ކުރިއަށް އޮތް ރިޔާސީ އިންތިޚާބާއި އަދި 2024 ގެ ރައްޔިތުންގެ މަޖލީހުގެ އިންތިޚާބަށް އެކުގައި މަސައްކަތްކުރުމަށް ޖުމްހޫރީ ޕާޓީ އާއި އެމްއެންޕީން މަޝްވަރާ ކޮށްފިއެވެ. 

މި މަޝްވަރާ ބައްދަލުވުން ކުރިއަށް ގެންގޮސްފައިވަނީ ސަންއައިލެންޑް ރިސޯޓުގައެވެ. މި ބައްދަލުވުމައި އެމްއެންޕީގެ ރައީސް އަދި ދަނގެތި ދާއިރާގެ މެންބަރު މުހައްމަދު ނާޒިމް އާއި، އެ ޕާޓީގެ ނާއިބު ރައީސް ވިލިނގިލީ ދާއިރާގެ މެންބަރު އަހުމަދު އުޝާމްގެ އިތުރުން، ޕާޓީގެ ނާއިބު ރައީސް އަދި ތިމަރަފުށީ ދާއިރާގެ މެންބަރު އަބްދުالله ރިޔާޒުވެސް ވަނީ ބައިވެރިވެވަޑައިގެންފައެވެ. 

މިކަމާއި ގުޅިގެން ޖުމްހޫރީ ޕާޓީގެ ލީޑަރު ގާސިމް އިބްރާހިމް ކުރެއްވި ޓްވީޓެއްގައި ވިދާޅުވީ، ދެ ޕާޓީން އެކުގައި މަސައްކަތް ކުރުމަށް މަޝްވަރާ ފެއްޓެވީ މިއަދު ޤައުމަށް ދިމާވެފައިވާ އެކި ގޮންޖެހުންތަކުން ޤައުމު ސަލާމަތް ކުރުމަށްޓަކައި ކަމަށެވެ.

Advertisement

އަދި އެ މަޝްވަރާކުރުމަށް އެމްއެންޕީއަށް ދައުވަތު ދިނީ ޖުމްހޫރީ ޕާޓީން ކަމަށްވެސް ގާސިމް ވިދާޅުވި އެވެ. ގާސިމް ވަނީ އެ ދަޢުވަތު ޤަބޫލު ކުރައްވައި އެމްއެންޕީގެ މެންބަރުން ވަޑައިގެންނެވި ކަމަށްޓަކައި ޝުކުރު އަދާކުރައްވާފައެވެ. 

"ޝައްކެތްނެތެވެ! އެކުވެރިކަމަކީ ގަދަފަދަ ބާރެކެވެ. ވަކިވެގަތުމަކީ ނިކަމެތިކަމެކެވެ." ގާސިމްގެ ޓުވީޓުގައި ވިދާޅުވެފައި ވެއެވެ. 

ރިޔާސީ އިންތިހާބާއި މަޖިލިސް އިންތިހާބުގައި ޖޭޕީއާއި އެމްއެންޕީން އެކުގައި މަސައްކަތް ކުރަން މަޝްވަރާކޮށްފައި ވާއިރު، ފާއިތުވި މަޖިލިސް އިންތިހާބުގައި މެންބަރު ރިޔާޒާއި ނާޒިމް ވާދަކުރެއްވީ ޖޭޕީގެ ޓިކެޓުގައެވެ. ނަމަވެސް އިންތިހާބަށްފަހު ޕާޓީން ވަކިވެވަޑައިގެން ނާޒިމް ވަނީ އެމްއެންޕީ އުފައްދަވާފައެވެ.