މިހާރު ލިސްޓުގައި ހިމެނިފައި ނެތް ރިސޯޓަކަށް ރީ-ރަޖިސްޓްރޭޝަން ފޯމު ހުށަހަޅައިފިނަމަ، އިތުރު ރިސޯޓުތަކުގައި ވޯޓުފޮށި ބެހެއްޓުމުގެ ފުރުޞަތު ދޭނެ ކަމަށް އިލެކްޝަންސް ކޮމިޝަން (އީސީ) ގެ ނައިބު ރައީސް އިސްމާއިލް ހަބީބު ވިދާޅުވެއްޖެއެވެ.
އެގޮތުން މިއަދު ހަބީބު ކުރެއްވި ޓްވީޓުގައި ވިދާޅުވެފައިވަނީ ރިސޯޓުތަކުގައި މަސައްކަތް ކުރާ ދިވެހިންނަށް، އިތުރު ފުރުޞަތެއް ދިނުމުގެ ގޮތުން، ކޮމިޝަނުުން ކަނޑައަޅާފައިވާ ސީލިންގ އާ އެއްގޮތަށް، ވޯޓުލުމުގެ ޙައްޤުލިބިގެންވާ 30 ފަރާތަކުން ރީ-ރަޖިސްޓްރޭޝަން ފޯމު ހުށަހަޅައިފިނަމަ، މިހާތަނަށް ވޯޓުފޮށްޓެއް ބެހެއްޓުމަށް ބޭނުންވެގެން އެދިފައިނެތް 23 ރިސޯޓުގައި ވޯޓުފޮށި ބެހެއްޓުމުގެ ފުރުޞަތު ދޭން ކޮމިޝަނުން މިއަދު ނިންމާފައިވާ ކަމަށެވެ.
މިއާއިއެކު މިކަމަށް ރީ-ރަޖިސްޓްރޭޝަން ފޯމު ހުށަހެޅުމުގެ ފުރުސަތު ޖުލައި 17 އިން ފެށިގެން، ޖުލައި 31 ގެ ނިޔަލަށް އޮންނާނެ ކަމަށް ހަބީބު ވަނީ ވިދާޅުވެފައެވެ.
އަދި މިވާހަކަ މިނިސްޓްރީ އޮފް ޓޫރިޒަމުގައި މިހާރު ވާނީ ދަންނަވާފައި ކަމަށް ހަބީބު ވަނީ ފާހަގަކުރައްވާފައެވެ.
މި އަހަރުގެ ރިޔާސީ އިންތިޚާބުގައި ރާއްޖެ އާއި ރާއްޖޭން ބޭރުގައި ޖުމްލަ 604 ވޯޓުފޮށި ބަހައްޓާގޮތަށް އީސީ އިން ވަނީ ނިންމާފައެވެ.
އަދި އިންތިޚާބުގައި ރަޖިސްޓްރީ ވެފައިވާ ރަށް ނޫން އެހެން ތަނެއްގައި ވޯޓް ލުމަށް ރީ-ރެޖިސްޓްރޭޝަން އަށް މިހާރު ވަނީ ހުޅުވާލައިފައެވެ.
އެގޮތުން އޮގަސްޓް 5 ގެ ހަވީރު 16:00 ގެ ނިޔަލަށް މި ފުރުސަތު ހުޅުވާލެވިފައި އޮންނާނެ ކަމަށް އީސީއިން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
