ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ރަނިން މޭޓަށް ވުމަށް އެއްވެސް ޝައުގެއް ނެތް ކަމަށް އިކޮނޮމިކް މިނސްޓަރ އަދި އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.

ފައްޔާޒް މފަދައިން ވިދާޅުވެފައިވަނީ ރަނިން މޭޓަށް ފައްޔާޒް އާއި ފޮރިން މިނިސްޓަރ އަބްދުالله ޝާހިދުއާއި މިހާރު ނައިބު ރައީސްގެ މަޤާމްގައި ހުންނެވި ފައިސަލް ނަސީމް ވާދަކުރައްވާ ކަމަށް ދެކެވެމުން އަންނަ ވާހަކަތަކާއި ގުޅިގެންނެވެ.

މިކަމާއި ގުޅިގެން ފައްޔާޒް ކުރެއްވި ޓްވީޓުގައި ވިދާޅުވީ އޭނާގެ އެއްވެސް ޝައުގެއް (އިންޓެރެސްޓްއެއް) ރަނިން މޭޓް ކަމަށް ނެތް ކަމަށެވެ.

އެހެންނަމަވެސް ކޮންމެސް ސަބަބަކާ ހުރެ މި ވާހަކަދައްކަވަނީ އެމްޑީޕީގެ ކުރީގެ ޗެއާޕާސަން ރީކޯ މޫސާ މަނިކު ކަމަށް ފައްޔާޒް ވިދާޅުވިއެވެ.

އަދި މިއީ ވަރަށް ދެރަކަމެއް ކަމަށް ފައްޔާޒް ވަނީ ފާހަގަކުރައްވާފައެވެ.

ފައްޔާޒް މިފަދައިން ވިދާޅުވެފައިވާއިރު އިއްޔެ ރައީސް ޞާލިހުގެ ކެމްޕެއިން ދަތުރު ނިންމަވާލެއްވުމަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ރަނިންމޭޓް ކަމަށް ކަނޑައަޅާނެ ބޭފުޅަކާއި ގުޅޭގޮތުން ކޮންމެ ރެއަކުހެން އެކި ބޭފުޅުންނާއި މަޝްވަރާތައް ކުރައްވާ ކަމަށާ، އަދި އެ ބޭފުޅުން އެކި ނަންތައް ހުށަހަޅުއްވަމުން ގެންދަވާ ކަމަށެވެ.

މީގެ އިތުރުން ކޯލިޝަންގައި ހިމެނޭ ޕާޓީއެއްގެ ތެރެއިން ރަނިންމޭޓަކު ކަނޑައަޅުއްވާފާނެތޯ ނޫސްވެރިއަކު ކުރި ސުވާލަށް ޖަވާބު ދެއްވަމުން އެމަނިކުފާނު ވިދާލުވީ، އެފަދައިން ކަން ކުރުމުގެ ފުރުސަތު ވެސް އޮތް ކަމަށެވެ. އަދި ރަނިންމޭޓަކީ ކޮން ބޭފުޅެއްކަން މިހާރު އިއުލާން ނުކުރި ނަމަވެސް، އެމަނިކުފާނުގެ ކެންޑިޑެސީ ފޯމުގައި އެ ބޭފުޅެއްގެ ނަން އޮންނާނެ ކަމަށް ރައީސް ޞާލިހު ވިދާޅުވި އެވެ. 

2018 ވަނަ އަހަރު ކޯލިޝަން ސަރުކާރަކާއި އެކު އެމްޑީޕީ ވެރިކަމަށް އައި އިރު، އެ ފަހަރު ރަނިންމޭޓަކަށް ކަނޑައަޅާނެ ބޭފުޅަކު ނިންމުމުގެ ފުރުސަތު އެމަނިކުފާނު ދެއްވީ އޭރުގެ ކޯލިޝަންގައި ހިމެނޭ ދެވަނައަށް އެންމެ ބޮޑު ޕާޓީ، ޖުމްހޫރީ ޕާޓީ އަށެވެ. އެގޮތުން، ޖުމްހޫރީ ޕާޓީގެ ކައުންސިލުން ނިންމީ، މިހާރުގެ ނާއިބު ރައީސް ފައިސަލް ނަސީމަށް އެ ފުރުސަތު ދިނުމަށެވެ. ކުރިއަށް އޮތް ރިޔާސީ އިންތިހާބުގައި، ޖުމްހޫރީ ޕާޓީން ވަކިން ވާދަ ކުރި ނަމަވެސް، ފައިސަލް ނަސީމްގެ ތާއީދު މިފަހަރުވެސް އޮތީ ރައީސް ޞާލިހަށެވެ.