ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ސްޕެޝަލް އެޑްވައިޒަރުގެ މަޤާމުގައި ހުންނެވި މުހައްމަދު ޝިހާބާއި ރައްޔިތުންގެ މަޖިލިހުގެ ކުރީގެ ނައިބު ރައީސް އަދި ދިއްގަރު ދާއިރާގެ ކުރީގެ މެމްބަރު އަހުމަދު ނާޒިމް ޖުމްހޫރީ ޕާޓީ އަށް ސޮއިކުރައްވައިފި އެވެ.
ޖުމްހޫރީ ޕާޓީގެ އޮފީހުގައި މިއަދު ބޭއްވި ޚާއްސަ ހަފުލާއެއްގަ ނާޒިމް އާއި ޝިހާބު ޖޭޕީއަށް ސޮއި ކުރި ފޯމު އެ ޕާޓީގެ ލީޑަރު އަދި ރިޔާސީ ކެންޑިޑޭޓްކަމަށް ކަނޑައަޅާފައިވާ ގާސިމް އިބްރާހިމަށް ވަނީ ހަވާލު ކުރައްވާފައެވެ.
އެބޭފުޅުން ޖޭޕީއަށް ސޮއި ކުރުމާއި ގުޅިގެން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޤާސިމް ވިދާޅުވީ ޝިހާބު ޖުމްހޫރީ ޕާޓީއާއި ގުޅިވަޑައިގަތުމަކީ މާލޭގެ އިއްޒަތްތެރި އާއިލާތަކުގެ ތާއީދު ޖޭޕީއަށް ލިބިގެންދާނެ ކަމަކަށް ވެގެންދާނެ ކަމަށެވެ. އަދި މާލޭގެ ރައްޔިތުންގެ ވިސްނުން ވެސް ބަދަލުވެގެންދާނެ ކަމެއް ކަމަށެވެ.
އޭގެ އިތުރުން ނާޒިމަކީ ވެސް ސިޔާސީގޮތުން މޮޅު މުފައްކިރެއް ކަމަށާއި، ނާޒިމް ޖޭޕީއާއި ގުޅިވަޑައިގަތުމަކީ އެ ޕާޓީއަށް ސިޔާސީގޮތުން ލިބިގެންދާ ބޮޑު ކުރިއެރުމަކަށް ވާނެ ކަމަށް ޤާސިމް ވިދާޅުވި އެވެ.
ޤާސިމް ވިދާޅުވީ އެ ދެބޭފުޅުން ޖުމްހޫރީ ޕާޓީއާއި ގުޅިވަޑައިގަތުމަކީ ރިޔާސީ އިންތިޚާބު އެ ޕާޓީއަށް ކާމިޔާބު ކުރެވިދާނެކަމަށް ލިބުނު ފެހި ސިގުނަލް ކަމަށެވެ.
ޝިހާބަކީ ޖޭޕީ އުފެދިއްތާ ކުރީކޮޅު ވެސް އެ ޕާޓީގެ އިސް މެމްބަރެކެވެ. އެކަމަކު، ސިޔާސީ މަސްރަހަށް އަދި ބަދަލުތަކާ އެކު ފަހުން އެމްޑީޕީއާ ގުޅިވަޑައިގަތީ އެވެ. ނަމަވެސް، ގާސިމާ އަބަދުވެސް ވަރަށް ގާތް ގުޅުމެއް ބާއްވަވަ އެވެ.
ނާޒިމަކީ ކުރިން، ކުރީގެ ރައީސް އަބްދުالله ޔާމީނާ ވަރަށް ގާތް ބޭފުޅެކެވެ. ނަމަވެސް ނާޒިމާއި ޔާމީނާ ދެމެދު ބޮޑެތި ހިޔާލު ތަފާތުވުންތަކެއް އުފެދިގެން ޔާމީނާ މިހާރު އޭނާ ވަނީ ދުރަށް ޖެހިވަޑައިގެންފައެވެ.
Advertisement
This content is created and paid for by advertisers and does not involve Voice Journalists
