ކުރިއަށް އޮތް ރިޔާސީ އިންތިހާބުގައި، މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް ތާއިދު ކުރައްވާ މެންބަރުން އުފައްދާފައިވާ އައު ޕާޓީ، ދަ ޑިމޮކްރެޓްސް ގެ ފަރާތުން ވާދަކުރައްވާނެ ކެންޑިޑޭޓަކު ކަނޑައެޅުމަށް ބާއްވާ ޕްރައިމަރީގައި އެމަނިކުފާނު ވާދަ ނުކުރައްވާނެ ކަމަށް ވިދާޅުވެއްޖެއެވެ. 

ރިޔާސީ އިންތިހާބާއި ގުޅޭ މުހިންމު މަޝްވަރާތަކެއް ކުރެއްވުމަށް ރައީސް ނަޝީދާއި، ޖުމްހޫރީ ޕާޓީގެ ލީޑަރު ގާސިމް އިބްރާހިމް އަދި އެމްއެންޕީގެ ރައީސް މުހައްމަދު ނާޒިމް މިއަދު ވަނީ ޖުމްހޫރީ ޕާޓީގެ މައި އޮފީސް، ކުނޫޒުގައި ބައްދަލު ކުރައްވާފައެވެ. 

އެ ބައްދަލުވުމަށްފަހު ނޫސްވެރިއަކު ވަނީ، ރައީސް ނަޝީދު ދާދިފަހުން ގުޅިވަޑައިގެންނެވި ޑިމޮކްރެޓްސް ގެ ޕްރައިމަރީގައި ވާދަކުރައްވާނެ ތޯ ސުވާލު ކޮށްފައެވެ. 

Advertisement

އެ ސުވާލުގެ ޖަވާބު ދެއްވަމުން "ނޫން" ވިދާޅުވުން ފިޔަވައި އިތުރު އެއްވެސް ތަފްސީލެއް އެއްޗެއް އެމަނިކުފާނު ދެއްވާފައެއް ނުވެއެވެ. 

ރައީސް ނަޝީދު މިފަދައިން ވިދާޅުވެފައި ވާއިރު، މިއަދުގެ ބައްދަލުވުމުގައި ޕީޕީއެެމާއި، އެމްއާރްއެމް އާއި ވާހަކަ ދައްކައިގެން އެއް ކެންޑިޑޭޓަކު ނެރެން އެމަނިކުފާނާއި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމާއި މޯލްޑިވްސް ނެޝަނަލް ޕާޓީގެ ރިޔާސީ ކެންޑިޑޭޓް މުހައްމަދު ނާޒިމް ވަނީ އެބަސްވެވަޑައިގެންފައެވެ. 

"އަޅުގަނޑުމެންނަށް މިއަދު އެއްބަސްވެވިއްޖެ މި ތިން ޕާޓީން ވެސް ވާހަކަ ދައްކައިގެން އަދި ޕީޕީއެމާ އެމްއާރްއެމާއެކު ވެސް ވާހަކަ ދައްކައިގެން އެއް ކެންޑިޑޭޓަކު ނެރެން އަޅުގަނޑުމެންނަށް އެއްބަސްވެވޭ ކަމަށްވާނަމަ ކުރިއަށް ދިއުމަށް އަޅުގަނޑުމެން ތިން ޕާޓީގެ އިސް ތިން ބޭފުޅުންނަށް އެއްބަސްވެވިއްޖެ،" ގާސިމް ވިދާޅުވި އެވެ.