ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ނިސްބަތްވާ މައްސަލަތައް އޭސީސީއިން އަވަސްކޮށް ނިންމާ އެމަނިކުފާނަށް ހައްގު އަދަބު ދޭންޖެހޭނެ ކަމަށް މި ސަރުކަާރުގެ ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވިދާޅުވެއްޖެއެވެ.

އިދިކޮޅު ކޯލިޝަންގެ ހަރަކާތްތަކުގައި މިހާރު ބައިވެރިވަމުން އަންނަ މަލީހު މިއަދު މިދައިން ވިދާޅުވެ ޓްވީޓު ކުރައްވާފައިވަނީ އެ ކޯލިޝަނުން އޭސީސީއަށް ރައީސް ޞާލިހަށް ނިސްބަތްވާ ކޮރަޕްޝަންގެ 34 މައްސަލައެއް އިއްޔެ ހުށަހެޅުމާއި ގުޅިގެންނެވެ.

މަލީހު ވަނީ ރައީސް ޞާލިހު ދެވަނަ ދައުރެއްގެ ވާހަކަ ދައްކަވާ ސަބަބު މިކަމުގެ ސަބަބުން ސާފުވާ ކަމަށް ފާހަގަކުރައްވާފައެވެ.

Advertisement

އަދި މިއީ ޤައުމާއި ރައްޔިތުންނަށް ވެވޭ ވަރަށް ބޮޑު ބޭއިންސާފެއް ކަމަށް މަލީހު ވިދާޅުވިއެވެ.

އެހެންކަމުން މިމައްސަލަތައް އަވަސްކޮށް ނިންމާ ރައީސް ޞާލިހަށް ހައްޤު އަދަބު ނުދީފި ނަމަ އިއާދަ ނުކުރެވޭ ވަރު ގެއްލުން ޤައުމަށް ވާނެ ކަމަށް މަލީހު ވިދާޅުވިއެވެ.

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ނިސްބަތްވާ ކޮރަޕްޝަންގެ 34 މައްސަލައެއް އިދިކޮޅު ކޯލިޝަނުން އޭސީސީއަށް ހުށަހަޅާފައިވަނީ އިއްޔެގެ ވަގުތެއްގައެވެ.

އެގޮތުން އެ ކޯލިޝަންގެ ޤާނޫނީ ވަކީލުންގެ ޓީމުން އިއްޔެ ބޭއްވި ނޫސްވެރިންގެ ބައްދަލުވުމުގައި ބުނެފައިވަނީ 2018 އިން ފެށިގެން މިހާތަނަށް ސަރުކާރުގެ ތެރެއިން ހިންގާފައިވާ ކޮރަޕްޝަންތަކާއި ގުޅޭ މައްލަތައް އެ ޓީމުން ހޯދާފައިވައިވާނެ ކަމަށެވެ. އަދި އެ މައްސަލަތައް އޭސީސީއަށް ވެސް ހުށައަޅާފައިވާނެ ކަމަށެވެ. 

އޭގެ ތެރޭގައި މިނިސްޓްރީ އޮފް ފިނޭންސްއަށް ނިސްބަތްވާ 10 މައްސަލައަކާއި، ސަރުކާރު ހިންގާ މައި ޕާޓީ އެމްޑީޕީއަށް ނިސްބަތްވާ 6 މައްސަލައިގެ އިތުރުން ހެލްތު މިނިސްޓްރީގެ 4 މައްސަލައަކާއި، ސަރުކާރު ފެން ކުންފުނި، ފެނަކަ ކޯރަޕޭޝަނުގެ ކޮރަޕްޝަންގެ 4 މައްސަލައަކާއި، އެސްޓޯއޭގެ 3 މައްސަލައަކާއި، ޕްލޭނިން މިނިސްޓްރީގެ 3 މައްސަލައަކާއި އަދި ރައީސް އޮފީހުގެ 2 މައްސަލައާއި، އާރުޑީސީގެ 2 މައްސަލައެއް އިދިކޮޅުން ވަނީ އޭސީސީއަށް ހުށައަޅާފަ އެވެ. 

އިދިކޮޅު ކޯލިޝަނުން ހާމަކޮށްފައިވާ ތަފާސް ހިސާބުތަކަށް ބަލާއިރު، ސްޓެލްކޯއާއި، މޯލްޑިވްސް ގޭސް އާއި، ޖޭއެސްސީއާއި، ޕަބްލިކް ސާވިސް މީޑިއާ، އެންވަޔަރުމަންޓު މިނިސްޓްރީ، ކުޅުދުއްފުށީ ސިޓީ ކައުންސިލް އިދާރާ، މޯލްޑިވްސް ކަސްޓަމްސް ސާވިސް، ޕީޖީ އޮފީސް، އޭސީސީ، ރައްޔިތުންގެ މަޖިލީހުގެ މެމްބަރު މުޙައްމަދު ރަޝީދު، ރައްޔިތުންގެ މަޖިލީހުގެ މެމްބަރު އަބްދުﷲ ޖާބިރު، އެސް.އެމް.އީ ޑިވެލޮޕްމަންޓު ފަންޑު، ފޮރިން މިނިސްޓްރީގެ އިތުރުން ވެމްކޯ އާއި މޯލްޑިވްސް ޕޯޓްސްއަށް ނިސްބަތްވާ ކޮރަޕްޝަންގެ މައްސަލަތައް ވެސް ވަނީ އޭސީސީއަށް ހުށައަޅާފަ އެވެ.