މައުލޫމާތު ސާފުކުރުމަށް ކަމަށް ބުނެ ފުލުހުންގެ ބެލުމުގެ ދަށަށް ގެންދެވުނު، ހިންދޫ ގުރޫ ފުރުވާލައިފި އެވެ. 

ހިންދޫ ދީނުގެ 'ގުރޫ'އެއް އިންތިޒާމް ކޮށްގެން ބާއްވާ ދީނީ ހަރަކާތެއް މާލޭގެ ހޮޓަލެއްގައި ބާއްވަން ނިންމައި އެކަން އިއުލާން ކޮށްފައިވާ ޕޯސްޓަރެއް އިއްޔެ ސޯޝަލްމީޑިއާގައި ވަނީ ދައުރުވެފައެވެ. 

މީސްމީޑިއާގައި ދައުރުވަމުންދާ އެ ޕޯސްޓަރުން އެނގޭ ގޮތުން މި ކުލާސްތަކެއް ބޭއްވުމަށް ހަމަޖެހިފައިވަނީ އިއްޔެ އައި މިއަދު އެވެ. 

Advertisement

އަދި އޮފްލައިންކޮށް ގެންދާ މި ކްލާސްތަކުގައި ކިޔަވާދޭނެ ކަމަށް ބުނެފައިވަނީ ހިންދޫ ދީނުގެ ބޮޑު ފާދިރީއެއް ކަމުގައިވާ ގަނޭޝް ޑުބޭ ނަމަކަށް ކިޔާ ގުރޫއެއް ކަމަށް އޭގައި ބުނެފައިވެއެވެ. އަދި މިކަމެއް ކުރިއަށް ދާނީ އުނިމާ ގުރޭންޑުގައި ކަމަށްވެސް އެ ޕޯސްޓުގައި ބުނެފައިވެއެވެ.

މީގެ އިތުރުން އެ ޕޯސްޓުގައި ބުނެފައިވާ ގޮތުން މި ކުލާސްތަކުގައި "ވަރުގަދަ ދަރުސްތަކާއެކު މައްސަލަތަކަށް" ހައްލުތައް ލިބިގެންދާނެ އެވެ. 

މިކަމާއި ގުޅިގެން އާއްމުންގެ ނުރުހުން ސަރުކާރަށް އަމާޒުވުމާއިއެކު، އެ މައްސަލަ ބަލައިދޭން ފުލުހުންގެ އަރިހުން އެދިފައިވާ ކަމަށް އިސްލާމިކް މިނިސްޓަރު ވަނީ އިއްޔެ ބުނެފައެވެ.

އެ މައްސަލާގައި ފުލުހުން އިއްޔެ ބުނީ، ޓޫރިސްޓު ވިސާގައި ރާއްޖެ އައިސް ހުރި އިންޑިއާ މީހަކު، ދިމާވާ ގޮންޖެހުންތަކަށް ރޫހާނީ ހައްލު ހޯދައިދޭން ދަސްކޮށްދޭ ކްލާސްތަކެއް ހިންގާ ކަމަށް ބުނެ މީސް މީޑިއާގައި ޕޯސްޓް ކޮށްފައިވާކަން ފުލުހުންގެ ސަމާލުކަމަށް އައުމާއި ގުޅިގެން، އޭނާ އާއި އެކަމުގައި ބައިވެރިވާ ކަމަށް ބެލެވޭ އިތުރު މީހަކު ފުލުހުންގެ ބެލުމުގެ ދަށަށް ގެނެވި އެކަމާ ގުޅޭ މައުލޫމާތު ސާފް ކުރުމުގެ މަސައްކަތް ކުރަމުންދާ ކަަމަށެވެ.

"އަދި މި މައްސައަލީ ރާއްޖޭގެ ދީނީ އެއްބައިވަންތައް ކަން ހިމާޔަތް ކުރުމާއި ބެހޭ ގާނޫނާއި އިމިގްރޭޝަންގެ ގާނޫނީ ހިލާފު ކަމަކަށްވާތީ ކަމާއި ގުޅޭ އިދާރާތަކައި ގުޅިގެން އަޅަން ޖެހޭ ފިޔަވަޅުތައް ފުލުހުން އަޅާނެ ވާހަކަ ދަންނަވަން." ފުލުހުން ވިދާޅުވިއެވެ.

މިއާއެކު ނޫސްވެރިން ވަނީ އެމީހާ އާއި އެކަމުގައި ބައިވެރިވި މީހުން ހައްޔަރު ކުރިތޯ އިއްޔެ ސުވާލު ކޮށްފައެވެ. އެހެންނަމަވެސް، މިއަދާއި ހަމައަށް ވެސް އެއަށް ފުލުހުން ޖަވާބު ދީފައި ނުވާއިރު، އެ މީހާ ފުރުވާލިކަން ހާމަވުމުން، އެކަމާއި ގުޅޭ ސުވާލު ކުރުމުން ފުލުހުން ބުނީ، ބަލަންޖެހޭ ކަންކަން ބެލުމަށްފަހު، އޭނާ އާއި މެދު ފިޔަވަޅު އެޅުމަށް އިމިގްރޭޝަން އާއި ހަވާލު ކޮށްފައިވާ ކަމަށެވެ.