ޖުމްހޫރީ ޕާޓީއަށް މިއަހަރު ސެޕްޓެމްބަރު މަހުގެ 9 ގައި ބާއްވާ ރިޔާސީ އިންތިޚާބު ކާމިޔާބު ކުރެވިދާނެކަމުގެ ފެހި ސިގުނަލް ލިބިއްޖެކަމަށް ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމް ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވެފައި ވަނީ ދިއްގަރު ދާއިރާގެ ކުރީގެ މެންބަރު އަހުމަދު ނާޒިމާއި، ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ސްޕެޝަލް އެޑްވައިޒަރުގެ މަޤާމުގައި ހުންނެވުމަށް ފަހު އިސްތިއުފާދެއްވި މުޙައްމަދު ޝިހާބު ޖުމްހޫރީ ޕާޓީއާއި ގުޅިވަޑައިގަތުމަށް ބޭއްވި ހަރަކާތުގައި ވާހަކަދައްކަވަމުން ނެވެ.
ޤާސިމް ވިދާޅުވީ ޝިހާބު ޖުމްހޫރީ ޕާޓީއާއި ގުޅިވަޑައިގަތުމަކީ މާލޭގެ އިއްޒަތްތެރި އާއިލާތަކުގެ ތާއީދު ޖޭޕީއަށް ލިބިގެންދާނެ ކަމަކަށް ވެގެންދާނެ ކަމަށެވެ. އަދި މާލޭގެ ރައްޔިތުންގެ ވިސްނުން ވެސް ބަދަލުވެގެންދާނެ ކަމެއް ކަމަށެވެ.
އޭގެ އިތުރުން ނާޒިމަކީ ވެސް ސިޔާސީގޮތުން މޮޅު މުފައްކިރެއް ކަމަށާއި، ނާޒިމް ޖޭޕީއާއި ގުޅިވަޑައިގަތުމަކީ އެ ޕާޓީއަށް ސިޔާސީގޮތުން ލިބިގެންދާ ބޮޑު ކުރިއެރުމަކަށް ވާނެ ކަމަށް ޤާސިމް ވިދާޅުވި އެވެ.
ޤާސިމް ވިދާޅުވީ އެ ދެބޭފުޅުން ޖުމްހޫރީ ޕާޓީއާއި ގުޅިވަޑައިގަތުމަކީ ރިޔާސީ އިންތިޚާބު އެ ޕާޓީއަށް ކާމިޔާބު ކުރެވިދާނެކަމަށް ލިބުނު ފެހި ސިގުނަލް ކަމަށެވެ.
ޖުމްހޫރީ ޕާޓީން ރިޔާސީ އިންތިޚާބަށް ކުރިމަތިލަނީ ގައުމުގައި ހުރި މައްސަލަތައް ޙައްލުކުރުމަށް ކަމަށާއި، ސިޔާސީ ތަޖުރިބާކާރުން ޖޭޕީއާއި ގުޅިގެން ދިއުމަކީ މެސެޖެއް ކަމަށާއި، އެކަމަށް ރައްޔިތުން ފުންކޮށް ވިސްނަން ޖެހޭކަމަށް ޤާސިމް ވިދާޅުވި އެވެ. އަދި މި އިންތިޚާބު ޖޭޕީއަށް ހޯދައިދިނުމަށް ރައްޔިތުން ޖޭޕީއާއި ގުޅިވަޑައިގަތުމަށް އެމަނިކުފާނު ވަނީ ދައުވަތުއަރުވާފަ އެވެ.
Advertisement
This content is created and paid for by advertisers and does not involve Voice Journalists
