ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމްގެ ވެރިކަމެއްގައި އަންހެނުންނަށް ވިހެއުމާއި ގުޅިގެން ލިބޭ ޗުއްޓީ އެއް އަހަރު ދުވަހަށް ބަދަލު ކޮށްދެއްވާނެ ކަމަށް އެމަނިކުފާނުގެ ރަނިންމޭޓް ޑރ. އަމީން އިބްރާހިމް ވިދާޅުވެއްޖެ އެވެ.

ތ. ގުރައިދޫގައި ރޭ ބޭއްވި ކެމްޕެއިން ބައްދަލްވުމެއްގައި ވާހަކަފުޅު ދައްކަވަމުން އަމީން ވަނީ ގާސިމްގެ މެނިފެސްޓޯ ގައި، އަންހެނުންނަށް ހާއްސަކޮށްގެން ހިމަނާފައިވާ މުހިންމު ކަންކަމުގެ ތަފްސީލު ދެއްވާފަ އެވެ.

އެގޮތުން އަންހެނުންނަށް ހަމަހަމަ ފުުރުސަތު ފަހިކޮށް ދިނުމަށް ހާއްސަ މަސައްކަތްތަކެއް ކުރައްވާނެ ކަމަށާ، މަޖިލީހާއި ސިޔާސީ މައިދާނު ގައި އަންހެނުންގެ ނިސްބަތް ވަރަށް ބޮޑަށް އިތުރު ކުރައްވާނެ ކަމަށް ވިދާޅުވި އެވެ. 

ހަމައެހެންމެ، އަނިޔާ ލިބޭ އަންހެނުންނަށް އިންސާފު ހޯދާ ދިނުމަށް ހާއްސަ މަސައްކަތްތަކެއް ކުރައްވާނެ ކަމަށްވެސް އަމީން ވިދާޅުވި އެވެ.

މިއާއެކު އަމީން ފާހަގަކުރެއްވި އެންމެ މުހިންމު އެއް ކަމަކީ، ވިހެއުމާއި ގުޅިގެން މިހާރު ލިބޭ 6 މަހުގެ ޗުއްޓީ އެއް އަހަރު ދުވަހަށް ބަދަލު ކޮށްދެއްވައި، އެ އިތުުރުވާ ހަ މަހު ގޭގައި ހުރެގެން މަސައްކަތް ކުރެވޭނެ އިންތިޒާމު ހަމަޖައްސެވުމަށް މެނިފެސްޓޯ ގައި ހިމަނާފައިވާ ކަމެވެ.

މީގެ އިތުރުން އަމީން ވަނީ ގާސިމްގެ ވެރިކަމެއް ގައި އަލަށް އުފަންވާ ކޮންމެ ކުއްޖަކަށް 5،000 ގެ އިނާޔަތެއް ދެއްވާނެ ކަމަށްވެސް ވިދާޅުވެފައެވެ. 

އަދި ފަގީރުންނަށް ދޭ އެލަވަންސްއެއް ތައާރަފު ކޮށް، އުމުރުން ދުވަސްވީ މީހުންނަށް ދޭ އިނާޔަތް 7،000 ރުފިޔާއަށް އިތުރު ކުރައްވާނެ ކަމަށް އަމީން ވަނީ ވިދާޅުވެފަ އެވެ.