ފެށުނީއްސުރެ އިންޑިއާގެ ނުފޫޒުން ރާއްޖެ މިނިވަންކުރަން އަޑުއުފުލަމުން އައިސްފައިވާ ޕާޓީތަކަކީ ޕީޕީއެމް/ޕީއެންސީ ކަމަށާ، އެހެން ކަމުން 2023 ގެ ރިޔާސީ އިންތިހާބުގައި އެ ކޯލިޝަންގެ ރިޔާސީ ކެނޑިޑޭޓު ޑރ.މުހައްމަދު މުއިއްޒު ތާއިދުކުރުމަށް ނިންމާފައިވާ ކަމަށް ދަ ކޮމަނާރސް ޖަމިއްޔާއިން ބުނެފިއެވެ. 

ދަ ކޮމަނާސް އިން ނެރުނު ބަޔާނެއްގައި ބުނީ، އާންމުންނާއި ގުޅުން ހުރި ކަންތައްތައް، ހާއްސަކޮށް ބޯހިޔާވަހިކަމާއި ގުލޭ ސިޔާސަތުތަކާއި ބެހޭ ގޮތުން ޖަމިއްޔާގެ މެންބަރުންގެ ފަރާތުން ގިނަ ކެނޑިޑޭޓުންނާއި ވާހަކަ ދަައްކާ މަޝްވަރާ ކޮށްފައިވާ ކަމަށެވެ.

"ރާއްޖޭގައި ޒަމާނުއްސުރެ އޮތް ބަންޑާރަ ބިން ހިލޭ ބެހުމުގެ ސަގާފަތަކީ ހުރިހާ ރަށެއްގައިވެސް ކުރުން ހުއްޓާލަން ޖެހޭ ބޯދާ، އަދި އޭގެ ފައިދާއަށް ވުރެ ގެއްލުން ބޮޑު ސިޔާސަތެއް ކަން އެއީ ފުރަތަމަ ދުވަހުން ފެށިގެން އަޅުގަނޑުމެން ގަބޫލު ކުރާ އަދި ވަކާލާތު ކުރަމުންދާ ސިޔާސަތެކެވެ." ދަ ކޮމަނާސް އިން ބުނެފައިވެއެވެ. 

Advertisement

އަދި މީގެ އިތުރުންވެސް ބޯހިޔާވަހިކަމުގެ ދާއިރާއަށް ގެންނަން ޖެހޭ އަދި ތައާރަފު ކުރަން ޖެހޭ ވަރަށް ގިނަ އެހެން ސިޔާސަތުވެސް ސިޔާސީ ޕާޓީތަކާއި ކަމާއި ބެހޭ ފަރާތްތަކާއި މަޝްވަރާ ކުރަމުންދާ ކަަމަށް އެ ޖަމިއްޔާއިން ބުނެއެވެ. 

މީގެ އިތުރުން އެ ޖަމިއްޔާ އިން ބުނީ، ގޯތި ބެހުމުގެ ސިޔާސަތު ނުވަތަ ސަގާފަތް ހުއްޓާލަން ވައުދުވާ ސިޔާސީ ކެނޑިޑޭޓެއް ނެތެމް ކަމުން އެކަމާއި ގުޅިގެން އާންމުންގެ ޖަމިއްޔާގެ ބޯޑު، އެޑްވައިސަރީ ބޯޑު އަދި ކޮންގްރެސްގައި މަޝްވަރާކޮށް ވޯޓު ނެގިފައިވާ ކަމަށެވެ. 

އަދި ކުރެވުނު މަޝްވަރާތަކަށް ފަހު ނެގުނު ވޯޓުގެ ތާއިދާއިއެކު އާންމުންގެ ޖަމިއްޔާއިން ފާސްކުރެވުނީ ބޯހިޔާވަހިކަމުގެ ސިޔާސަތު ތަކުގައި އެއްބަސް ނުވެވޭ ބައެއް ނުކުތާތައް ހުރިކަމުގައިވިޔަސް ގައުމީ މަސްލަހަތު އިސްކުރުމަށް ކަމަށް ވެސް އެ ޖަމިއްޔާ އިން ބުނެފައިވެއެވެ. 

ދަ ކޮމަނާސް އިން ގައުމުގެ މިނިވަންކަމާއި ބާރު މިހާރު މިފެންނަ ގޮތަށް ބޭރުގެ ވަކި ބައެެއްގެ އަތްމައްޗަށް ގޮސްފިނަމަ  ބޯހިޔާވަހިކަން އަދި އިޖްތިމާއި އެހެން އެއްވެސް މައްސަލައެއްވެސް ދިވެހި ސަރުކާރަށް ހައްލު ނުކުރެވޭނެ ކަމަށެވެ.

ދަ ކޮމަނާސް އިން އިތުރަށް ބުނީ، އެކިއެކި ގައުމުތަކުގެ، އެކިއެކި ބައްރު ތަކުގެ މާލީ ވުޒާރާ ތަކާއި ބޭންކް ފަދަ ތަންތަނާއި ވާހަކަ ދައްކާ މަޝްވަރާ ކުރުމުގެ މިނިވަންކަން ނެތްނަމަ، ބޯހިޔާވަހިކަން ހައްލު ކުރުމަށް އަޅަންޖެހޭ އިޖްތިމާއި ބޯހިޔާވަހިކަން ފޯރު ކޮށްދިނުނުގައި އެންމެ ފަސޭހަ، އެންމެ އަވަސް އަދި އަގު އެންމެ ކުޑަ ގޮތް ސަރުކާރަކަށް ހޯދާ ނުދެވޭނެ ކަމަށާ، ގައުމުގެ މިނިވަން ކަމާއި އިސްތިގުލާލު ބައެއްގެ މުށުތެރެއަށް މިހާރު އޮތްގޮތަށް ގޮސްފައި އޮންނަހާ ހިނދަކު ބޯހިޔާވަހިކަމުގެ ދާއިރާގަައި އެ ޖަމިއްޔާ އިން ގެންނަން ބޭނުންވާ ސިޔާސަތުތައްް ތަންފީޒު ކުރެވޭނެ އެއްވެސް ގޮތެއް ނޯންނާނެ ކަމަށެވެ. އަދި ގައުމެއް ނެތީއްޔާމު ބޯހިޔާވަހިކަމެއް ނޯންނާނެ ކަމަށްވެސް ބުނެފައިވެއެވެ. 

ދަ ކޮމަނާސް އަކީ ގެދޮރުގެ މައްސަލައިގައި އަޑު އުފުލުމުގައި އެންމެ ހަރަކާތްތެރި އެއްޖަމިއްޔާ އެވެ. އެޖަމިއްޔާ މަޝްހޫރުވެފައި ވަނީ ކޮތަރުކޮށި ޖަމިއްޔާގެ ނަމުންނެވެ. ޖަމިއްޔާގެ މެންބަރުންގެ އަދަދު ހަހާހަށްވުރެ ގިނައެވެ.