ރައްޔިތުންނަށް އަމާން އޮމާން މުސްތަގުބަލެއް ގެނެސްދިނުމަށް ފުރާނަ ދުއްވާލަންވެސް ތައްޔާރަށް ހުންނެވި ކަމަށް ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް ވިދާޅުވެއްޖެއެވެ.
ނ. ހޮޅުދޫގައި އިއްޔެ ބޭއްވި ކެމްޕެއިން ޖަލްސާގައި ވާހަކަފުޅު ދައްކަވަމުން ގާސިމް ވިދާޅުވީ، މިފަހަރު ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ ތެރެއިން، އެބޭފުޅެއްގެ މާޒީގައި ދިވެހި ގައުމަށާއި ދިވެހި ދައުލަތަށް އެންމެ ވަފާތެރި އަދި އިޚްލާޞްތެރި މަސައްކަތްތަކެއް ކޮށްދެވިފައިވަނީ ކާކުތޯ ބަލައިފި ނަމަ އެ ބޭފުޅަކަށް ވާނީ އެމަނިކުފާނު ކަމާއިމެދު ޝައްކު ނުކުރައްވާ ކަމަށެވެ. އެހެން ކަމުން ކުރިއަށް އޮތް ރިޔާސީ އިންތިހާބުގައި ރައްޔިތުން ވަރަށް ބޮޑު ތަފާތަކުން، އެއްބުރުން އެމަނިކުފާނު ވެރިކަމަށް އިންތިޚާބު ކުރައްވާނެ ކަމަށްވެސް ވިދާޅުވި އެވެ.
ގާސިމް ވިދާޅުވީ އެމަނިކުފާނަކީ، ފެށުނީއްސުރެ ވެސް އިސްލާހަށް މަސައްކަތް ކުރެއްވި ބޭފުޅެއް ކަމަށެވެ. އެގޮތުން ދިވެހި ގައުމިއްޔަތާއި އިސްލާމްދީން ދިވެހި ފަސްގަނޑުގައި ދެމެހެއްޓުމާއި، ގައުމުގެ މިނިވަންކަމާ، ގައުމު ދަރާފައިވާ ދަރަނިން މިންޖުކުރުމާ އިގްތިޞާދު ނެގެހެއްޓުމަށް އިސްލާހީ މަސައްކަތް ތައް ކުރިންވެސް މިހާރުވެސް ކުރައްވަމުން އަންނަ ކަމަށް ވިދާޅުވި އެވެ.
މިއާއެކު މި ސަރުކާރުން ކަންކަން ކުރައްވަމުންދާ ގޮތަށް ފާޑުވިދާޅުވެ ވާހަކަ ދައްކަވަމުން ގާސިމް ވިދާޅުވީ ސަރުކާރުން ފާޅުގައި އިސްލާމީ އަސްލާއި އުސޫލުތައް ތަންފީޒު ކުރުމާއި ދެކޮޅަށް މަސައްކަތްކުރަމުންދާ ކަމަށާ, 2018 ވަނަ އަހަރު ވެރިކަމަށް އަންނަން ވެގެން ހެދި ކޯލިޝަން އެއްބަސްވުމާއިވެސް ތަކުރާރުކޮށް ހިލާފުވެފައިވާކަމަށެވެ.
މީގެ އިތުރުން ފަހަރަކު ކަމަކުން ކަމެއް ހުށައަޅައި އެންމެ ފަހުން ރައްޔިތުން އެދޭ ކަންކަން ކޮށްދެވޭނީ ދެވަނަ ދައުރެއް ދިނުމުން ކަމަށް ބުނުމުން އެއީ ބްލެކްމެއިލް ކުރުން ކަމުގައި ނުވޭތޯ އެމަނިކުފާނުވަނީ ސުވާލު އުފައްދަވާފައެވެ.
އަދި އަދުގެ ސަރުކާރުން ކަންކަން ކުރަމުން އެ އަންނަ ގޮތާއި ޚިލާފަށް، އެމަނިކުފާނު މިހާތަނަށްވެސް އަދި ކުރިއަށްއޮތްތަނުގައި ކަންކަން ކުރައްވާނީ ރައްޔިތުންގެ ހައްގުގައި ގައުމު އިސްލާހު ކުރުމަށް ކަމަށް ވަނީ ވިދާޅުވެފަ އެވެ.
"އަޅުގަނޑު ކުރިމަތިލީ މިދެންނެވި ކަންތައްތަކުގެ އިސްލާހީ ބަދަލު ގެނެސްދޭން. 1984 ވަނަ އަހަރުންސުރެ ކުރި މަސައްކަތް ގެއްލި ހަލާކުވެ ރައްޔިތުން އަގުރު އަލިފާނަށް ވެއްޓޭތީ އެތަން ފެންނާތީ އެކަމުން ސަލާމަތްކޮށްދޭން. ރައްޔިތުންނަށް އަމާން އޮމާން މުސްތަގުބަލެއް ގެނެސްދޭން ފުރާނަ ދުއްވާލަންވެސް މިހުރީ ތައްޔާރަށް. ފަހަތަކަށް ނުޖެއްސޭނެ. "
ޖޭޕީގެ ރިޔާސީ ކެންޑިޑޭޓް ގާސިމް އިބްރާހިމް
ގާސިމް ވިދާޅުވީ މިއަދު ރައްޔިތުން އެދޭ ކަންތައްތައް ކޮށްދެވޭނެ ތައުލީމާއި ތަޖުރިބާ އާއި ހިތްވަރު އެމަނިކުފާނުގެ ހުންނެވި ކަމަށާ، އިސްލާމްދީނުގެ މަތީގައި ފައިތިލަ ސާބިތުކޮށްގެން މިނިވަންކަމާއިއެކު އުޅޭ ދިވެހި ރައްޔިތުން އަބަދުވެސް މި ގައުމުން ފެނުމަށް އެދިލައްވާ ކަަމަށެވެ.
Advertisement
This content is created and paid for by advertisers and does not involve Voice Journalists
