ކަނޑުގެ ލޮނުގަނޑު އުފުލެމުންދާކަމަށް ސައިންސްވެރިންގެ ދިރާސާތަކުގެ ދައްކާތީ އެކަމުގެ ނުރައްކާ މާލެއަށް ބޮޑުވުމުގެ ސަބަބުން އެކަމުން ރައްކާތެރިވުމުގެ ގޮތުން އީކޯ ސިޓީގެ ނަމުގައި މާލެކައިރީގައި ސިޓީއެއް ގާއިމް ކުރުމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ވައުދުވެވަޑައިގެންފިއެވެ. 

މި އަހަރުގެ ރިޔާސީ އިންތިހާބަށް ގާސިމް އިބްރާހިމް އިއުލާނު ކުރެއްވަމުން ގެންދަވާ މެނިފެސްޓޯގެ ތެރެއިން ކަށަވަރު ބޯހިޔާވަހިކަމާއި ސްމާޓް ރާއްޖެއާއި، ދެމެހެއްޓެނިވި ތިމާވެއްޓާއި އިގްތިސާދީ ސިޔާސަތުގެ ދަށުން ތަރައްގީ ކުރާ މި އީކޯ ސިޓީއަކީ މާލެއާއި 9 ކިލޯމީޓަރު ދުރުގައި އޮންނަ ފުށިދިއްގަރު ފަޅު ހިއްކައިގެން ބިނާކުރާ ސިޓީއެކެވެ. 

1400 ހެކްޓަރުގެ މި ފާޅު ހިއްކަނި ދިޔަވަރު ބޮޑުވާއިރު ހުންނަ މިނަށްވުރެ މަރުވެގެން  2 މީޓަރު އުސްކޮށް، ރަށް ރައްކާތެރި ކުރުމަށްޓަކައި ވަށައިގެން ބްރޭކްވޯޓާ ގާއިމްކުރެވިގެންނެވެ. 

މީގެ އިތުރުން 5 އަހަރު ދުވަހުގެ ތެރޭގައި މި ސިޓީގައި ތަފާތު ފެންވަރުގެ 10،000 ރެސިޑެންޝަލް ޔުނިޓް ގާއިމް ކުރުމަށް ހަމަޖެހިފައިވާއިރު، މި ސިޓީ ގާއިމް ކުރެވިގެން ދާނީ ކުރިމަގުގައި 30,000ށް ވުރެ ގިނަ ހައުސިން ޔުނިޓް ގާއިމް ކުރެވޭނެ ގޮތަށް ގަމުގައި އެ މެނިފެސްޓޯގައި ވެއެވެ. 

އަދި މުސްތަގުބަލުގައި އެ ސިޓީގައި ޕާކުތަކާއި އަދި އެންޓަރޓައިނިންގް ސެންޓަރުތަކާއި ބިޒްނަސް ސެންޓަރުތަކުގެ އިތުރުން ޝޮޕިންގް މޯލް ތަކާއި ، ކޮންވެންޝަން ސެންޓަރުތަކާއި ސްޕޯޓްސް އެރީނާ ތަކާއި، ގެސްޓް ހައުސް ތަކާއިއެކު ރައްޔިތުންނަށް ބޭނުންވާނެ އެކި ފެންވަރުގެ ވަސީލަތްތައް ގާއިމް ކުރެވިގެން ދާނެ ކަމުގައި ޖޭޕީގެ އީކޯ ސިޓީ މެނިފެސްޓޯގައިވެއެވެ. 

ތިންވަނަ ފަހަތަރަށް ރިޔާސީ އިންތިހާބުގައި ވާދަކުރައްވަމުން ގެންދަވާ ގާސިމް އިބްރާހިމް އަންނީ ވެރިކަމަށް ވަޑައިގެން ކޮށްދެއްވުމަށް ގިނަ އަދަދެއްގެ ވައުދުތަކެއް ވެ ވަޑައިގަންނަވަމުންނެވެ. އަދި އަތޮޅު ތެރޭގެ ރަށްތަކަށް ވަޑައިގެން ރިޔާސީ އިންތިހާބުގެ ކެމްޕޭން ފޯރީގައި ކުރިއަށް ގެންދަވަމުންނެވެ.