މިއަހަރުގެ ސެޕްޓެމްބަރު މަހުގެ 9 ވަނަ ދުވަހު އޮންނަ ރިޔާސީ އިންތިހާބުގައި ނުބައި ކެންޑިޑޭޓަކަށް ވޯޓު ދެވިއްޖެނަމަ، އަދި ވެރިކަމަށް ގެނެވޭ މީހެއްގެ ގޮތުން ރާއްޖޭގެ މިނިވަންކަމާއި މެދު އެއްވެސް ޔަގީންކަމެއް ނެތްކަމުގައި، ޖުމްހޫރީ ޕާޓީގެ ރިޔާސީ ކެންޑިޑޭޓް ޑރ ޤާސިމް އިބްރާހިމް ވިދާޅުވެއްޖެއެވެ. 

އެމަނިކުފާނު މިފަދައިން ވިދާޅުވެފައިވަނީ ރިޔާސީ އިންތިހާބުގެ ކެމްޕެއިންގައި ރަނިންމޭޓާއި ކެމްޕެއިން ޓީމާއެކު އަތޮޅު ތެރޭގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ހދ ކުޅުދުއްފުށްޓަށް ވަޑައިގެން އެރަށުގެ ސަޕޯޓަރުންނާއި ބައްދަލުކުރައްވާ ރޭ ބޭއްވި ޖަލްސާގައި ވާހަކަ ދައްކަވަމުންނެވެ. 

ރޭގެ ޖަލްސާގައި ޤާސިމް ވަނީ ދިވެހިރާއްޖެ ސިފައިންނަށް ނުވާދެވޭ ތަންތަން ރާއްޖޭގައި ހުރިކަމަށް ގަބޫލުކުރަންތޯ ޖަލްސާގެ ބައިވެރިންނާއި މުހާތަބު ކުރައްވައި އައްސަވައިފައެވެ. 

Advertisement

މީގެ އިތުރުން ޤާސިމް ވިދާޅުވީ ޤައުމެއްގެ މަގުމަތީގައި ޚާއިނުން އެއްވެސް ފިކުރެއް ނެތި ހިނގާ ބިނގާވެ އުޅެންޏާ އެކަމުގެ ފަހަތުގައި ވަނީ ދެކަމެއް ކަމަށާއި އޭގެ އެއް ސަބަބަކީ އެގައުމެއްގެ ވެރިކަން ކުރަން ތިބި މީހުންނަކީ ކޮރަޕްޓްވެ ހަލާކުވެފައި ތިބި މީހުންނަށް ވުން ކަމަށާއި އަނެއް ސަބަބަކީ އެ ގައުމެއްގެ ރައްޔިތުންނަކީ ވިސްނަން ނޭނގޭ ގަބު ގަމާރު ބަޔަކަށް ވުން ކަމުގައި ވިދާޅުވެފައެވެ. 

މިވާހަކައާއި ވިދިގެން ޤާސިމް ވިދާޅުވީ، މި ގައުމުގެ ދިވެހިންނަކީ ގަބު ގަމާރު ބައެއްކަމަށް ދެކިނުލައްވާ ކަމަށާއި، ކަންކަމާއި މެދު ފިޔަވަޅު އެޅުއްވުމަށް ޤާސިމް ވަނީ ގޮވާލާފައެވެ. 

މިއަހަރުގެ ރިޔާސީ އިންތިހާބުގެ ކެމްޕެއިންގައި ރާއްޖޭގައި ބޭރުގެ ސިފައިން ތިބުމާ ދެކޮޅަށް ޤާސިމް އިބްރާހިމް އާއި އެމަނިކުފާނުގެ ޓީމުން އަންނަނީ ވަރަށް ބޮޑަށް ފާޑުވިދާޅުވަމުންނެވެ. 

އަދި ޤާސިމްގެ ވެރިކަމެއްގައި އުތުރު ތިލަފަޅުގެ އެއްބަސްވުން ހާމަކުރައްވާނެ ކަމަށާއި އެ އެއްބަސްވުމުގައި ރާއްޖޭގެ މިނިވަންކަމާއި އިސްތިގުލާލަށް އަސަރު ކުރާ އެއްވެސް ކަމެއް ވާނަމަ އެ އެއްބަސްވުން އުވާލައްވާނެ ކަމުގެ ޔަގީންކަން ގާސިމް އިބްރާހިމް ގެ އިންތިޚާބީ މަންދޫބު އަލީ ވަހީދުވެސް ވަނީ ދެއްވައިފައެވެ.