އެކި ސަބަބުތަކާއި ހުރެ، އެންމެ ކުރިން ގަސްތުކޮށްގެން ހުންނެވީ ރިޔާސީ އިންތިހާބުގައި ވާދަނުކުރަން ކަމަށް، ޖުމްހޫރީ ޕާޓީގެ ފަރާތުން ކުރިއަށް އޮތް ރިޔާސީ އިންތިހާބުގައި ވާދަކުރައްވާ އެ ޕާޓީގެ ލީޑަރ ގާސިމް އިބްރާހިމް ވިދާޅުވެއްޖެއެވެ.
ރިޔާސީ ކެންޕެއިނަށް ބޮޑު ތިލަދުންމައްޗަށް ކުރައްވަމުންދާ ދަތުރުފުޅުގައި އެ އަތޮޅު ނޮޅިވަރަމަށް ރައްޔިތުންނާއި ބައްދަލުކުރައްވާ ވާހަކަ ދައްކަވަމުން ގާސިމް ވިދާޅުވީ އެމަނިކުފާނު ކުރިން ނިންމަވައިގެން ހުންނެވީ މި އަހަރުގެ ރިޔާސީ އިންތިހާބުގައި ވާދަ ނުކުރައްވަން ކަމަށެވެ.
"އަޅުގަނޑު ހުރީކީ މިފަހަރު ކޮންމެހެން ރިޔާސީ އިންތިހާބުގައި ވާދަކުރާކަށް ނޫން. އެއީ ކީއްވެގެންތޯ؟ (އެއީ) އެތައް ސަބަބުތަކަކާ ހެދި. އެ ސަބަބު ތަކުގެ ތެރެއަށް ދާކަށް އަޅުގަނޑު ގަސްތެއް ނުކުރަން."
ގާސިމް އިބްރާހިމް
ގާސިމް ވިދާޅުވީ، އެންމެ ފަހުވަގުތުގައި ޖޭޕީން ރިޔާސީ ކެންޑިޑޭޓެއް ނެރެން ޖެހުނީ، އެޕާޓީގެ ކޮންގްރެސް ގައި 900 އަށްވުރެ ގިނަ މެންބަރުން އެ ނިންމުން ނިންމައި އެގޮތަށް ވޯޓު ދެއްވުމުން ކަމަށެވެ. އަދި ޕާޓީގެ ލީޑަރު ގެ ހައިސިއްޔަތުން އެ އެންމެހައި މެންބަރުން އެފަދައިން ނިންމުމުން އެ ނިންމުމާއި ދެކޮޅު ހެދެން ނެތް ކަމަށްވެސް ގާސިމް ވިދާޅުވި އެވެ.
ގާސިމް ވިދާޅުވީ ރިޔާސީ އިންތިހާބުގައި ކެންޑިޑޭޓަކަށް ވޯޓު ލާއިރު، އެމީހަކު ދިވެހި ގައުމަށާއި، ދިވެހި ރައްޔިތުންނަށް ކޮށްދީފައިވާ ޚިދުމަތްތަކަށް ބަލަން ޖެހޭ ކަމަށެވެ. އެގޮތުން އެމީހަކު ވެރިކަމުގައި ހުންނަވައިގެން ކޮށްދެއްވި ޚިދުމަތަކަށްވުރެ، އަމިއްލަ ހައިސިއްޔަތުން ކޮށްދީފައިވާ ޚިދުމަތްތަކަށް ބެލުން މުހިންމު ކަމަށް ގާސިމް ވިދާޅުވި އެވެ.
ގާސިމް ވިދާޅުވީ، ވެރިކަމުގައި ހުންނަވައިގެން، ވެރިމީހާ ކޮށްދޭ ޚިދުމަތަކީ އިޚްލާޞްތެރި ކަމެއް އޮވެގެން ކޮށްދޭ ޚިދުމަތެއް ނޫން ކަމަށާ، އެހެނެއް ކަމަކު އެއީ، ގާނޫނު އަސާސީގެ ދަށުން، ރައްޔިތުންގެ ފައިސާއިން ރައްޔިތުންނަށް ޚިދުމަތް ކޮށްދިނުމަށް އެމީހަކަށް މަތިކޮށްފައިވާ ޒިންމާގެ ދަށުން ކޮށްދޭ ޚިދުމަތް ކަަމަށެވެ.
އެހެންކަމުން، އެ މަގާމު ނުލިބެނީސް މީހަކު ކޮށްދީފައިވާ ޚިދުމަތައް ބަލައި ވޯޓު ދިނުމަކީ މުހިންމު ކަމެއް ކަމަށް ގާސިމް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
