ޖުމްހޫރީ ޕާޓީގެ ވެރިކަމެއްގައި ކުދި އަދި މެދުފަންތީގެ ވިޔަފާރިތަކަށް ދޫކޮށްފައި ހުރި ލޯނުތަކާއި ފްލެޓްތަކުގެ ކުލި މާފުކޮށްދޭން ވެވަޑައިގެންނެވި ވައުދު ފުއްދަވާނެ ގޮތް އެ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމް ހާމަކުރައްވައިފިއެވެ. 

ގާސިމް ގެ ވެރިކަމެއްގައި ސަރުކާރުތަކުން ދޫކޮށްފައިވާ ހުރިހާ ފްލެޓުތަކެއްގެ ކުލި މައާފުކޮށްދެއްވައި، އެސްއެމްއީ ލޯނުތައް މައާފްކޮށްދެއްވާނެ ކަމަށް އެމަނިކުފާނު ވަނީ ވައުދުވެވަޑައިގެންފައެވެ. އެކަމާއި ގުޅިގެން ގިނަ ބަޔަކު އަންނަނީ އެއީ ކުރެވިދާނެ ކަމެއްތޯ ސުވާލު ކުރަމުންނެވެ.

އެފަރާތްތަކުގެ ސުވާލުތަކަށް ޖަވާބު ދެއްވަމުން ހުޅުމާލޭ ދެވަނަ ފިޔަވަހީގައި ޖުމްހޫރީ ޕާޓީގެ ޖަގަހަ ހުޅުވުމަށް ބޭއްވި ޖަލްސާގައި ވާހަކަފުޅު ދައްކަވަމުން ގާސިމް ވިދާޅުވީ، ވައުދުވެ ވަޑައިގަތީ އެކަން ކުރާނެ ގޮތް އެނގިވަޑައިގެން ކަމަށެވެ. 

Advertisement

"އަޅުގަނޑު މާފު ކުރާނެ ވާހަކަ ބުނީމާ އެންމެން ބުނީ ކިހިނެއްހޭ އެ ދައްކާނީ. އަޅުގަނޑު ބުނީކީ ނޫނޭ އިރާދަކުރެއްވިއްޔާ އެ މާފުކުރާނަމޭ." ގާސިމް ވިދާޅުވިއެވެ. 

މިއާއެކު ގާސިމް ވިދާޅުވީ ސަރުކާރުތަކުން ހިންގާ އެކިއެކި މަޝްރޫތައް މެދުވެރިކޮށް ކޮރަޕްޝަންގެ އަމަލުތައް ހިންގައި ރައްޔިތުންގެ ފައިސާއަށް ޚިޔާނާތްތެރި ވަމުންދާ ކަމަށެވެ. އަދި ލޯނުތަކާއި ކުލި މައާފްކޮށް ދޭނީ ސަރުކާރުތަކުން ކޮރަޕްޝަނަށް ހަރަދު ކުރާ ފައިސާ ރަނގަޅު ގޮތުގައި ބޭނުންކޮށްގެން ކަމަށްވެސް ވިދާޅުވި އެވެ. 

ގާސިމް އިތުރަށް ވިދާޅުވީ ކުރީގެ ސަރުކާރުން ދަރުމަވަންތަ ހޮސްޕިޓަލު އަޅަން ހަވާލުކުރީވެސް އަސްލު އަގަށްވުރެ 100 މިލިއަން ޑޮލަރު ބޮޑު ކޮށް ކަމަށެވެ. 

ގާސިމް އިބްރާހީމް ވިދާޅުވީ އެންމެ ފުރަތަމަ ދުވަހުން ފެށިގެން މިއަދާ ހަމައަށްވެސް އެމަނިކުފާނު މަސައްކަތް ކުރެއްވީ ދިވެހި ރައްޔިތުންގެ ހެވާ ލާބައަށް ކަމަށާއި، މިއަދުވެސް މަސައްކަތް ކުރައްވަމުން ގެންދަވަނީ ރައްޔިތުންގެ ހައްގުގައި ކަމަށެވެ.

އެހެންކަމުން އެމަނިކުފާނުގެ ވެރިކަމެއްގައި ރައްޔިތުންގެ ފައިސާއަށް ޚިޔާނާތްތެރިވާނެ ކުޑަވެސް ޖާގައެއް ނުދެއްވާނެ ކަމުގެ ޔަގީންކަން ގާސިމް ދެއްވިއެވެ.