ޖޭޕީގެ ރިޔާސީ ކެންޑިޑޭޓް އަދި މާމިގިލީ ދާއިރާގެ މެންބަރު ގާސިމް އިބްރާހިމް، އާއި އެމްއެންޕީގެ ރިޔާސީ ކެންޑިޑޭޓް އަދި ދަނގެތި ދާއިރާގެ މެންބަރު މުހައްމަދު ނާޒިމް، އާއި އެމްޑީޕީން ވަކިވި މެންބަރުން އުފެއްދެވި ޑިމޮކްރެޓްސް އާއި އަލަށް ގުޅިވަޑައިގެންނެވި މަޖިލީހުގެ ރައީސް މުހައްމަދު ނަޝީދާ ބައްދަލުވުމެއް ބޭއްވުމަށް ހަމަޖެހިއްޖެއެވެ.
ވޮއިސް އަށް މައުލޫމާތު ލިބުފައިވާ ގޮތުގައ މި ބައްދަލުވުން ކުރިއަށް ދާނީ ޖޭޕީގެ މައި ހަރުގެ، މ.ކުނޫޒު ގައެވެ. އަދި ބައްދަލުވުމަށް ނަޝީދު އަދި ނާޒިމް ކުނޫޒަށް ވަޑައިގަންނަވާނީ މެންދުރުފަހު 1:30 ގައި ކަމަށް މައުލޫމާތު ލިބޭއިރު ބައްދަލުވުމަށް ފަހު އިތުރު ތަފްސީލް ހާމަކުރާނެ ކަމަށްވެސް މައުލޫމާތު ލިބިފައިވެއެވެ.
ގާސިމް، ނާޒިމާއި، ނަޝީދާއި ބައްދަލު ކުރައްވާއިރު, އިއްޔެ ގާސިމް ވަނީ ނާޒިމާއި އެމްއެންޕީގެ އިސްބޭފުޅުންނާއި ވަކިން ސަން އައިލެންޑް ގައިވެސް ބައްދަލުކުރައްވާފައެވެ.
މިކަމާއި ގުޅިގެން ޖުމްހޫރީ ޕާޓީގެ ލީޑަރު ގާސިމް އިބްރާހިމް ކުރެއްވި ޓްވީޓެއްގައި ވިދާޅުވީ، ދެ ޕާޓީން އެކުގައި މަސައްކަތް ކުރުމަށް މަޝްވަރާ ފެއްޓެވީ މިއަދު ޤައުމަށް ދިމާވެފައިވާ އެކި ގޮންޖެހުންތަކުން ޤައުމު ސަލާމަތް ކުރުމަށްޓަކައި ކަމަށެވެ.
އަދި އެ މަޝްވަރާކުރުމަށް އެމްއެންޕީއަށް ދައުވަތު ދިނީ ޖުމްހޫރީ ޕާޓީން ކަމަށްވެސް ގާސިމް ވިދާޅުވި އެވެ. ގާސިމް ވަނީ އެ ދަޢުވަތު ޤަބޫލު ކުރައްވައި އެމްއެންޕީގެ މެންބަރުން ވަޑައިގެންނެވި ކަމަށްޓަކައި ޝުކުރު އަދާކުރައްވާފައެވެ.
"ޝައްކެތްނެތެވެ! އެކުވެރިކަމަކީ ގަދަފަދަ ބާރެކެވެ. ވަކިވެގަތުމަކީ ނިކަމެތިކަމެކެވެ." ގާސިމްގެ ޓުވީޓުގައި ވިދާޅުވެފައި ވެއެވެ.
Advertisement
This content is created and paid for by advertisers and does not involve Voice Journalists
