ދަ ޑިމޮކްރެޓްސްގެ ސިޔާސަތު 'ފަސޭހަ ވިޔަފާރި' 36 ރަށެއްގައި ލޯންޗް ކުރުމުގެ ހަރަކާތްތައް ފަށައިފިއެވެ.

މިކަމާއި ގުޅިގެން ދަ ޑިމޮކްރެޓްސް އިން ބުނެފައިވަނީ ދިވެހިރާއްޖޭގެ ހުރިހާ ކަންކޮޅެއްގައި ޑިމޮކްރެޓްސްގެ ސިޔާސަތު 'ފަސޭހަ ވިޔަފާރި' ލޯންޗުކުރުމަށް 36 ރަށެއްގައި ޕާޓީގެ ޓީމްތަކުން އެކި ހަރަކާތްތައް މިއަދާއި މާދަމާ ހިންގަމުންދާނެ ކަމަށެވެ.

އެގޮތުން މި ޓީމްތަކުގެ ތެރޭގައި މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދާއި، ޕާޓީއަށް ތާއީދު ކުރައްވާ މަޖިލިސް މެންބަރުންނާއި، އަތޮޅު ކައުންސިލް ރައީސުންނާއި، ކައުންސިލަރުން ހިމެނި ވަޑައިގަންނަވާ ކަމަށް ޑިމޮކްރެޓްސް އިން ވަނީ ބުނެފައެވެ.

މިއާއިއެކު އިސްތިއުފާ ދެއްވި މިނިސްޓަރުންނާއި ސްޓޭޓް، ޑިޕިއުޓީ މިނިސްޓަރުންނާއި، މެނޭޖިންގ ޑިރެކްޓަރުންނާއި، ޑެޕިއުޓީ މެނޭޖިންގ ޑިރެކްޓަރުންނާއި، އެގްޒެކެޓިވް ޑައިރެކްޓަރުންނާއި، ވިމެން ޑިމޮކްރެޓްސްގެ އިތުރުން ޔަންގް ޑިމޮކްރެޓްސްއާއި ވެޓެރަންސް ކްލަބް އަދި އެންމެހާ ޑިމޮކްރަޓުން އެއްވާނެެއްގައި ނިކުންނާނެ ކަމަށް ޑިމޮކްރެޓްސް އިން ވަނީ ބުނެފައެވެ.

36 ރަށުގެ ތެރޭގައި ހިމެނެނީ އަންނަނިިވި ރަށްތަކެވެ:

-ހއ އަތޮޅު: ހޯރަފުށި، ދިއްދޫ

-ހދ އަތޮޅު: ކުޅުދުއްފުށި، ވައިކަރަދޫ

-ށ އަތޮޅު: ބިލެތްފަހި، މިލަންދޫ، ކޮމަންޑޫ

-ނ އަތޮޅު: ކެނދިކުޅުދޫ، ވެލިދޫ، ކުޑަފަރި

-ރ އަތޮޅު: އުނގޫފާރު، ދުވާފަރު، މަޑުއްވަރީ

-ބ އަތޮޅު: ތުޅާދޫ

-ޅ އަތޮޅު: ނައިފަރު، ކުރެންދޫ

-ކ އަތޮޅު: މާފުށި، ގުރައިދޫ، މާލެ

-އއ އަތޮޅު: ރަސްދޫ، ތޮއްޑޫ، އުކުޅަސް، މާޅޮސް، ހިމަންދޫ

-އދ އަތޮޅު: މާމިގިލި، މަހިބަދޫ

-ވ އަތޮޅު: ކެޔޮދޫ

-ފ އަތޮޅު: ބިލެތްދޫ، މާގޫދޫ

-ދ އަތޮޅު: ކުޑަހުވަދޫ

-ތ އަތޮޅު: ގުރައިދޫ

-ލ އަތޮޅު: ގަން، އިސްދޫ

ގއ އަތޮޅު: ވިލނގިލި

ޏ އަތޮޅު: ފުވައްމުލައް، އައްޑޫ

މިއަދު ބ. ފުޅަދޫއަށް ވަޑައިގަތުމަށްފަހު ރައީސް ނަޝީދު މިހާރު ހުންނެވީ ބ އަތޮޅު ފެހެންދޫގައެވެ. އެރަށުގެ ރައްޔިތުންނާއި ބައްދަލުކުރައްވާ އެމަނިކުފާނު ވަނީ ފެހެންދޫގެ ކުނި ވަކި ކުރުމާއި ބެލެހެއްޓުމުގެ އޮޕަރޭޝަންތައް ބައްލަވާލައްވާފައެވެ.

ފެހެންދޫއަށްފަހު ބ އަތޮޅުގެ އެކި ރަށްރަށަށް ރައީސް ނަޝީދު ވަޑައިގަންނަވާނެ ކަމަށާއި ދަތުރުގެ އެންމެ ފަހު މަންޒިލަކީ ބ. ތުޅާދު ކަމަށް ޑިމޮކްރެޓްސް އިން ވަނީ ބުނެފައެވެ.

އަދި މި ރަށުގައި އޮންނަ ޑިމޮކްރެޓްސް ގެ 'ފަސޭހަ ވިޔަފާރި' ސިޔާސަތު ލޯންޗް ކުރުމުގެ މައި ހަރަކާތުގައި ރައީސް ނަޝިދު އިސްވެ އުޅުއްވާނެ ކަމަށް ވެސް އެ ޕާޓީއިން ވަނީ ބުނެފައެވެ.

ރައީސް ނަޝީދުގެ އިތުރުން މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު އިސްވެ ހުންނަވާ ހއ. ދިއްދޫއަށް ވަޑައިގެން ދޮރުން ދޮރަށް ހިނގުމުގެ ހަރަކާތްތައް ދަނީ ކުރިއަށް ގެންދަމުންނެވެ.

ދަ ޑިމޮކްރެޓްސް އަކީ ރައީސް ނަޝީދަށް ތާއިދު ކުރައްވާ ބޭފުޅުން އިސްވެ ހުންނަވައިގެން އުފައްދާފައިވާ ޕާޓީއެކެވެ. މި ޕާޓީއިން ރިޔާސީ ކެނޑިޑޭޓެއް ނެރޭނެ ކަމަށް އިއުލާނު ކޮށްފައިވާއިރު މި ހަފްތާގެ ތެރޭގައި ޕްރައިމަރީއަށް ކުރިމަތިލުމަށް ހުޅުވާލާނެ ކަމަށް އެޕާޓީއިން ވަނީ ބުނެފައެވެ.