތުން ސިޔާސީ ލީޑަރުން ރަށްރަށަށް އެރުމުން އެ ލީޑަރުންނާއި ދެކޮޅަށް މުޒާހަރާކޮށް އަޑުއުފުލުމަކީ މާޒީކަމަށާއި، މިހާރު ރައްޔިތުންގެ ޝުއޫރު ފާޅުކުރަން ޖެހޭނީ ލާ ވޯޓުންނާއި ވާ ވައުދުތަކުން ކަމަށެވެ.
އެހެންކަމުން ރައީސްގެ ދެވަނަ ދައުރެއްގައި ސިޔާސީ ހަރަކާތްތައް އެފަދައިން ހިންގުން ހުއްޓުވާނެކަމަށް އިމްރާނު ވަނީ ވިދާޅުވެފަ އެވެ.
"الله އިރާދަކުރެއްވިއްޔާ ރައީސް އިބްރާހިމް މުޙައްމަދު ޞާލިހުގެ ސަރުކާރުގައި، އަންނަން އޮތް ސަރުކާރުގައި މިކަން އިތުރަށް ސާބިތުކޮށްދީ އަމާން ރާއްޖެއަކަށް މިރާއްޖެ ހަދާނަން. އެޖާގައެއް ނުދޭނަން. މިރާއްޖޭގައި ސިޔާސީ ހަރަކާތް ހިންގާކަށް ދެނެއް ގަޔަށް ލޮލަށް ބޮލަށް އަރާ ވެލިއުކާކަށް ޖާގައެއް ނުދޭނަން"
ހޯމް މިނިސްޓަރު އިމްރާނު
އެކަންކަން ފާހަގަކުރައްވާ އިމްރާނު ވަނީ ރައީސް ޞާލިހު ރަށްރަށަށް އަރާވަޑައިގަތުމުން އެމަނިކުފާނުގެ ވާދަވެރިން ނިކުމެ މުޒާހަރާކުރުން ހުއްޓާލުމަށް ގޮވާލައްވާފަ އެވެ.
އަދި އެކަން ނުހުއްޓައިފިނަމަ ރައީސްގެ ފަހަތްޕުޅުގައި ތިއްބެވި ބޭފުޅުން މާ ވަރުގަދަކަމާއެކު މުޒާހަރާއަށް ނިކުންނާނެ ކަމަށާއި އެ ހިސާބުން ހިފަހައްޓާ ނުލެވޭނެކަމަށް އިމްރާނު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
