ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް ވަޑައިގެންނެވީ ރައްޔިތުންނަށް އޮޅުވާލައިގެން ވާހަކަތައް ދައްކަވައިގެން ކަމަށް މި ސަރުކާރުގެ ކޯލިޝަން ބައިވެރިއެއް ކަމުގައިވާ، ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ވިދާޅުވެއްޖެއެވެ. 

ރިޔާސީ އިންތިހާބުގެ ކެމްޕެއިނަށް ނ އަތޮޅަށް ކުރައްވަމުންދާ ދަތުރުފުޅުގައި އެ އަތޮޅު ކުޑަފަރިއަށް ވަޑައިގެން ވާހަކަ ދައްކަވަމުން ގާސިމް ވަނީ އަދުގެ ސަރުކާރަށް ވަރަށް ބޮޑަށް ފާޑުވިދާޅުވެފައެވެ. 

އެގޮތުން، ވިދާޅުވީ މި ސަރުކާރުން ދައުލަތުގެ ވަސީލަތްތަކާއި މުވައްޒަފުންގެ ބޭނުން ނަހަމަގޮތުގައި، ކެންޕެއިނަށް ބޭނުން ކުރައްވަމުންދާ ކަމަށެވެ. ކެންޕެއިނުގައި ރަށްރަށުގައި ދަމާ ދިދަ ތަކާއި، ޖަލްސާތަކަށް ސަރުކާރު މުވައްޒަފުންނާއި، ސަރުކާރު ކުންފުނިތަކުގެ މުވައްޒަފުންވެސް ނެރެމުންދާ ކަން ފާހަގަކުރައްވައި ގާސިމް ވިދާޅުވީ އެފަދަ ކަންކަމަކީ ގާނޫނު އަސާސީ އާއި ޚިލާފް ކަމެއް ކަމަށެވެ. އަދި އެކަންކަމާއި ރުހިގެން ނުހުންނެވޭނެ ކަމަށްވެސް ވިދާޅުވި އެވެ. 

Advertisement

މިއާއެކު ގާސިމް ވިދާޅުވީ މި ސަރުކާރުން ވެރިކަމަށް އައުމަށްޓަކައި ގިނަ ވައުދުތަކެއް ރައްޔިތުންނަށް ވެފައިވާ ކަމަށާ، އެކަންކަން ކުރެއްވީ އޭނާވެސް ހިމެނިވަޑައިގަންނަވާ ކޯލިޝަން އާއި އެކީގައި ކަމަށެވެ. އެހެންނަމަވެސް، އެ ވައުދުތަކަކީ ދޮގާއި އޮޅުވާލުން ކަން ފާހަގަކުރައްވައި ގާސިމް ވިދާޅުވީ، ސަރުކާރާއި ދުރަށް ދާން ޖެހުނީވެސް ކަންކަން ގޯހުން ގޯހަށް ދިޔުމުން ކަމަށެވެ. 

މީގެ އިތުރުން ވެސް ގާސިމް ވަނީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކެންޕެއިން ކުރައްވަމުންދަނީ އެހެން ގައުމެއްގެ އެހީތެރިކަމާއި އެކު، "ދައުލަތް ނޮޅާލައިގެން" އަދި "ދަވާލައިގެން" ކަމަށް ވިދާޅުވެ ވަރަށް ބޮޑަށް ފާޑުވިދާޅުވެފައެވެ.