ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް ގެ ގާނޫނީ ޓީމުން އެމަނިކުފާނާ ބައްދަލު ކުރެއްވުމަށް މާފުއްޓަށް ވަޑައިގެންނެވުމުން ކަރެކްޝަންސްގެ އޮފިސަރުން މަސައްކަތް ކުރެއްވީ ވަކީލުންގެ ފައިލް ހުއްދަ ނެތި ބައްލަވަން ކަމަށް އެމަނިކުފާނުގެ ވަކީލުންގެ ޓީމުން ބުނެފިއެވެ. 

ރައީސް ޔާމީންގެ ގާނޫނީ ވަކީލުންގެ ޓީމު، އެމަނިކުފާނާއި ބައްދަލު ކުރައްވަން ހުއްދަ ދިނުމަށްފަހު، ބައްދަލު ކުރައްވަން މާފުށްޓަށް ވަޑައިގެންނެވުމުން، އެ ފުރުސަތު ދެއްވާފައި ނުވާ ކަމަށް ޕީޕީއެމުން ވަނީ މިއަދު ބުނެފައެވެ. 

އެކަމާއި ގުޅިގެން ކަރެކްޝަންސް އިން ބުނީ، ބައްދަލުވުން ކެންސަލްކުރެވިފައިވަނީ ރައީސް ޔާމީން ޢަބްދުލް ގައްޔޫމްގެ ވަކީލުން ބައްދަލުވުމަށް ގެނައި ތަކެތި އާންމު އުސޫލުން ބަލާ ފާސްކުރުމަށް އެދުމުން އެކަމަށް ދެކޮޅު ހާދާފައި ވާތީ ކަމަށެވެ.

Advertisement

އެ މައްސަލާގައި ރައީސް ޔާމީންގެ ވަކީލުންގެ ޓީމުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ޔާމީނުގެ ޤާނޫނީ ވަކީލުންގެ ޓީމުގެ އިސްވަކީލު ޑރ.މުޙައްމަދު ޖަމީލު އަޙްމަދު ވިދާޅުވީ، މިއަދު މާފުށި ޖަލަށް ވަކީލުން ދިއުމުން އާއްމު އުސޫލެއްގެ ދަށުން ގެންދިޔަ ލިޔެކިޔުންތަކާއި މަޝްވަރާކުރުމަށް ގެންދިޔަ ލެޕްޓޮޕްތައް ޗެކްކުރުމަށް ޖަލުގެ ފަރާތުން މީހަކު އައި ކަމަށެވެ. އަދި އެތަކެތި ޗެކްކުރުމުގެ މަސައްކަތް ކުރުމުން ދަނިކޮށް ކުއްލިޔަކަށް އޮފިސަރަކު ވަޑައިގެން އެއްވެސް އެހުމަކާވެސް ނުލާ އައި ގޮތަށް އައިސް ވަކީލުން ގެންދެވި ފައިލް ނަންގަވާ ބަލަން ފެށިކަމަށް ޑރ. ޖަމީލް ވިދާޅުވިއެވެ.

އެއާއިއެކު ވަކީލާއި މުވައްކިލާއި ދެމެދުގައި ވާ ކަންކަމަކީ ގާނޫނުގައި ރައްކާތެރިކުރެވިގެންވާ ހައްގަކަށްވާތީ އެކަން އެފަދައިން ނުކުރައްވުމަށް އެދިވަޑައިގެންނެވި ކަމަށް ޖަމީލް ވިދާޅުވި އެވެ. އެހެން ދެންނެވުމުން އެވާހަކަ "މަތީ ފަރާތާއި" ހިއްސާ ކުރައްވަން އޮފިސަރުން ވަޑައިގެންނެވި ކަމަށާ، އެގޮތުން ވަޑައިގެންނެވުމަށްފަހު އައިސް ދެންނެވީ ފައިލް ބަލާ ޗެކްކުރުމަށް މަތިން އަންގާކަމަށް ކަމުގައި ކަމަށެވެ. 

ޖަމީލް ވިދާޅުވީ، ކަރެކްޝަންސްގެ އޮފިސަރުން ބަލަން މަސައްކަތް ކުރެއްވި ފައިލްގައި ރައީސް ޔާމީންގެ ކެންޑިޑެސީ އާއި ގުޅޭ އެއްވެސް ލިޔުމެއް ނޯންނާނެ ކަމަށެވެ. އަދި ޖަމީލް ވިދާޅުވީ ވަކީލާއި މުވައްކިލާއި ދެމެދުގައި ދެކެވޭ ވާހަކަތަކާއި ބައްދަލު ކުރެވޭ މައުލޫމާތު ތަކަކީ ގާނޫނީ ގޮތުން ރައްކާކުރެވިފައިވާ ވާހަކަތަކެއް ކަން ޖަމީލް ވަނީ ތަކުރާރުކޮށް ވިދާޅުވެފަ އެވެ.