ޖުމްހޫރީ ޕާޓީގެ ލީޑަރު، އަދި ރިޔާސީ ކެންޑިޑޭޓް، ގާސިމް އިބްރާހިމް އިންޑިއާ އާއި މެދު ގެންގުޅުއްވާނެ ކަމަށް ވިދާޅުވި ސިޔާސަތަށް، ޕްރޮފެސަރު ހަސަން އުގެއިލް ތާއީދު ކުރައްވައިފިއެވެ.
ޖުމްހޫރީ ޕާޓީގެ ރިޔާސީ ކެންޕެއިން ރަސްމީކޮށް އިފްތިތާޙް ކުރުމަށް ހޮނިހިރު ދުވަހުގެރޭ އދ. މާމިގިލީގައި ބޭއްވި ޖަލްސާގައި ވާހަކަ ދައްކަވަމުން ގާސިމް ވަނީ އެމަނިކުފާނުގެ ވެރިކަމެއްގައި އިންޑިޔާ އާއި މެދު ގެންގުޅުއްވާނެ ސިޔާސަތު ހާމަ ކުރައްވާފައެވެ.
އެގޮތުން ރާއްޖޭގެ ކަނޑުގެ ސަރަހައްދު ބެލެހެއްޓުމަށް ޒަމާނުއްސުރެ އިންޑިއާއިން ދެމުންދާ އެހީތެރިކަމަށް އިޝާރާތްކުރައްވައި ގާސިމް ވިދާޅުވީ އެމަނިކުފާނު ގަބޫލުކުރައްވާ ގޮތުގައި ރާއްޖޭގެ ސަރަހައްދު ބެލެހެއްޓުމަށް އެހެން ބަޔަކާ ހަވާލުކުރަން ނުޖެހޭ ކަމަށެވެ. އަދި އިންޑިއާ އިން ރާއްޖެއަށް ގިނަ އެހީތަކެއް ވަމުން އަންނަ ކަމަށާއި އެކަމަކު އެގައުމުގައި ވެސް "ބޯނެ ފެން ފޮދެއް ނެތިފައި" އެތައް މިލިއަން ބަޔަކު އެބަ ތިބި ކަމަށް ގާސިމް ވިދާޅުވި އެވެ.
"އެހެން އެމީހުން [އިންޑިއާ] ތިބެގެން އަޅުގަނޑުމެންނަށް އަބަދާ އަބަދު ފޫވެއްޓިފައި އޮތް ފަޔަކަށް ފެންފުރާހެން އެކަންކަން ފުއްދައިދެވޭނެތޯ. ނުކޮށްދެވޭނެ ދެއްތޯ. ކިތަންމެ ލޯތްބެއް ވިޔަސް އަޅުގަނޑުމެންނާއި ކިތަންމެ ގާތް ގުޅުމެއް ބާއްވަން ބޭނުންވިޔަސް ތާއަބަދަކު އަޅައެއް ނުލެވޭނެ ދެއްތޯ،" ގާސިމް ވިދާޅުވި އެވެ.
ގާސިމް ވިދާޅުވީ އަބަދު މީހުންގެ ގައިގައި ލެނގިގެން ހުރުމުގެ ބަދަލުގައި އަމިއްލަ ފައިމައްޗަށް ދިވެހިން ތެދުވަން ޖެހޭ ކަމަށެވެ.
"އަޅުގަނޑުމެންގެ މައި ބުރަކަށީގައި ހުންނަންވާނެ އެ ބާރު، ނެތިއެއް އަޅުގަނޑުމެންނަކަށް ނޫޅެވޭނެ،" ކާބަފައިން ދެއްކެވި މިސާލަކީ އެއީ ކަން ފާހަގަކުރައްވައި ގާސިމް ވިދާޅުވި އެވެ.
ގާސިމްގެ އެވާހަކަ އަށް ތާއީދު ކުރައްވާކަން ހާމަކުރައްވައި އުގެއިލް ފޭސްބުކުގައި ލިޔުއްވި ޕޯސްޓެއްގަ ވިދާޅުވީ، އިންޑިއާއިންދޭ ލޯނުތަކަށް ތާއަބަދު ބަރޯސާނުވެ އަމިއްލަ ފައިމައްޗަށް ތެދުވެ ހިންދަމާލެވޭނެ ދުވަހެއްވެސް ދިވެހިން ހޯދަން ޖެހޭ ކަމަށެވެ.
Advertisement
This content is created and paid for by advertisers and does not involve Voice Journalists
