މި އަހަރުގެ ރިޔާސީ އިންތިޚާބާއި ގުޅޭގޮތުން ހުށަހެޅޭ ޝަކުވާތައް ބަލައިގަތުމަށްޓަކައި "ޤައުމީ ކޮމްޕްލެއިންޓްސް ބިއުރޯ" އެއް އިލެކްޝަންސް ކޮމިޝަން (އީސީއިން) ގާއިމުކޮށްފިއެވެ.

މިކަމާއި ގުޅިގެން އީސީއިން ކޮށްފައިވާ އިއުލާނުގައި ބުނެފައިވަނީ މި ބިއުރޯ ޤާއިމުކޮށްފައިވަނީ އިންތިޚާބާ ބެހޭ މަރުކަޒު (ދަރުބާރުގޭގައި) ކަމަށެވެ.

އެގޮތުން ޝަކުވާ ހުށަހަޅާ ފޯމު ލިބެން ހުންނާނީ އިލެކްޝަންސް ކޮމިޝަނުގެ ވެބްސައިޓުންނާއި، އިންތިޚާބާ ބެހޭ މަރުކަޒުންނާއި، އިލެކްޝަންސް ކޮމިޝަނުގެ އިދާރާގެ ކައުންޓަރުންނާއި، ރަށްރަށުގެ ރަށު ކައުންސިލް އިދާރާތަކުން ކަމަށް އީސީއިން ވަނީ ބުނެފައެވެ.

Advertisement

މިއާއިއެކު އަތޮޅު ނުވަތަ ސިޓީ ތަކުގައި ޤާއިމް ކުރެވިފައިވާ އިލެކްޝަންސް ފޯކަލް ޕޮއިންޓް ތަކުންނާއި ރާއްޖެއިން ބޭރުގައި ގާއިމްކުރެވިފައިވާ ފޯކަލް ޕޮއިންޓުތަކުންވެސް ޝަކުވާ ހުށަހަޅާ ފޯމު ލިބެން ހުންނާނެ ކަމަށް އީސީއިން ވަނީ ބުނެފައެވެ.

ބިއުރޯ ހުޅުވިފައި ހުންނާނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 8:00 އިން މެންދުރުފަހު 15:00 އަށް ކަމަށާއި ހުކުރު ދުވަހު ހުޅުވާފައި ހުންނާނީ މެންދުރުފަހު 14:00 އިން ހަވީރު 17:00 އަށް ކަމަށް އީސީއިން ވަނީ ފާހަގަކޮށްފައެވެ.

މީގެ އިތުރުން މިކަމާއި ގުޅިގެން އީސީގެ ނައިބު ރައީސް އިސްމާއިލް ހަބީބު ކުރައްވާފައިވާ ޓްވީޓެއްގައި ވަނީ ބިއުރޯ އުފައްދާފައިވީ ނަމަވެސް އިންތިޚާބާ ގުޅުންހުރި ކޮރަޕްޝަންގެ މައްސަލަތައް ހުށަހަޅަންޖެހޭނީ، އެންޓި-ކޮރަޕްޝަން ކޮމިޝަނަށް ކަމަށް ފާހަގަކުރައްވާފައެވެ.

އަދި ބްރޯޑްކާސްޓް ކުރުމާބެހޭ މައްސަލަތައް ހުށަހަޅަންޖެހޭނީ، ބްރޯޑްކާސްޓިންގ ކޮމިޝަނަށް ކަމަށް ވެސް ހަބީބު ވަނީ ފާހަގަކުރައްވާފައެވެ.

ޤައުމީ ކޮމްޕްލެއިންޓްސް ބިއުރޯއަށް ގުޅޭނެ ނަންބަރުތަކަކީ 3004498 އަދި 3004450 އެވެ.

އަދި ބިއުރޯގެ އީމެއިލް އެޑްރެހަކީ [email protected] އެވެ.