މިހާރު ސަރުކާރުން ލޯނު ނަގަމުން މިދާ ރޭޓުން ލޯނު ނަގަމުންދާކަމުގައި ވާނަމަ ގައުމު ބަނގުރޫޓުވާނެ ކަމަށާއި ރާއްޖެއިން ލޯނު ނަގަނީ ނުދެއްކޭނެ މިންވަރަށް ކަމަށާއި އެކަން ލޯނު ދޫކުރާ ގައުމުތަކަށް ވެސް އެނގޭނެކަމުގައި ވިދާޅުވެ ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ކަންބޮޑުވުން ފާޅުކުރައްވައިފިއެވެ.

ރިޔާސީ އިންތިހާބުގެ ކެމްޕެއިންގައި ހދ ނޮޅިވަރަމަށް ވަޑައިގެން އެރަށުގެ ސަޕޯޓަރުންނާއި ބައްދަލުކުރައްވާ ގާސިމް ދެއްކެވި ވާހަކަފުޅުގައި، ސަރުކާރުގެ ދަރަނި މިހާރު 120 ބިލިޔަން ރުފިޔާއަށް އަރައިފިކަމުގައެވެ. އަދި އެއީ އަދި ސަރުކާރުގެ ދަރަނި އެކަނިކަމުގައި ވިދާޅުވެ ގާސިމް ވިދާޅުވީ ސަރުކާރުގެ ކުންފުނިތަކުގެ ދަރަނި ވެސް މިހާރު 1 ބިލިޔަން ޑޮލަރަށްވުރެ މަތިވާނެކަމުގައެވެ. މިކަމާމެދު ކަންބޮޑުވުން ފާޅުކުރައްވައިފި ގާސިމް ވިދާޅުވީ އެ ހުރިހާ ފައިސާއަކާއި ހަވާލުވާން ޖެހޭނީ ދިވެހި ރައްޔިތުންކަމަށެވެ.

ރިޔާސީ އިންތިހާބުގެ ކެމްޕެއިންގައި ގާސިމް އިބްރާހިމް އަތޮޅު ތެރޭގެ ރަށްތަކަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ގިނަ ވައުދުތަކެއް އަންނަނީ ވެ ވަޑައިގަންނަވަމުންނެވެ.

އަދި ސަރުކާރުގެ ސިޔާސަތުތަކަށް ފާޅުގައި ފާޑުވިދާޅުވެ ވަރަށް ގިނައިން ވާހަކަދައްކަވަމުންނެވެ.