މި ސަރުކާރުގެ އިހުމާލުން ވަޅުޖެހިފައި އޮތް އިހަވަންދޫގެ މަސްވެރިކަން އަލުން ކޮޅަށް ޖަހާނެކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ.

ޑރ މުއިއްޒު ވިދާޅުވީ މަސްވެރިކަމުގެ ސިނާއަތް ފުޅާކުރުމަށް ދޯނިފަހަރު ބަންނާނެ ތަނެއް މުހިންމު ކަމަށެވެ. އެކަމަށްޓަކައި އިހަވަންދޫ ކައިރީގައި އޮންނަ ދިގުފަރުގެ ބިން ހިއްކާ އިހަވަންދޫއާއި ގުޅާލާ، ސިނާއީ މަސައްކަތް ކުރާނެ ބިން އެރަށުގައި ކަނޑައަޅުއްވާނެކަމަށް ޑރ މުއިއްޒު ވިދާޅުވި އެވެ. 

އޭގެ އިތުރުން އިތުރުގައި އެކަށީގެންވާ ކޯލްޑް ސްޓޯރޭޖެއް ނެތުމަކީވެސް އުތުރުގެ މަސްވެރިންނަށް މި މަސައްކަތް ކުރުމަށް ދިމާވެފައިވާ ވަރަށް ބޮޑު ގޮންޖެހުމެއްކަން ޑރ މުއިއްޒު ފާހަގަކުރެއްވި އެވެ.

އެހެންކަމުން އިހަވްނދޫގައި ކޯލްޑް ސްޓޯރޭޖެއް އަޅުއްވާދެއްވާނެ ކަމަށެވެ. އަދި އިހަވަންދޫގެ މަސްވެރިން ބޭނުންވާގޮތަށް ފިޝްކަލެކްޝަން ސެންޓަރެއް އެ ރަށުގައި އަޅުއްވާދެއްވާނެ ކަމަށް ޑރ މުއިއްޒު ވަނީ ވިދާޅުވެފަ އެވެ. 

ޑރ މުއިއްޒު ވައުދުތައް ވިދާޅުވަމުން ދިޔަ ވަގުތު ސަޕޯޓަރުން ތަރުހީބު ދެނީ/ފޮޓޯ: ޕީޕީއެމް 

އޭގެ އިތުރުން އިހަވްނދޫގެ މަސްވެރިން ބޭނުންވާ ފިޝްކަލެކްޝަން ސެންޓަރެއް އިހަންދޫގައި ގާއިމްކޮށްދެއްވާނެކަމަށް ޑރ މުއިއްޒު ވިދާޅުވި އެވެ. އަދި ހަމަ އެހެންމެ އާ އައިސް ޕްލާންޓެއް ބަހައްޓާ ތެޔޮ ލިބޭނެ އިންތިޒާމުތައް ގާއިމްކުރާނެކަމަށް ޑރ މުއިއްޒު ވިދާޅުވި އެވެ. 

އިހަވަންދޫގައި ބޭއްވި ޑރ މުއިއްޒުގެ ކެމްޕޭނު ޖަލްސާގެ ތެރެއިން 

ޑރ މުއިއްޒުވަނީ އެމަނިކުފާނަށް އިތުބާރުކުރެއްވުމަށް ރައްޔިތުންގެ އަރިހުން އެދިވަޑައިގެންފަ އެވެ. މަސްވެރިކަމުގެ ސިނާއަތަށް ދިމާވެފައިވާ މައްސަލަތައް ޙައްލުކުރެއްވުމަށް ރައީސް ޔާމިނުގެ ޕްލޭނާއި އެއްގޮތަށް މަސައްކަތްޕުޅު ކުރައްވާނެކަމުގެ ޔަގީންކަން ދެއްވާ ޑރ މުއިއްޒު ވިދާޅުވީ އެމަނިކުފާނު ވައުދުވެވަޑައިގަންވާ ކަންކަން ފުއްދަވާދެއްވާނެ ކަމަށެވެ. 

އިހަވަންދޫއަށް ޑރ މުއިއްޒު މިރޭ ވަޑައިގަތުމުން، އެރަށުން އެމަނިކުފާނަށް ވަނީ ވަރަށް ހޫނު މަރުހަބާއެއް ކިޔާފަ އެވެ. އެރަށަށް ވަޑައިގެން ބޮޑު ޖަލްސާއެއް ބާއްވާފައިވާއިރު، ޑރ މުއިއްޒުވަނީ އިހަވަންދޫގައި ރަސްމީކޮށް ކެމްޕޭނު ޖަގަހަ ހުޅުވާދެއްވާ، ޕީޕީއެމް ސްޓިއަރިން ކޮމެޓީގެ ބޭފުޅުންނާއި ބައްދަލުކުރައްވާ އިހަވަންދޫއަށް ބޭނުންވެފައިވާ ކަންކަމާއި ގުޅޭގޮތުން ޚިޔާލު ހޯއްދަވާފަ އެވެ.