ވެރިކަން ލިބިވަޑައިގެންފި ނަމަ ތަންފީޒުކުރައްވާނީ ކުރީގެ ކުރީގެ ރައީސް އިބްރާހިމް ނާސިރާއި، މައުމޫނު އަބްދުލްގައްޔޫމުގެ ވެރިކަމުގައި އެލުވަލާވާ ތަންފީޒު ކުރައްވަމުން ގެންދެވި ޚާރިޖީ ސިޔާސަތު ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓު އަދި އެ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެ އެވެ.
ޤާސިމް އިބްރާހިމް މިފަދައިން ވިދާޅުވެފައި ވަނީ ރިޔާސީ އިންތިޚާބުގައި ވާދަކުރައްވާ ހުރިހާ ކެންޑިޑޭޓުންނަށް ހުޅުވާަލައިގެން ކުރިއަށް ގެންދިޔަ ރިޔާސީ ބަހުސް "ސަންގު" ބަހުސްގައި، ވެރިކަން ލިބިވަޑައިގެންފި ނަމަ ޚާރިޖީ ސިޔާސަތު ބައްޓަންކުރައްވާނީ ކޮން ގޮތަކަށް ތޯ އައްސަވާ ކުރި ސުވާލަށް ޖަވާބުދެއްވަމުން ނެވެ.
އެ ސުވާލަށް ޖަވާބުދެއްވަމުން ޤާސިމް ވިދާޅުވީ ކުރީގެ ރައީސް އިބްރާހިމް ނާސިރާއި، މައުމޫނު އަބްދުލްގައްޔޫމުގެ ވެރިކަމުގައި ތަންފީޒު ކުރައްވަމުން ގެންދެވި ޚާރިޖީ ސިޔާސަތަކީ އެމަނިކުފާނަށް ވަރަށް ކަމުދާ އަދި ރާއްޖޭގެ ޚާރިޖީ ސިޔާސަތު އޮންނަން ޖެހޭނީ އެ ގޮތަށްކަމަށް ޤަބޫލުކުރެވޭ ސިޔާސަތެއް ކަމަށެވެ.
އެގޮތުން އެއްވެސް ގައުމަކާއި ދޭތެރޭ ރުޅިވެރިކަމެއް ނުވާއްވާ ހުރިހާ ގައުމަކަށްވެސް އިޚްތިރާމުކުރާނެ ޚާރިޖީ ސިޔާސަތެއް އޮތުމަކީ މުހިންމުކަމެއްކަން ޤާސިމް ފާހަގަކުރެއްވި އެވެ.
"އަޅުގަނޑުމެންގެ ހާރިޖީ ސިޔާސަތަކަށް ވާނީ މީގެކުރީގަ ވެރިކަން ކުރެއްވި ރައީސް އިބްރާހީމް ނާސިރާއި އަދި ރައީސް މައުމޫން ގެންގުޅުއްވި ހާރިޖީ ސިޔާސަތު. ވިލް އޮތީ އެމެންޑްކޮށްފަ. އިތުރު ވިލްއެއް ހަދާކަށް ނުޖެހޭ. އަޅުގަނޑަށް ވަރަށް ކަމުދޭ ރައީސް މައުމޫންގެ ހާރިޖީ ސިޔާސަތު ގެންގުޅުއްވި ގޮތް. ކޮންމެހެން އިތުރު ގައުމަކާއި ޖެހުމެއް ތަޅާފޮޅުމެއް އެއްވެސްކަމެއް ނެތް"
ޤާސިމް އިބްރާހިމް
އެއާއެކު އެމަނިކުފާނު ވިދާޅުވީ ޚާރިޖީ ސިޔާސަތު ބައްޓަންކޮށް ހުރިހާ ގައުމަކަށް އިޚްތިރާމު ކުރި ނަމަވެސް އެންމެ ފުރަތަމަ އިސްކުރައްވާނީ ގައުމާއި ރައްޔިތުން ކަމަށެވެ.
އަދި މަސައްކަތްޕުޅު ކުރައްވާނީ ދޭދޭ ގައުމުތަކާއި އޮންނަ ގުޅުންތައް ބަދަހިކޮށް އިޤްތިޞާދީ ގޮތުންނާއި އިޖުތިމާއީ ގޮތުން ދިވެހި ރައްޔިތުންނަށް ކުރިއެރުން ހޯއްދަވާދެއްވުމަށެވެ.
Advertisement
This content is created and paid for by advertisers and does not involve Voice Journalists
