ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް ގެ ގާނޫނީ ޓީމުން އެމަނިކުފާނާ ބައްދަލު ކުރެއްވުމަށް މާފުއްޓަށް ވަޑައިގެންނެވުމުން ކަން ހިނގައިދިޔަ ގޮތުން، ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު އިސްތިއުފާ ދެއްވަންޖެހޭ ކަމަށް ރައީސް ޔާމީނުގެ ޤާނޫނީ ވަކީލުންގެ ޓީމުގެ އިސްވަކީލު ޑރ.މުޙައްމަދު ޖަމީލު އަޙްމަދު ވިދާޅުވެއްޖެއެވެ.
ރައީސް ޔާމީންގެ ގާނޫނީ ވަކީލުންގެ ޓީމު، އެމަނިކުފާނާއި ބައްދަލު ކުރައްވަން ހުއްދަ ދިނުމަށްފަހު، ބައްދަލު ކުރައްވަން މާފުށްޓަށް ވަޑައިގެންނެވުމުން، އެ ފުރުސަތު ދެއްވާފައި ނުވާ ކަމަށް ޕީޕީއެމުން ވަނީ މިއަދު ބުނެފައެވެ.
އެ މައްސަލާގައި ރައީސް ޔާމީންގެ ވަކީލުންގެ ޓީމުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ.މުޙައްމަދު ޖަމީލު އަޙްމަދު ވިދާޅުވީ، މާފުށި ޖަލަށް ވަކީލުން ދިއުމުން އާއްމު އުސޫލެއްގެ ދަށުން ޗެކު ކުރާ ތަކެތި ޗެކު ކުރަމުން ދަނިކޮށް ކުއްލިޔަކަށް އޮފިސަރަކު ވަޑައިގެން އެއްވެސް އެހުމަކާވެސް ނުލާ އައި ގޮތަށް އައިސް ވަކީލުން ގެންދެވި ފައިލް ނަންގަވާ ބަލަން ފެށިކަމަށެވެ.
އެއާއިއެކު ވަކީލާއި މުވައްކިލާއި ދެމެދުގައި ވާ ކަންކަމަކީ ގާނޫނުގައި ރައްކާތެރިކުރެވިގެންވާ ހައްގަކަށްވާތީ އެކަން އެފަދައިން ނުކުރައްވުމަށް އެދިވަޑައިގެންނެވި ކަމަށް ޖަމީލް ވިދާޅުވި އެވެ. އެހެން ދެންނެވުމުން އެވާހަކަ "މަތީ ފަރާތާއި" ހިއްސާ ކުރައްވަން އޮފިސަރުން ވަޑައިގެންނެވި ކަމަށާ، އެގޮތުން ވަޑައިގެންނެވުމަށްފަހު އައިސް ދެންނެވީ ފައިލް ބަލާ ޗެކްކުރުމަށް މަތިން އަންގާކަމަށް ކަމުގައި ކަމަށެވެ.
"އަނެއްކާވެސް މައްޗަށް ވާހަކަ ދައްކަވަން ވަޑައިގެން އެނބުރި ވަޑައިގެން މި ވިދާޅުވަނީ. ތިމަންނަމެންނަށް އެބަ އަންގައޭ ލިޔެކިޔުންތައް ބަލަން ނުވަތަ ފައިލް ބަހައްޓާފައި ވަޑައިގަންނަވަން" ޑރ. ޖަމީލް ވިދާޅުވި އެވެ.
ޖަމީލް ވިދާޅުވީ ވަކީލާއި މުވައްކިލާއި ދެމެދުގައި ދެކެވޭ ވާހަކަތަކާއި ބައްދަލު ކުރެވޭ މައުލޫމާތު ތަކަކީ ގާނޫނީ ގޮތުން ރައްކާކުރެވިފައިވާ ވާހަކަތަކެއް ކަމަށެވެ. އަދި ގާނޫނާއި ޚިލާފަށް މިއަދު ހިނގައިދިޔަ ކަންކަމުގެ ޒިންމާ ކޮމިޝަނަރ އޮފް ޕްރިޒަންސް ނަންގަވަން ޖެހޭނެ ކަމަށްވެސް ޖަމީލް ވިދާޅުވި އެވެ.
"ދެން މިސާލަކަށް ސުވާލަކީ މި އޮފިސަރަށް އޯޑަރު ކުރަނީ ކާކުތޯ. އަޅުގަނޑު ގަބޫލުކުރާ ގޮތުގައި މިއަދު ހިނގި ކަންކަމުގެ ޒިންމާ ކޮމިޝަނަރ އޮފް ޕްރިޒަންސް ނަންގަވަން ޖެހޭނެ. އަދި މިއަދު މި ހިނގައި ދިޔަ ކަންކަމާއި ގުޅިގެން އެބޭފުޅާވެސް އެބަޖެހޭ އިސްތިއުފާ ދެއްވަން. ސަބަބަކީ ގާނޫނުގައި ވަރަށް ސާފުކޮށް ފެންނަން އެބައޮތް ، 38 ވަނަ މާއްދާގައި، ވަކީލާއި މުވައްކިލުގެ ލިޔެކިޔުންތައް ނުވެއް ބެލޭނެއޭ."
ޑރ. މުހައްމަދު ޖަމީލް އަހުމަދު
މިއަދު ހިނގި ކަންކަމާއި ގުޅިގެން ކަރެކްޝަންސް އިން ބުނީ، ބައްދަލުވުން ކެންސަލްކުރެވިފައިވަނީ ރައީސް ޔާމީން ޢަބްދުލް ގައްޔޫމްގެ ވަކީލުން ބައްދަލުވުމަށް ގެނައި ތަކެތި އާންމު އުސޫލުން ބަލާ ފާސްކުރުމަށް އެދުމުން އެކަމަށް ދެކޮޅު ހާދާފައި ވާތީ ކަމަށެވެ.
Advertisement
This content is created and paid for by advertisers and does not involve Voice Journalists
