‏ދިވެހި ރާއްޖޭގެ އުއްްތަމަ ފަނޑިޔާރާއި ސްޕްރީމްކޯޓްގެ ފަނޑިޔާރުންގެ ޒިންމާ އަދާކުރަންޖެހޭ ވަގުތު ޖެހިފައިވާ ކަމަށް މަހިބަދޫ ދާއިރާގެ މެންބަރު އަހުމަދު ޠާރިގު (ޓޮމް) ވިދާޅުވެއްޖެއެވެ. 

ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް ގެ އިންތިޚާބީ ހައްގުތައް ކަށަވަރުކޮށްދިނުމަށް އެދި އިދިކޮޅު ޕީޕީއެމުން މައްސަލަ ސްޕްރީމް ކޯޓަށް ހުށަހެޅުމާއި ގުޅިގެން ޓޮމް ކުރެއްވި ޓްވީޓެއްގައި ވިދާޅުވީ، ރައީސް ޔާމީންގެ ކެންޑިޑެސީއަށް ހުރަހަކީ ހައިކޯޓްގެ ދެ ފަނޑިޔާރުންގެ ޗުއްޓީ ކަމަށެވެ.

އަދި ދިވެހިރާއްޖޭގެ ފަނޑިޔާރުގެއަކީ ސަމާސާ ތަނަކަށް ހަދާތަން ހާމައަށް ފެންނަން އޮތް ކަމަށްވެސް އޭނާ ވިދާޅުވި އެވެ. އެހެންކަމުން އުއްްތަމަފަނޑިޔާރު އަދި ސްޕްރީމްކޯޓްގެ ފަނޑިޔާރުންގެ ޒިންމާ އަދާކުރަންޖެހޭ ވަގުތު މިހާރު ޖެހިފައިވާ ކަމަށްވެސް އޭނާ ވިދާޅުވި އެވެ. 

Advertisement

ރައީސް ޔާމީނުގެ ދިފާއީ ވަކީލު އާދަމް ޝަމީމު އިއްޔެ ކުރެއްވި ޓުވީޓެއްގައި ވަނީ ވ. އާރަށު މައްސަލާގައި ރާއްޖޭގެ އެންމެ ބޮޑު އިދިކޮޅު ސިޔާސީ ޕާޓީކަމަށްވާ ޕީޕީއެމްގެ ރިޔާސީ ކެނޑިޑޭޓުކަމަށްވާ ރައީސް ޔާމީނުގެ މައްޗަށް 11 އަހަރުގެ ހުކުމެއް އިއްވައި އެ ހުކުމުގެ އިސްތިއުނާފު މައްސަލަ ލަސްވަމުންދާތީ އެމަނިކުފާނުގެ ފަރާތްޕުޅުން މައްސަލައެއް ސުޕްރީމް ކޯޓަށް ހުށަހަޅާފައިވާ ކަމަށެވެ.

"ރައީސް ޔާމީންގެ ފަރާތުން ދިވެހިރާއްޖޭގެ ހައިކޯޓަށް ހުށަހަޅާފައިވާ އިސްތިޢުނާފީ މައްސަލަތައް ނުނިމި ދިގުލައިގެންދިއުމުގެ ސަބަބުން ރައީސް ޔާމީންގެ އެތަކެއް އަސާސީ ޙައްޤުތަކާއި އިންތިޚާބީ ޙައްޤުތަކަކަށް ހުރަސް އެޅިފައިވާތީ، އެ ޙައްޤުތައް ކަށަވަރުކޮށްދިނުމަށްޓަކައި ރައީސް ޔާމީންގެ ފަރާތުން ދިވެހިރާއްޖޭގެ ސުޕްރީމް ކޯޓަށް ދާދި ދެންމެއަކު ދުސްތޫރީ މައްސަލައެއް ހުށަހަޅައިފިން،" ޝަމީމު ކުރެއްވި ޓުވީޓެއްގައި ވިދާޅުވިއެވެ.