ރައްޔިތުންގެ މަޖިލީހުގައި 3 ވަނަ ދައުރު ފުރިހަމަ ކުރަމުންދާ ކުޑަހުވަދޫ ދާއިރާގެ މެންބަރު އަހުމަދު އާމިރު، ރޭގެ ވަގުތެއްގައި މަގުމަތިން ހައްޔަރު ކުރި މައްސަލަ މަޖިލީހަށް ހުށަހަޅުއްވާނެ ކަމަށް މަހިބަދޫ ދާއިރާގެ މެންބަރު އަހުމަދު ޠާރިގު ވިދާޅުވެއްޖެއެވެ.
އާމިރު ހައްޔަރު ކުރަން މަސައްކަތް ކުރުމުން ގަދަ ދައްކައި، "އަނިޔާ ނުކުރޭ" "އަނިޔާ ނުކުރޭ" ގޮވަމުންދިޔަ މަންޒަރު ފެންނަ ވީޑިއޯ އެއް ރޭ މީސްމީޑިއާގައި ވަނީ ދައުރުވެފައެވެ. ގަދަ ދެއްކުމުގެ ސަބަބުން ފުލުހުން އާމިރު ހައްޔަރު ކޮށްފައި ވަނީވެސް ގަދަ ކަމުންނެވެ. އެކަމާއި ގުޅިގެން ގިނަ ބައެއްގެ ފާޑުކިޔުންތައް ފުލުހުންނަށް ވަނީ އަމާޒުވެފައެވެ.
މި މައްސަލާގައި ޓޮމް ކުރެއްްވި ޓުވީޓެއްގައި ވިދާޅުވީ، ރައީސް އިބްރާހިމް މުހައްމަދު ޞާލިހުގެ ކޯލިޝަންގައި ބައިވެރިވާ އެމްޑީއޭގެ ނާއިބުރައީސް އާމިރަށް ކުރިއަނިޔާ ތަޙްގީގުކޮށްދޭން މަޖިލީހަށް ހުށަހަޅުއްވާނެ ކަމަށެވެ.
އާމިރު ހައްޔަރު މައްސަލާގައި ފުލުހުންގެ މީޑިއާ އޮފިޝަލް ވިދާޅުވީ، ހުޅުމާލޭ ދެވަނަ ފިޔަވަހީގައި ރޭ 12:55 ކަން ހާއިރު، ވީ.ސީ.ޕީ ޖަހައި، ފުލުހުން އުޅަނދުތައް ޗެކު ކުރަމުން ދިޔައިރު، އާމިރުގެ ސައިކަލު އައީ ހިތިގަަސް މަގުން ދެކުނަށް ދުއްވާފައި ކަމަށެވެ.
އަދި އޭނާ ގާތުގައި މަޑުކުރަން އެންގުމުން ވެސް ވީސީޕީއަށް މަޑު ނުކޮށް، ހަޑި ހުތުރު ބަހުން ފުލުހުންނާއި މުއާމަލާތް ކުރުމަށްފަހު، ނުރައްކާތެރިކޮށް އަދި ބާރު ސްޕީޑުގައި ސައިކަލް ދުއްވާފައި ދިޔުމުން ފުލުހުން ގޮސް އެ ސައިކަލް ހުއްޓުވާފައިވާ ކަމަށްވެސް އޮފިޝަލް ވިދާޅުވި އެވެ.
މިއާއެކު މީޑިއާ އޮފިޝަލް ވިދާޅުވީ، އޭނާ ހުއްޓުވައި ފުލުހުން އޭނާއާއި ސުވާލު ކުރުމުން މައުލޫމާތު ދިނުމަށް އިންކާރުކޮށް ފުލުހުންގެ އަމުރަށް ނުކިޔަމަންތެރިވެފައިވާ ކަމަށެވެ.
"އަދި އޭނާ ފުލުހުންގެ ބެލުމުގެ ދަށުން، ހުޅުމާލޭ ފޭސް 2 ޕޮލިސްޓޭޝަނަށް ގެންގޮސް މައުލޫމާތު ސާފުކުރުމަށްފަހު ވަނީ ދޫކޮށްލައިފަ. އޭނާ ދުއްވި ސައިކަލް ވަނީ ޓޯ ކޮށްފައި" މީޑިއާ އޮފިޝަލް ވިދާޅުވި އެވެ.
މިމައްސަލަ ފުލުހުން ތަހުގީގު ކުރަމުންދާ ކަމަށްވެސް އޮފިޝަލް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
