ރާއްޖޭގެ ބޭންކްތަކުން ކަސްޓަމަރުންނަށް ކުރިމަތިކުރުވާ ދަތިތައް ނައްތާލައި، ފައިސާ ޖަމާކުރުމާއި ނެގުމުގައި ހުންނަ ލިމިޓްތައް، ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް ގެ ވެރިކަމެއްގައި ނައްތާލައްވާނެ ކަމަށް ވިދާޅުވެއްޖެ އެވެ. 

ރިޔާސީ އިންތިހާބުގެ ކެމްޕެއިނަށް އދ. މަންދޫއަށް ވަޑައިގެން އެ ރަށު ރައްޔިތުންނާ ބައްދަލުކުރައްވާ ވާހަކަ ދައްކަވަމުން ގާސިމް ވަނީ އެމަނިކުފާނު ވިޔަފާރިވެރިންގެ ޖަމްއިއްޔާގެ ރައީސްކަމުން ފެށިގެން ރައްޔިތުންނަށް ހެޔޮބަދަލުތަކެއް ގެނެސްދެއްވުމަށް ކުރެއްވި މަސައްކަތުގައި ކުރިމަތިވި ދަތިއުނދަގޫ ހާލަތުތައް މަންދޫ ރައްޔިތުންނާއި ހިއްސާކުރައްވާފައެވެ.

މިއާއެކު ގާސިމް ވިދާޅުވީ އިސްލާހީ މަސައްކަތުން ގެނައި ބަދަލުތައް މިހާރުނެތި ދިއުމުގެ ބިރު ކުރިމަތިވެފައިވާ ކަމަށާއި ހައްގުތައް ކަށަވަރުކޮށް އިސްލާހީ ހެޔޮބަދަލުތަކަށް އަލުން މަސައްކަތް ފަށަންޖެހިފައިވާ ކަމަށެވެ. 

ގާސިމް އިތުރަށް ވިދާޅުވީ، މިފަހަކަށް އައިސް، ބޭސް ފަރުވާ އަށާއި, ކިޔަވަންވެސް ބޭރުގައުމަށް ދާ މީހުންނަށް ޑޮލަރު ލިބުމުގައި ބޮޑެތި ދަތިތަކާއި ކުރިމަތިވަމުންދާ ކަމަށެވެ. އެގޮތުން، ޑޮލަރު ލިބޭއިރު ވެސް ލިބެނީ އެކްސްޗޭންޖު ރޭޓަށްވުރެ ބޮޑު އަގުގައިކަން އެމަނިކުފާނު ފާހަގަކުރެއްވިއެވެ. 

ގާސިމް ވިދާޅުވީ ބޭންކްތަކުގެ ހިދްމަތް ހޯދުމުގައި މިއަދު ކުރިމަތިކޮށްފައިވާ ދަތިތައް އެމަނިކުފާނުގެ ވެރިކަމެއްގައި ނައްތާލާނެ ކަމަށާއި އެކިގޮތްގޮތުން ކުރިމަތިކޮށްފައިވާ ލިމިޓްތައް ނައްތާލާނެ ކަމަށެވެ. ވިޔަފާރިތަކާއި އަމިއްލަ ފަރާތްތަކުގައި އަމިއްލަ ފައިސާ ހިފަހައްޓާ ބޭންކުތަކުން ކުރިމަތިކުރުވާ ދަތިނައްތާލައި ހިދްމަތްތައް ފަސޭހަ ނިޒާމެއް ގާއިމްކުރާނެކަމަށް ގާއިމް ވިދާޅުވިއެވެ.

"އެމީހާގެ ފައިސާ އެމީހެއް ދޭން ބޭނުން މީހަކަށް ދެވޭނެ. ނަގަން ބޭނުން ވަރަކަށް ކޭޝްގެ ގޮތުގައި ނެގޭނެ. ޑިޕޮސިޓް ކުރަންޏާ ޑިޕޮސިޓް ކުރަންވީ. ނުކުރާންޏާ ނުކުރަންވީ. މީގެ ކޮބާތޯ މައްސަލަ އަކީ. މަނީލޯންޑްރިންގެ ގެ މައްސަލަ އޭ ކިޔައިގެން މީހުންނަށް އުނދަގޫ ކުރުމާއި ނޮހޮރުއްޕާން ކުރުން ނޫން އެހެން ކޮން ކަމެއްތޯ.؟" ގާސިމް ވިދާޅުވިއެވެ. 

ގާސިމް ވިދާޅުވީ އެމްއެމްއޭއިން ހަދާފައިވާ އެފަދަ، ރައްޔިތުންނަށް އުނދަގޫވާ ގަވާއިދުތައް އެމަނިކުފާނުގެ ވެރިކަމެއްގައި ނައްތާލައްވާނެ ކަމަށެވެ.