ދަ ޑިމޮކްރެޓްސްގެ ރިޔާސީ ކެނޑީޑޭޓް ކަނޑައެޅުމަށް ޕްރައިމަރީއަށް ހުޅުވާލަން އެޕާޓީއިން އިއުލާން ކޮށްފިއެވެ.

އެގޮތުން މިއަދު އެ ޕާޓީއިން ކުރި އިއުލާނުގައި ބުނެފައިވަނީ ޕްރައިމަރީ ބޭއްވުމަށް ހަމަޖެހިފައިވަނީ މިމަހު 28 ވާ ހުކުރު ދުވަހުގެ 14:00 އިން 18:00 އަށް ކަމަށެވެ.

އެހެންކަމުން މި ޕްރައިމަރީގައި ވާދަކުރަން ބޭނުންވާ ފަރާތްތައް އިންތިޚާބުގައި ވާދަކުރުމަށް އެދި، ލިޔެކިޔުންތަކާއިއެކު ހ. މައިޒާންދޮށުގެ، 10 ވަނަ ފަންގިފިލާއަށް ނުވަތަ އިންތިޚާބާއި ބެހޭ ކޮމިޓީގެ އީމެއިލް [email protected] އަށް 22 ޖުލައި ވާ ހޮނިހިރު ދުވަހުގެ 16:00 ގެ ކުރިން ހުށަހެޅުމަށް އެޕާޓީއިން ވަނީ އިއުލާން ކޮށްފައެވެ.

މިއާއިއެކު ޕްރައިމަރީގައި ވޯޓު ދިނުމުގެ ހައްގު ލިބިގެންވަނީ ޕްރައިމަރީއަށް އިއުލާން ޝާއިއު ކުރުމާއި ހަމައަށް ޕާޓީގެ މެމްބަރަކަށް ވުމަށް އެދި ޕާޓީއަށް ފޯމު ހުށަހަޅާފައިވާ މެމްބަރުން ކަމަށް އެ ޕާޓީއިން ވަނީ ފާހަގަކުރައްވާފައެވެ.

ރައްޔިތުން މަޖިލީހުގެ ރައީސް މުހައްމަދު ނަޝީދަށް ތާއީދު ކުރައްވާ ބޭފުޅުންތަކެއް އިސްވެ އުފެއްދި މި ޕާޓީއަށް ވަނީ ދާދި ފަހުން އެމަނިކުފާނު ސޮއި ކުރައްވާފައެވެ.

މިކަމާއި ގުޅިގެން ޕްރައިމަރީގައި ރައީސް ނަޝީދު ވާދަކުރައްވާނެކަމަށް ގިނަ ބަޔަކު ބުނަމުން އައިނަމަވެސް އެމަނިކުފާނު ވަނީ ޕްރައިމަރީއަށް ކުރިމަތި ނުލައްވާނެ ކަމަށް ވިދާޅުވެފައެވެ.