ސެޕްޓެމްބަރ 9 ގައި ބާއްވާ ރިޔާސީ އިންތިޚާބުގައި  ވާދަކުރުމަށް ޖުމްހޫރީ ޕާޓީގެ ކެންޑިޑޭޓު ޤާސިމް އިބްރާހިމްގެ ނަން ހުށައަޅުއްވައިފިއެވެ.

ޤާސިމް އިބްރާހިމްގެ ރަނިންގމޭޓަކަސް ހަމަޖައްސައިފައިވަނީ ޖޭޕީގެ ޑެޕިޔުޓީ ލީޑަރ ޑރ އަމީން އިބްރާހިމެވެ. އަމީންއަކީ ރައީސް ޔާމިން ޢަބްދުލްޤައްޔޫމްގެ ވެރިކަމުގައި ޓްރާންސްޕޯޓް މިނިސްޓަރު ކަން ކުރައްވައިފައެވެ.

މީގެ އިތުރުން އަމީން އަކީ ޖޭޕީ އާއި ޤާސިމްގެ ސިޔާސީ މަސައްކަތްތަކުގައި ވަރަށް ބޮޑަށް ހަރަކާތްތެރިވާ ބޭފުޅެކެވެ.

ޤާސިމްގެ ކެންޑިޑެސީ ފޯމު ހުށައެޅުމަށް ޤާސިމްގެ އަރިހުގައި މިސަރުކާރުގެ ޓްރާންސްޕޯޓް މިނިސްޓަރ އަދި ޤާސިމްގެ އަނބިކަނބަލުން ޢާއިޝަތު ނަހުލާވެސް ބައިވެރިވެވަޑައިގަތެވެ.

 އަދި ދާދިފަހުން އެޕާޓީއާއި ގުޅިވަޑައިގެންނެވި ކުރީގެ އެޑިޔުކޭޝަން މިނިސްޓަރ ޑރ މަޙްމޫދް ޝައުޤީވެސް ބައިވެރިވެވަޑައިގެންނެވިއެވެ.

މިއަހަރުގެ ރިޔާސީ އިންތިޚާބުގައި 7 ކެންޑިޑޭޓަކު ވާދަކުރެއްވުމަށް ވަނީ ހަމަޖެހިފައެވެ. އޭގެ ތެރޭގައި ދެ ކޯލިޝަނަކުން ދެ ކެންޑިޑޭޓުން ވާދަކުރައްވާއިރު، މިނިވަން ދެ ކެންޑިޑޭޓެއްވެސް ވާދަކުރައްވައެވެ.