މިއަހަރުގެ ރިޔާސީ އިންތިޚާބުގައި ރައީސުލްޖުމްހޫރިއްޔާ އިބްރާހިމް މުޙައްމަދި ޞާލިހާއި ވާދަކުރަން އިދިކޮޅު ސިޔާސީ ޕާޓީތައް ގުޅިގެން އެއް ކެންޑިޑޭޓެއް ނެރުމަށް ކުރާ މަސައްކަތުން އެއްބަސް ވެވޭ ކެންޑިޑޭޓެއް ނުދެއްކިއްޖެ ނަމަ، އިންތިޚާބުގައި ވަކިން ވާދަކުރައްވާނެ ކަމަށް ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމް ވިދާޅުވެއްޖެ އެވެ. 

ކުރިއަށް އޮތް ރިޔާސީ އިންތިޚާބުގައި މި ސަރުކާރު ބަދަލުކުރަން ޖެހޭކަމަށް ޤަބޫލުކުރާ ގިނަ ސިޔާސީ ޕާޓީތަކުން ދަނީ އެކުގައި މަސައްކަތް ކުރާނެ ގޮތަކާއި ގުޅޭގޮތުން މަޝްވަރާތައް ކުރަން ފަށާފައެވެ. 

އެގޮތުން މިއަދު ޖުމްހޫރީ ޕާޓީގެ މައި އޮފީހުގައި ޖޭޕީގެ ލީޑަރު ޤާސިމާއި އެމްއެންޕީގެ ރައީސް ނާޒިމާއި، ކުރީގެ ރައީސް މުޙައްމަދު ނަޝީދު ވަނީ މަޝްވަރާ ބައްދަލުވުމެއް ބާއްވާފަ އެވެ. 

Advertisement

އެ ބައްދަލުވުމަށް ފަހު ނޫސްވެރިންނަށް މައުލޫމާތު ދެއްވަމުން ތިން ޕާޓީގެ ލީޑަރުން ވިދާޅުވީ ކޮމަން ކެންޑިޑޭޓެއް ނެރުމަށް ތިން ލީޑަރުންނަށް ވެސް އެއްބަސްވެވޭ ކަމަށެވެ. އަދި ކޮމަން ކެންޑިޑޭޓެއް ނެރުމާއި ގުޅޭގޮތުން ޕީޕީއެމާއި މަޝްވަރާތައް ކުރާނެ ކަމަށެވެ. 

ރިޔާސީ އިންތިޚާބަށް އެންމެންނަށް އެއްބަސްވެވޭ ކެންޑިޑޭޓެއް ނެރުމަށް ޕީޕީއެމާއެކު މަޝްވަރާކޮށް އެއްބަސްވުމަކަށް އާދެވިއްޖެ ނަމަ އެގޮތަށް އެކަން ކުރައްވާނެކަމަށް ތިން ލީޑަރުން ވެސް ވަނީ ވިދާޅުވެފަ އެވެ. 

އެކަން ފާހަގަކުރައްވާ ޖުމްހޫރީ ޕާޓީގެ ލީޑަރު ވިދާޅުވީ ކަމެއް ކާމިޔާބު ކުރުމަށް ގުޅިގެން އެކުގައި އެކަތިގަނޑެއްގެ ގޮތުގައި މަސައްކަތް ކުރުމަކީ ވަރަށް މުހިންމު ކަމެއް ކަމަށެވެ. 

އެހެން ނަމަވެސް ރައީސް ޞާލިހާއި ވާދަކުރުމަށް ގިނަ ޕާޓީތަކުން އެކުވެގެން އެއް ކެންޑިޑޭޓަކު ނެރުމާއި މެދު އެއްބަސް ނުވެވިއްޖެ ނަމަ، ރިޔާސީ އިންތިޚާބަށް ވަކިން ނިކުންނާނެކަމަށް ޤާސިމް ވަނީ ވިދާޅުވެފަ އެވެ. 

ރިޔާސީ އިންތިޚާބު ބޯމަތިވެފައި ވާއިރު، ގިނަ ސިޔާސީ ޕާޓީތަކުން ބުނަމުން ދަނީ މި ވެރިކަން ބަދަލުކުރަން ޖެހޭ ކަމަށެވެ. އަދި ސިޔާސީ ޕާޓީތަކުން ދަނީ ރިޔާސީ އިންތިޚާބުން ރައީސް ޞާލިހު ބަލިކުރުމަށް ކުރެވެން އޮތް ކަންކަމާއި ގުޅޭގޮތުން މަޝްވަރާ ކުރަމުންނެވެ. 

އެހެން ނަމަވެސް އިންތިޚާބުގައި ކޮމަން ކެންޑިޑޭޓެއް ނެރުމަކީ ޚިޔާލު ތަފާތު މައްސަލައެކެވެ.

އެގޮތުން ޕީޕީއެމުން ބުނަމުންދަނީ އެ ޕާޓީގެ ކެންޑިޑޭޓަކީ ރައީސް ޔާމިނު ކަމަށެވެ. އަދި އެ ނޫން ކެންޑިޑޭޓަކާއި ދޭތެރޭ ނުވެސް ވިސްނާކަމަށެވެ.