މިއަހަރުގެ ރިޔާސީ އިންތިހާބު ދެވަނަ ބުރަކަށް ގޮސް، އެ ބުރުގައި ޖުމްހޫރީ ޕާޓީގެ ރިޔާސީ ކެންޑިޑޭޓް ވާދަ ނުކުރާނަމަ، ދެވަނަ ބުރުގައި ވާދަކުރާ އެހެން ކެންޑިޑޭޓެއް ވެރިކަމަށް ގެނައުމަށް އެ ޕާޓީން މަސައްކަތް ނުކުރާނެ ކަމަށް، ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމްގެ ސްޕެޝަލް އެޑްވައިޒަރ ޢަލީ ވަހީދު ވިދާޅުވެއްޖެއެވެ. 

މިއަދު އދ. ހަންޏާމީދޫ ގައި ބޭއްވި ކެމްޕޭން ޖަލްސާގައި ވާހަކަދައްކަވަމުން އަލީ ވަހީދު ވިދާޅުވީ، އަދުގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރަކީ ޖުމްހޫރީ ޕާޓީން ވަރަށް މަސައްކަތް ކޮށްގެން ގެނައި ސަރުކާރެއް ކަމަށެވެ. އެހެންނަމަވެސް، މިސަރުކާރުން ރާއްޖޭގެ ރައްޔިތުންނަށް ޚިޔާނާތްތެރި ވެފައިވާ ކަމަށާ، އެފަދަ ކަންކަމާއި ގާސިމް ސުވާލު އުފެއްދެވުމުންވެސް އެމަނިކުފާނަށް ސަރުކާރުން މަލާމާތް ކުރަމުންދާ ކަމަށް އަލީ ވަހީދު ވިދާޅުވި އެވެ. 

ޢަލީ ވަހީދު ވިދާޅުވީ، އެފަދައިން މަލާމާތްކޮށް ހަޖޫ ޖަހައިގެން ސަރުކާރަށް ވާނެ އެއްވެސް ފައިދާއެއް ނޯންނާނެ ކަމަށެވެ. 

މިއާއެކު ޢަލީ ވަހީދު ވިދާޅުވީ، މި އިންތިހާބުގެ ފުރަތަމަ ބުރުން ނާކާމިޔާބީ ލިބިއްޖެ ނަމަ ދެވަނަ ބުރުގައި އެހެން ކެންޑިޑޭޓެއްގެ ފަހަތަށް އެރުމުގެ ބަދަލުގައި މަސައްކަތް ކުރާނީ މަޖިލީހަށް ޖޭޕީގެ މެންބަރުން އިތުރު ކުރުމަށް ކަމަށެވެ. 

"ރިޔާސީ އިންތިހާބުގެ ދެވަނަ ބުރެއް، ތިންވަނަ ބުރެއްގެ ވާހަކަ އަޅުގަނޑުމެން ނުދައްކާނަން. މިއަދު މަތިންދާ ބޯޓުން އަޅުގަނޑުމެން އައި އިރު, ޢަލީ ހުސެއިން އާއި އަޅުގަނޑު ވާހަކަ ދައްކަމުން ދިޔައިރު، އަޅުގަނޑު ދެންނެވިން، ރިޔާސީ އިންތިހާބުގެ ފުރަތަމަ ބުރުގެ ނަތީޖާއަށްފަހު އަޅުގަނޑުމެން މަސައްކަތް ކުރާނީ ދެވަނަ ބުރަކަށް ނޫނޭ. އަޅުގަނޑުމެން ދެން މަސައްކަތް ކުރާނީ ރާއްޖޭގެ ރައްޔިތުންގެ މަޖިލީހަށް، ގާސިމް އިބްރާހިމް އަށް ތާއީދު ކުރާ، ދިވެހި މިނިވަންކަމަށް ތާއީދު ކުރާ މެންބަރުން ގިނައިން ވައްދާށޭ." ޢަލީ ވަހީދު ވިދާޅުވިއެވެ. 

އެހެން ކަމުން، އަރިއަތޮޅުގެ ކޮންމެ ރައްޔިތެއްގެ ވޯޓު ފަސް ވޯޓަށް ހައްދަވައިގެން، އެހެން އަތޮޅު ތަކުގައި ތިބި ރަހުމަތްތެރިންގެ އަރިހުން ދަންނަވައިގެންވެސް ގާސިމް އިބްރާހިމް ވެރިކަމަށް ގެނައުމަށް ޢަލީ ވަހީދު ވަނީ އެދިވަޑައިގެންފައެވެެ.