ރިޔާސީ އިންތިހާބު ކާމިޔާބުވެ، ވެރިކަމަށް އާދެވުނު ނަމަވެސް އަމިއްލަފުޅު ކުންފުންޏެއް ކަމަށްވާ ވިލާ ކުންފުންނީގައި މިހާރު ހުރި އެއްޗިއްސަށްވުރެ އިތުރަށް އެއްވެސް އެއްޗެއް ބޭނުން ނޫން ކަމަށް ޖުމްހޫރީ ޕާޓީގެ ކެންޑިޑޭޓް އަދި އެ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
އެމަނިކުފާނުން މިފަދައިން ވިދާޅުވީ، ކުރިއަށް އޮތް ސެޕްޓެމްބަރު މަހުގެ 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ޖުމްހޫރީޕާޓީގެ ފަރާތުން ވާދަކުރެއްވުމަށްޓަކައި ކެންޑިޑޭސީ އިލެކްޝަންސް ކޮމިޝަނަށް ހުށަހެޅުމަށްފަހު ނޫސްވެރިންނަށް ދިން ބަސްދީ ގަތުމެއްގައެވެ.
އެގޮތުން ގާސިމް ވިދާޅުވީ، މި ވަގުތު އެބޭފުޅާގެ އާއިލާއާއި އަމިއްލަ ކުންފުނީގައި ހުރި އެއްޗިއްސަށްވުރެ އިތުރަށް އެއްވެސް އެއްޗެއް ބޭނުންފުޅުވެ ނުލައްވާކަމަށާއި، އެކަމުގެ ފުރިހަމަ ޔަގީންކަން ދިވެހިރައްޔިތުންނަށް އަރުވާކަމުގައެވެ.
"އަޅުގަނޑު ޔަގީންކަމާއެކު މި ދަންނަވަނީ އަޅުގަނޑު އަތުގައި ހުރި އެއްޗަކަށް ވުރެ އިތުރަށް އެއްވެސް އެއްޗެއް އަޅުގަނޑުގެ ވެރިކަމެއްގައި ހޯދާކަށް ނޫޅޭނަން"
ގާސިމް ވިދާޅުވިއެވެ.
ވެރިކަން ލިބވަޑައިގެން ނަމަވެސް، ވިލާ ކުންފުންޏަށް ފައިދާ ވާނެ ގޮތަށް އެއްވެސް ކަމެއް ނުކުރައްވާނެ ކަމަށް ވައުދުވެވަޑައިގަންނަވަމުން ގާސިމް ވިދާޅުވީ، އެ މަނިކުފާނުން ދިވެހި ގައުމުން އިތުރަށް އެއްވެސް އެއްޗެއް ބޭނުންފުޅުވެ ވަޑައިނުގަންނަވާ ކަމުގައެވެ.
މިއަހަރުގެ ރިޔާސީ އިންތިހާބުގައި ވާދަކުރެއްވުމަށް ޖުމްހޫރީ ޕާޓީގެ ފަރާތުން ގާސިމް އިބްރާހީމް ގެ ކެނޑިޑޭސީ މިހާރު އިލެކްޝަންސް ކޮމިޝަނަށް ހުށަހަޅައިފައިވާއިރު، އެމަނިކުފާނުންގެ ރަނިންގްމޭޓެއްގެ ގޮތުގައި ނިކުމެ ވަޑައިގަންނަވަނީ ޖުމްހޫރީ ޕާޓީގެ ޑެޕިއުޓީ ލީޑަރު ޑރ އަމީން އިބްރާހިމެވެ.
ރިޔާސީ އިންތިހާބުގައި ވާދަކުރެއްވުމަށްޓަކައި ޖުމުލަ އަށް ފަރާތަކުން ކެނޑިޑޭސީ ހުށަހަޅައިފައިވާއިރު، އޭގެ ތެރޭގައި އަމިއްލަ ގޮތުން އިންތިހާބުގައި ވާދަ ކުރައްވާ ތިން ބޭފުޅަކު ހިމެނިވަޑައިގަންނަވައެވެ.
Advertisement
This content is created and paid for by advertisers and does not involve Voice Journalists
