ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ހއ ދިއްދޫގައި ތަރައްގީގެ ބިޔަ މަޝްރޫއުތަކެއް ހިންގާ އެ ރަށް ތަރައްގީކުރާނެ ގޮތް އެ ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެދެއްވައިފި އެވެ. 

ޑރ މުއިއްޒު ތިލަދުންމައްޗަށް ކުރައްވާ ކެމްޕޭނު ދަތުރުފުޅުގައި މިއަދު ހަވީރު ވަނީ ދިއްދޫއަށް ވަޑައިގެންފަ އެވެ. އެމަނިކުފާނު ދިއްދޫއަށް ވަޑައިގަތުމުން އެ ރަށުން އެމަނިކުފާނަށް ވަނީ ވަރަށް ހޫނު މަރުހަބާއެއް ދަންނަވާފަ އެވެ.

މިރޭ އެ ރަށުގައި އެމަނިކުފާނުގެ ކެމްޕޭނު ޖަލްސާއެއް ބާއްވާފައިވާއިރު، ޑރ މުއިއްޒު ވަނީ ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ދިއްދޫގައި ކުރިއަށް ގެންދާނެ މުހިންމު މަޝްރޫއުތައް އިއުލާނުކުރައްވާފަ އެވެ. 

ޑރ މުއިއްޒު ވިދާޅުވީ ދިއްދޫގައި އެއާޕޯޓު އަޅާނެ ވާހަކައަކީ ވަރަށް ގަދައަށް ދެކެވޭ ވާހަކައެއް ކަމަށެވެ. އެކަމަށްޓަކައި ބިން ހިއްކަން ޖެހޭ ކަމަށާއި، ރައީސް ޔާމިނުގެ ސަރުކާރުން ވާނީ ބިން ހިއްކުމުގެ ގިނަ މަޝްރޫއުތަކެއް ރާއްޖޭގެ އެކި ކަންކޮޅުތަކުގައި ކުރިއަށް ގެންގޮސްފައިކަން ޑރ މުއިއްޒު ފާހަގަކުރެއްވި އެވެ. 

އެއާއެކު އެމަނިކުފާނު ވިދާޅުވީ ދިއްދޫގައި ބިން ހިއްކާ އެއާޕޯޓު އަޅާނީ ޕީޕީއެމް-ޕީއެންސީ ކޯލިޝަންގެ ސަރުކާރުގައި ކަމަށެވެ. އަދި އެކަން ކުރައްވާނީ ފަސޭހަކަމާއި އެކުގައި ކަމަށް ޑރ މުއިއްޒު ވިދާޅުވި އެވެ.

އެއާޕޯޓު މަޝްރޫއާއި ގުޅޭގޮތުން ޑރ މުއިއްޒު އިތުރަށް ވިދާޅުވީ އެއާޕޯޓާއެކު ދަތުރުފަތުރު ކުރުމަށް ލުއި ފަސޭހަކަން ލިބިގެން ދިއުމާއެކު ދިއްދޫގައި ގިނަ ވަޒީފާތަކެއް ވެސް އުފެދިގެންދާނެ ކަމަށެވެ. އަދި އެއީ ދިއްދޫގެ ޒުވާނުންނަށް ޚާއްސަވެގެންދާނެ ވަޒީފާތަކަކަށް ވެގެންދާނެ ކަމަށެވެ. 

ޑރ މުއިއްޒު ވިދާޅުވީ ދިއްދޫ ހޮސްޕިޓަލް އަޕްގްރޭޑް ކުރައްވާނެކަމުގެ ޔަގީންކަން ދެއްވާ ކަމަށެވެ. ދިއްދޫގައި ޓާޝަރީ ފެންވަރުގެ ހޮސްޕިޓަލެއް އެޅުމަށް މި ސަރުކާރުން ވައުދުވެވަޑައިގެން ނަމަވެސް، މިހާތަނަށް އެ ހޮސްޕިޓަލުގެ މަސައްކަތް ފަށާފައި ނުވާއިރު، ޑރ މުއިއްޒު ވިދާޅުވީ، އެމަނިކުފާނުގެ ވެރިކަމެއްގައި ދިއްދޫއަށް ބޭނުންވާ ސިއްހީ ވަސީލަތްތައް ފުޅާކޮށް، އެ ރަށު ހޮސްޕިޓަލަކީ ކައިރި ސަރަހައްދުތަކުން އަންނަ މީހުންނަށް ވެސް ފެންވަރު ރަނގަޅު ސިއްޙީ ޚިދުމަޔް ލިބޭނެ ހޮސްޕިޓަލަކަށް ހައްދަވާދެއްވާނެ ކަމަށެވެ. 

ޕްރޮގްރެސިވް ކޮންގްރެސް ކޯލިޝަންގެ ސިޔާސަތުތަކަށް އަލިއަޅުވާލައްވާ ޑރ މުއިއްޒު ވިދާޅުވީ، އެ ކޯލިޝަނުން އެންމެ އިސްކަން ދޭ ސިޔާސަތަކީ ބޯހިޔާވަހިކަން ފޯރުކޮށްދިނުން ކަމަށެވެ. ރާއްޖޭގެ ހުރިހާ ރައްޔިތުންނަށް ތަފާތުކުރުމެއް ނެތި ބޯހިޔާވަހިކަން ކަށަވަރުކޮށްދިނުމަށް މަސައްކަތް ކުރައްވާނެ ކަމަށާއި، އެ ސިޔާސަތުގެ ދަށުން ދިއްދޫ ރައްޔިތުންނަށް އެކަން ކަށަވަރުކޮށްދެއްވާނެ ކަމަށް ޑރ މުއިއްޒު ވިދާޅުވި އެވެ. 

ޑރ މުއިއްޒުގެ ވާހަކައިގައި ވަނީ ޒުވާނުންނަށް ޚާއްސަ ކަންތަކެއް ފާހަގަކޮށް، އެކަންކަން ވެސް ހިއްސާކުރައްވާފަ އެވެ. އެގޮތުން ޑރ މުއިއްޒު ވިދާޅުވީ ދިއްދޫގައި ޒަމާނީ ފެންވަރުގެ ފުޓުބޯޅަ ދަނޑެއް އެޅިގެން ދިއުމަކީ ދިއްދޫ ޒުވާނުންގެ ވަރަށް ބޮޑު އެދުމެއް ކަމަށެވެ. އެހެންކަމުން، އެކަން ކޮށްދެއްވާނެ ކަމަށާއި، އޭގެ އިތުރުންވެސް ދިއްދޫގައި ރައީސް ޔާމީނުގެ ޒައާމަތުގައި ޤާއިމްކޮށްދެއްވި ސްޕޯޓްސް އެރީނާގެ އާބާތުރަ ފިއްލަވާ، އެތަނުގައި ކުޅިވަރުގެ ވަސީލަތްތައް ޤާއިމްކޮށްދެއްވާނެ ކަމަށް ޑރ މުއިއްޒު ވިދާޅުވި އެވެ. 

ހަމައެއާއެކު ޑރ މުއިއްޒު ވިދާޅުވީ ދިއްދޫގެ މަގުތައް ހަދާ ވާހަކަ މި ސަރުކާރުން ދައްކަމުން ދިޔަ ނަމަވެސް، އެކަމުގެ އަމަލީ މަސައްކަތް ފަށާފައި ނުވާކަމުގެ ޝަކުވާތައް ރައްޔިތުން ކުރަމުން އަންނަ ކަމަށެވެ. މި ސަރުކާރުން މަގުހަދާ ސްޕީޑާއި، ފެންވަރު މާލޭގައި ހަދާ އަމީނީ މަގަށް ބަލާލުމުން ވެސް ސާފުވެގެންދާނެކަމަށް އިޝާރާތްކުރައްވާ ޑރ މުއިއްޒު ވިދާޅުވީ ދިއްދޫގައި ޒަމާނީ ފެންވަރަށް މަގުތައް ހަދާނީ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ކަމަށެވެ.

އެ ކޯލިޝަނަނީ މަގުހެދުމުގެ ތަޖުރިބާ ހުރި، އަދި ތާރު އަޅައިގެން މަގުތައް ހެދުމުގެ ތާރީހެއް އޮތް ކޯލިޝަނެއް ކަމަށާއި، އެކަން ކުރައްވާނެ ގޮތް ރަނގަޅަށް އެނގިވަޑައިގަންނަވާކަން ޑރ މުއިއްޒުގެ ވާހަކައިގައި ފާހަގަކުރެއްވި އެވެ. 

އެކަންކަން ފާހަގަކުރައްވާ ޑރ މުއިއްޒު ވިދާޅުވީ ދިއްދޫ ތަރައްގީ ކުރާނީ ރައްޔިތުން އެދޭ ގޮތަށް ކަމަށެވެ. ރަަށްރަށުގެ ތަރައްގީއަކީ ރައްޔިތުންގެ ހައްޤެއްކަމަށް ގަބޫލުފުޅު ކުރައްވާ ކަމަށާއި، އެ ތަރައްގީ ގެންނަން ވާނީ ރަށްޔިތުންގެ ވިންދާއި އެއްގޮތަކަށް ކަމަށް ޑރ މުއިއްޒު ވިދާޅުވި އެވެ.