ރައްޔިތުންގެ މަޖިލީސް ޗުއްޓީގައި އޮތުމަށްފަހު، މިއަދު ބޭއްވުނު ފުރަތަމަ ޖަލްސާ ފަށައި އިރުކޮޅެއް ނުވަނީސް އެމްޑީޕީގެ ބައެއް މެންބަރުން އަޑު ގަދަ ކޮށް މަޖިލިސް ކުރިއަށް ގެންދިޔުމަށް ދަތިވާން ފެށުމުން، ކެލާ ދާއިރާގެ މެންބަރު އިބްރާހީމް ޝަރީފާއި، ތިނަދޫ އުތުރު ދާއިރާގެ މެންބަރު އަބްދުލް މުޣުނީއާއި ދާންދޫ ދާއިރާގެ މެންބަރު ޔައުގޫބު އަބްދުاللهގެ ނަން އިއްވައިފިއެވެ. 

މިހާރު ކުރިއަށްދާ ރައްޔިތުންގެ މަޖިލީހުގެ ތިންވަނަ ދައުރުގެ ފުރަތަަމަ ޖަލްސާގެ އެޖެންޑާގައި އޮތީ ކޮމިޓީތައް އެކުލަވާލުމުގެ މަސައްކަތް ކުރިއަށް ގެންދިޔުމެވެ. 

އެގޮތުން، މަޖިލިސް ފަށްޓަވަމުން ރިޔާސަތުގައި އިންނެވި، މަޖިލީހުގެ ރައީސް މުހައްމަދު ނަޝީދު ވަނީ އެކަން އަންގަވައި، މީގެ ކުރީން އެމްޑީޕީން ކެނޑުމުގެ ސަބަބުން މިނިވަން މެންބަރުންގެ ގޮތުގައި ތިއްބެވި ބައެއް މެންބަރުން ދަ ޑިމޮކްރެޓްސް އަށް ސޮއި ކުރައްވާފައިވާ ކަން ފާހަގަކުރައްވައި އެ މެންބަރުން މަޖިލީހުގައި ދަ ޑިމޮކްރެޓްސް ތަމްސީލު ކުރާކަން އަނގާފައިވާ ކަމަށް ވިދާޅުވެފައެވެ. އެގޮތުން ޑިމޮކްރެޓްސް އާއި ގުޅިވަޑައިގެންފައިވާ ކަމަށް މަޖިލީހަށް އަންގަވާފައިވަނީ ތިން މެންބަރުން ކަމަށް ނަޝީދު ވިދާޅުވި އެވެ. 

Advertisement

އެ މެންބަރުންނަކީ މެދު ހެންވޭރު ދާއިރާގެ މެންބަރު ޢަލީ އާޒިމް އާއި، މަޑަވެލި ދާއިރާގެ މެންބަރު ހުސެއިން ފިރުޝާންގެ އިތުރުން މާފަންނު އުތުރު ދާއިރާގެ މެމްބަރު އިމްތިޔާޒު ފަހްމީ ކަމަށް ނަޝީދު ވިދާޅުވި އެވެ. 

އެހެންކަމުން، ކޮމިޓީތައް އެކުލަވާލުމުގައި ދެން އެޕާގެ ނިސްބަތަށްވެސް ބަލާނެ ކަމަށާ، މަޖިލީހުގައި އެ ޕާޓީއަށް ނިސްބަތްވާ އެހެން މެންބަރުން ތިބި ނަމަ، އެ މެންބަރުންވެސް މަޖިލީހުގެ ދަފްތަރުގައި ޖެހުމަށް ނަޝީދު ވަނީ އެދިވަޑައިގެންފައެވެ. އެއަށްފަހު ކޮމިޓީ ތަކުގެ ނިސްބަތް ކަނޑައެޅިގެން ދާނެ ކަމަށް ނަޝީދު ވަނީ ވިދާޅުވެފަ އެވެ. 

އެއާއެކު އެމްޑީޕީ މެންބަރުން ވަނީ އަޑު ގަދަ ކުރައްވަން ފަށްޓަވާފައެވެ. 

އެގޮތުން އިބްރާޙީމް ޝަރީފާއި މުޣުނީ އާއި ޔައުގޫބު އަޑު ގަދަކޮށް މަޖިލީހުގެ ނިޒާމް ގެއްލުވާލަން މަސައްކަތް ކުރުމުން ނަޝީދު ވަނީ އެ ތިން މެންބަރުންގެ ނަން އިއްވައި މަޖިލީހުގެ ތަޅުމުން ނުކުމެ ވަޑައިގެންނެވުމަށް އަންގަވާފައެވެ.