ދަ ޑިމޮކްރެޓްސް ގެ ރިޔާސީ ޕްރައިމަރީއަށް ހުޅުވާލުމާއިއެކު ރައްޔިތުން މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު ކުރިމަތިލުމަށް ނިންމައިފިއެވެ.
މިކަމާއި ގުޅިގެން އިލްޔާސް ކޮށްފައިވާ ޓްވީޓުގައި ވިދާޅުވެފައިވަނީ ދަ ޑިމޮކްރެޓްސްގެ ފަރާތުން ރިޔާސީ އިންތިޚާބުގައި ވާދަކުރާނެ ކެނޑިޑޭޓަކު ހޮވުމަށްޓަކައި ބާއްވާ ޕްރައިމަރީގައި ވާދަކުރުމަށް ގަސްދުކުރާ ކަމަށެވެ.
އަދި އެ ޕާޓީގެ މެންބަރުންގެ ތާއީދަށް އިލްޔާސް ވަނީ އެދިފައެވެ.
ދާދި ފަހުން ދަ ޑިމޮކްރެޓްސް ގެ 'ފަސޭހަ ވިޔަފާރި' ސިޔާސަތު ލޯންޗް ކުރުމުގައި އިލްޔާސް ވަނީ އިސްކޮށް ހަރަކާތްތެރި ވެފައެވެ. އެގޮތުން އިލްޔާސް ވަނީ ހއ. ދިއްދޫއަށް ވަޑައިގެން ދޮރުން ދޮރަށް ހިނގުމުގެ ހަރަކާތްތައް ކުރިއަސް ގެންގޮސްފައެވެ.
މިއަދު އެ ޕާޓީއިން ކުރި އިއުލާނުގައި ބުނެފައިވަނީ ޕްރައިމަރީ ބޭއްވުމަށް ހަމަޖެހިފައިވަނީ މިމަހު 28 ވާ ހުކުރު ދުވަހުގެ 14:00 އިން 18:00 އަށް ކަމަށެވެ.
މިއާއިއެކު ޕްރައިމަރީގައި ވޯޓު ދިނުމުގެ ހައްގު ލިބިގެންވަނީ ޕްރައިމަރީއަށް އިއުލާން ޝާއިއު ކުރުމާއި ހަމައަށް ޕާޓީގެ މެމްބަރަކަށް ވުމަށް އެދި ޕާޓީއަށް ފޯމު ހުށަހަޅާފައިވާ މެމްބަރުން ކަމަށް އެ ޕާޓީއިން ވަނީ ފާހަގަކުރައްވާފައެވެ.
ރައްޔިތުން މަޖިލީހުގެ ރައީސް މުހައްމަދު ނަޝީދަށް ތާއީދު ކުރައްވާ ބޭފުޅުންތަކެއް އިސްވެ އުފެއްދި މި ޕާޓީއަށް ވަނީ ދާދި ފަހުން އެމަނިކުފާނު ސޮއި ކުރައްވާފައެވެ.
މިކަމާއި ގުޅިގެން ޕްރައިމަރީގައި ރައީސް ނަޝީދު ވާދަކުރައްވާނެކަމަށް ގިނަ ބަޔަކު ބުނަމުން އައިނަމަވެސް އެމަނިކުފާނު ވަނީ ޕްރައިމަރީއަށް ކުރިމަތި ނުލައްވާނެ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
