ހދ ނޮޅިވަރަމުގައި ޒަމާނީ ފެންވަރުގެ ހުރިހާ ޚިދްމަތެއް ލިބޭ ސްކޫލެއް ޤާއިމްކޮށްދީ ދަނޑުވެރިކަން ތަރައްޤީ ކޮށްދެއްވާނެ ކަމަށް ޕީޕީއެމް-ޕީއެންސީގެ ރިޔާސީ ކެންޑިޑޭޓް ޑރ މުޙައްމަދު މުޢިއްޒު ވިދާޅުވެއްޖެއެވެ.

ޑރ މުޢިއްޒު މިހެން ވިދާޅުވީ ރިޔާސީ ކެމްޕޭނަށް ބޮޑު ތިލަދުން މައްޗަށް ކުރައްވަމުން ގެންދަވާ ދަތުރުފުޅުގައި ހދ ނޮޅުވަރަމަށް ކުރައްވަމުން ގެންދަވާ ދަތުރުފުޅުގައި އެރަށު ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.

ޑރ މުޢިއްޒު ވިދާޅުވީ ނޮޅިވަރަމްގައި 600 އަށް ވުރެ ގިނަ ކުދިން ތަޢުލީމް ހާސިލްކުރަމުންދާކަމަށެވެ. އަދި ޕީޕީއެމް ޕީއެންސީގެ ސަރުކާރެއްގައި ނޮޅިވަރަމްގައި ހުރިހާ ޚިދުމަތްތައް ލިބޭ ޒަމާނީ ސްކޫލެއް ޤާއިމުކޮށްދެއްވާނެ ކަމަށެވެ.

Advertisement

މުޢިއްޒު ވިދާޅުވީ ނޮޅިވަރަމްގެ އިޤްތިޞާދު ކުރިއަރުވަން ދަނޑުވެރިކަމާއި ގުޅިގެން ހުރި ގޮން ޖެހުންތައް ނައްތައިލަން ޖެހޭކަމަށެވެ. އަދި އިދިކޮޅު ކޯލިޝަނުގެ ސަރުކާރެއްގައި އެފަދަ މައްސަލަތައް ހައްލުކޮށްދެއްވާނެކަމަށްވެސް ޑރ މުޢިއްޒު ވިދާޅުވިއެވެ.

މިއާއި އެކު އިދިކޮޅު ކެންޑިޑޭޓް މުޢިއްޒު ވިދާޅުވީ ފުޓްބޯޅަ ދަނޑެއް ނޮޅިވަރަމްގައި ނެތި އެހެން ރަށެއްގައި އޮވެގެން ވާނެކަމަށް ޤަބޫލުނުކުރައްވާ ކަމަށާއި، ރަށްރަށާމެދު ޢަދުލުވެރިވާނަމަ އެކަންތައް އެރަށުގައި ކޮށްދެވިފައި އޮންނަން ޖެހޭނެކަމަށެވެ.

އެކަން ފާހަގަކުރައްވާ ޑރ. މުޢިއްޒު ވިދާޅުވީ ޕީޕީއެމް-ޕީއެންސީގެ ސަރުކާރެއްގައި އެރަށުގައި ކުޅިވަރާ ގުޅޭ އެފަދަ ކަންކަން ޤާއިމްކޮށްދެއްވާނެ ކަމަށެވެ.

"އަޅުގަނޑުމެންގެ ސަރުކާރެއް ޤާއިމްވެއްޖެނަމަ ތިބޭފުޅުން ތި އެދޭގޮތަށް ފުޓްބޯޅަ/ފުޓްސަލް ދަނޑު އަދި ވޮލީ ފަދަ ކުޅިވަރު ވަސީލަތްތައް ޤާއިމުކޮށްދޭނަން" ޑރ. މުޢިއްޒު ވިދާޅުވިއެވެ.

މީގެ އިތުރުން ޑރ މުޢިއްޒުވަނީ ނޮޅިވަރަމުގެ މަގުތައް ހަދައިދެއްވުމަށާއި، ބަނދަރު ތަރައްޤީކޮށްދެއްވާނެ ކަމަށާއި އަދި އެކަށީގެންވާ ފެންވަރުގެ ހޮސްޕިޓަލެއް ޤާއިމްކޮށްދެއްވުމަށް ވަޢުދުވެވަޑައިގެންފައެވެ.