ޖުމްހޫރީ ޕާޓީގެ ރިޔާސީ ކެންޑިޑޭޓް، މާމިގިލީ ދާއިރާގެ މެންބަރު ޤާސިމް އިބްރާހީމް އަކީ ކޮންމެ ދުވަހަކުވެސް، އެވްރެޖް ގޮތެއްގައި 700 އެއްހާ ރައްޔިތުންގެ އިހްސާސްތައް އަޑުއައްސަވަމުންދާ ބޭފުޅެއް ކަމަށް އެމަނިކުފާނުގެ އެޑްވައިޒަރ އަދި ވިލިމާލޭ ދާއިރާގެ ކުރީގެ މެމްބަރު އަހުމަދު ނިހާން ހުސެއިން މަނިކު ވިދާޅުވެއްޖެއެވެ. 

ރިޔާސީ ކެންޕެއިނަށް ޖުމްހޫރީ ޕާޓީން ބޮޑުތިލަދުންމައްޗަށް ކުރައްވަމުންދާ ދަތުރުފުޅުގައި އެ އަތޮޅު ނޮޅިވަރަމަށް ވަޑައިގެން، އެރަށު ރައްޔިތުންނާއި ބައްދަލުކުރައްވާ ވާހަކަ ދައްކަވަމުން ނިހާން ވިދާޅުވީ، ވޭތުވެދިޔަ ސާޅީހަކަށް އަހަރަށް ބަލާލި ނަމަވެސް، ގާސިމް އިބްރާހިމް ފިޔަވައި، ދުވާލެއްގެ މައްޗަށް 700 މީހުންގެ އަޑު އެއްސެވި ބޭފުޅެއް ގާސިމް އިބްރާހިމް ފިޔަވައި ނުހުންނާނެ ކަމަށެވެ. 

"80 ގެ ކުރީކޮޅުން ފެށިގެން، އެމަނިކުފާނު މަސައްކަތް ކުރަން ފެށި ހިސާބުންނާ، އަދި އަމިއްލަ މަސައްކަތްޕުޅު ހިންގެވުމަށްޓަކައި ވިލާ ކުންފުނި ހިފައިގެން ނުކުތް ހިސާބާ، އަދި އެއަށްވުރެ ކުރިންވެސް އޭގެ ފަހުންވެސް، އެވްރެޖް ގޮތެއްގައި ދުވާލަކު 700 އެއްހާ ރައްޔިތުންގެ އެކިއެކި އިހްސާސްތައް. އެތައް އެތައް ބާވަތެއްގެ ބޭނުމަށްޓަކައި އެމަނިކުފާނާއި ބައްދަލުކުރެއްވި ބޭފުޅުންގެ އެތައް ފަސާނާ އަކަށް ވަގުތު ދެއްވައި، އަޑު އައްސަވައި، އަތްޕުޅުގައި އެވަގުތު ހުރި އެއްޗަކުން ޚަރަދު ކުރައްވައި، އެ އައި ބައެއްގެ މުހުތާދުތައް ފިއްލަވައި ދެއްވަމުން އެމަނިކުފާނު ގެންދެވީ." ނިހާން ވިދާޅުވި އެވެ. 

ނިހާން އާއި ގާސިމް

ނިހާން ވިދާޅުވީ، އެކި ސިޔާސީ ފިކުރުތަކާއި އެކު ގާސިމް މަސައްކަތް ކުރެއްވީވެސް، އަދި ކުރިއަށް އޮތް ރިޔާސީ ރޭހަށް ވެސް އެމަނިކުފާނު ނިކުންނަވައި ހުންނެވި ހަމައެކަނި ބޭނުމަކީ ދިވެހިރައްޔިތުންނަށް މިއަދަށްވުރެ ފަހި މާދަމާއެއް ހޯދައިދެއްވުމުގެ ބޭނުމުގައި ކަމަށެވެ. 

ރިޔާސީ ކެންޕެއިނަށް ބޮޑުތިލަދުންމައްޗަށް ފެއްޓެވި މި ދަތުރުފުޅުގައި ޤާސިމް އެންމެ ފުރަތަަމަ ވަޑައިގެންނެވީ މަކުނުދޫ އަށެވެ. މިއަދު ހެނދުނު އެރަށަށް ވަޑައިގެންނެވުމަށް ފަހު ނޮޅިވަރަމް އަށް ވަޑައިގެންފައިވާއިރު، ދެން ވަޑައިގަންނަވާނީ ނޮޅިވަރަމްފަރު، ހަނިމާދޫ އަދި ކުޅުދުއްފުއްޓަށެވެ.