ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހީމް އޭނާގެ އިންސާނީ އެހީ ފޯރުކޮށްދޭ ވިލާފައުންޑޭޝަންގެތެރެއިންނާއި އަދި އޭނާގެ އަމިއްލަ ނަންފުޅުގައި މަތީ ތައުލީމް ހާސިލް ކުރުމަށް އެތައް ހާސް ދަރިވަރުން ނަގާފައިވާ ލޯން މައާފްކޮށްދެއްވައިފިކަން އިއުލާން ކުރައްވައިފިއެވެ.

ޤާސިމް އެލޯންތައް މައާފްކޮށްދެއްވިކަން އިއުލާންކުރެއްވީ މިރޭ ޖުމްހޫރީ ޕާޓީގެ މައި ޖަގަހަ ކުނޫޒްގައި އޭނާގެ މިފަހަރުގެ ރިޔާސީ އިންތިޚާބަށް އެކުލަވާލައްވާފައިވާ މެނިފެސްޓޯ އިއުލާން ކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ވިލާ ސްކޮލަރޝިޕް ޕްރޮގްރާމް ފެށުނުފަހުން މިހާތަނަށް ހަތްހާހަށްވުރެ ގިނަ ދިވެހިން އެސްކޮލަރޝިޕް ޕްރޮގްރާމްގެތެރެއިން މަތީ ތައުލީމް ހާސިލްކޮށްފައިވެއެވެ. ގިނަ ކުދިން ތައުލީމް ހާސިލްކޮށްފައިވަނީ އެޕްރޮގްރާމްގެތެރެއިން ނަގާ ފައިސާގެ އެއްބައި އަނބުރާ ދައްކާގޮތަށެވެ. އަނެއްބައި އޮންނަނީ ޚައިރާތަށް ހިލެއެވެ. 

Advertisement

"އެހުރިހާ ކުދިންގެ ހުރިހާ ފައިސާއެއް އަޅުގަނޑު މައާފްކޮށްފިން. އެންމެ ކުއްޖަކުވެސް ބޮޑުލާރިއެއްވެސް ދައްކާނެ ކަމެއް ނެތް އަޅުގަނޑަށް ވެރިކަން ލިބުނަސް ނުލިބުނަސް." ކުނޫޒްގައި ވާހަކަފުޅު ދައްކަވަމުން ގާސިމް ވިދާޅުވިއެވެ. 

ވެރިކަމަށް ވަޑައިގެންނެވިއްޖެނަމަ ސްޓޫޑަންޓް ލޯންގެ ގޮތުގައި ދައުލަތުން ދޫކޮށްފައިވާ ހުރިހާ ލޯނެއް ކިޔަވާ ކުދިންނަށް މައާފްކުރައްވާނެކަމަށްވެސް ޤާސިމް މިރޭ ވިދާޅުވިއެވެ. މިހާރު އޮންނަ ޑިގްރީގެ ބަދަލުގައި މާސްޓަރސްއަށް ހިލޭ ކިޔެވޭނެ ގޮތް ހައްދަވައިދެއްވާނެ ކަމަށްވެސް ވިދާޅުވިއެވެ.

ޤާސިމަކީ ރާއްޖޭގައި އެންމެ ފުރަތަމަ މަތީ ތައުލީމަށް ދިވެހިންނަށް ކިޔަވައިދޭނެ ސްކޯލަރޝިޕް ޕްރޮގްރާމެއް ފެށްޓެވި ފަރާތެވެ. 1989 ވަނަ އަހަރު އޭނާގެ އުމުރުފުޅުން 50 ވަނަ އުފަންދުވަހާއި ދިމާކުރައްވައި ސްކޯލަރޝިޕް ޕްރޮގްރާމް ފެށްޓެވުމަށްފަހު އެފަހަރުވެސް އެކި ފަރާތްތަކުން އޭނާއަށް ދައްކަންޖެހިފައިހުރި 50 މިލިޔަން ރުފިޔާ މައާފްކޮށްދެއްވިއެވެ. ރާއްޖޭގެ އެކި ދާއިރާތަކުގައި މަތީ ތައުލީމަށް ކިޔަވައިގެން ގައުމު ހިންގަންތިބި ވަރަށް ގިނަ މީހުންނަކީ ވިލާސްކޯލަރޝިޕް ޕްރޮގްރާމްގެތެރެއިން ތައުލީމު ހާސިލު ކުރި މީހުންނެވެ. ޤާސިމް މިރޭ އިއުލާންކުރެއްވި ތިރީހަކަށް ސަފްހާގެ މައްޗަށް އެކުލެވޭ މެނިފެސްޓޯއަކީ ވަރަށް އުއްމީދީ ގިނަ ކަންތައްތަކެއް ހިމަނުއްވާފައިވާ މެނިފެސްޓޯއެއްކަން ފާހަގަ ކުރެވެއެވެ.