ވަކީލުންނާ ބައްދަލުކުރުމަކީ ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެނޑިޑޭޓް އަބްދުالله ޔާމީން އަބްދުލްޤައްޔޫމް އަށް ޤާނޫނު އަސާސީއިން ކަށަވަރުކޮށްދޭ ޙައްޤެއް ކަމަށް ޕީޕީއެމްގެ ނައިބު ރައީސް އަދި ރައްޔިތުން މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.

ޝިޔާމް މިފަދައިން ވިދާޅުވެފައިވަނީ ރައީސް ޔާމީނުގެ ޤާނޫނީ ވަކީލުންގެ ޓީމުން އެމަނިކުފާނާ ބައްދަލުކުރައްވަން މިއަދު ވަޑައިގަތުމުން އެ ފުރުސަތު ވަކީލުންނަށް ދީފައިނުވުމުން، ކުރެއްވި ޓްވީޓެއްގައެވެ.

އެގޮތުން ޝިޔާމް ވަނީ ރައީސް ޔާމީން ޖަލުގައި ހުންނަވާއިރުވެސް ޗެލެންޖަކީ އެމަނިކުފާނު ކަމަށް ރައީސް ޞާލިހު ވިދާޅުވެފައިވާކަން ފާހަގަކުރައްވާފައެވެ.

Advertisement

އެހެންކަމުން މިކަމާއި މެދު ހައިރާން ނުވާ ކަމަށާއި ރައީސް ޔާމީން އަދި މިނިވަންކޮށް ހުންނެވިނަމަ މި ސަރުކާރުން "ހާދަ ވަރެއް އަރުވާލާނެ" ކަމަށް ޝިޔާމް ވިދާޅުވިއެވެ.

މިއާއިއެކު ވަކީލުންނާ ބައްދަލުކުރުމަކީ ރައީސް ޔާމީނަށް ޤާނޫނު އަސާސީއިން ކަށަވަރުކޮށްދޭ ޙައްޤެއް ކަމަށް ޝިޔާމް ފާހަގަކުރެއްވިއެވެ.

"މި ޖައްބާރު ވަގު ވެރިކަން މިނިމެނީ." ޝިޔާމް އިތުރަށް ވިދާޅުވިއެވެ.

ޕީޕީއެމް އިން މިއަދު ކުރި ޓުވީޓެއްގައި ބުނެފައިވަނީ، ރައީސް ޔާމީންގެ ގާނޫނީ ވަކީލުންގެ ޓީމު، އެމަނިކުފާނާއި ބައްދަލު ކުރައްވަން ހުއްދަ ދިނުމަށްފަހު، ބައްދަލު ކުރައްވަން މާފުށްޓަށް ވަޑައިގެންނެވުމުން، އެ ފުރުސަތު ދެއްވާފައި ނުވާ ކަމަށެވެ. އަދި އެގޮތަށް ކަން ކުރީ ހޯމް މިނިސްޓަރު ޢިމްރާން އަބްދުاللهގެ އެންގެވުމަށް ކަމަށްވެސް އެ ޕާޓީން ތުހުމަތު ކުރެއެވެ.

މިކަމާއި ގުޅުވައި ރައީސް ޔާމީނުގެ ޤާނޫނީ ވަކީލުންގެ ޓީމުގެ އިސްވަކީލު ޑރ. މުޙައްމަދު ޖަމީލު އަޙްމަދު ކުރެއްވި ޓުވީޓެއްގައި ވިދާޅުވީ އެމަނިކުފާނުގެ ވަކީލުންނާ އެމަނިކުފާނާ މިއަދު ބައްދަލުނުވި ކަމަށެވެ.

"‏ވަކީލުންގެ ބައްދަލުވުން ނުލިބުނު. ނޫނޭ ވާ ވަރަކަށް ބިރު ގަނެއްޖެ. ފައިލްތައް ބަލާ ހާވަން ޖަލު އޮފިސަރުންނަށް އޮތީ އަންގާފަ. ދުސްތޫރީ މައްސަލާގެ ލިއެކުންތައް ބަލަން ފޯރިނަގާފަ ތިބީ." ޑރ.ޖަމީލު ވިދާޅުވިއެވެ.

ރައީސް ޔާމީނުގެ ފަރާތްޕުޅުން އެމަނިކުފާނުގެ އިންތިޚާބީ ޙައްޤުތައް ކަށަވަރުކުރުމަށް ދުސްތޫރީ މައްސަލައެއް އިއްޔެ ދިވެހިރާއްޖޭގެ ސުޕްރީމް ކޯޓަށްވަނީ ހުށަހަޅާފައެވެ. އެ މައްސަލަ ހުށަހަޅާފައިވަނީ އެމަނިކުފާނު ހައިކޯޓަށް ފެބްރުއަރީ މަހު ހުށަހެޅުއްވި އިސްތިއުނާފީ މައްސަލަ ލަސްކުރާތީއެވެ. އެހެންނަމަވެސް ސުޕްރީމް ކޯޓުން އެ މައްސަލަ ވަނީ ބޭރުކޮށްލާފައެވެ.