ސަރުކާރުން ރައްޔިތުންގެ ޖީބުން ފައިސާ ނަގައިގެން ކުރާ ކަންކަމުގެ ވާހަކަ ކެންޕެއިން ތެރެއިން ދެއްކުމުން، އެއީ ކަލަ ގޮވުން ކަމުގައި ނުވާ ނަމަ، ޖުމްހޫރީޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ކޮށްދީފައިވާ ކަންކަމުގެ ވާހަކަ ދެއްކުމުން އެއީވެސް ކަލަ ގޮވުން ކަމުގައި ނުވާނެ ކަމަށް، އެމަނިކުފާނުގެ ރަނިންމޭޓް ޑރ. އަމީން އިބްރާހިމް ވިދާޅުވެއްޖެ އެވެ.
ރިޔާސީ ކެންޕެއިން ގެ ތެރެއިން، ގާސިމް ވަޑައިގަންނަވާ ރަށްރަށުގައި ވާހަކަދައްކަވަމުން، އެމަނިކުފާނު އެ ރަށްރަށަށާއ، އަދި އެހެންވެސް ރަށްތަކާއި، ވަކިވަކި ފަރުދުންނަށް ކޮށްދެއްވާފައިވާ ޚިދުމަތްތަކުގެ ވާހަކަ އެމަނިކުފާނާއި އެމަނިކުފާނުގެ ޓީމުން އަންނަނީ ދައްކަވަމުންނެވެ. އެކަމަށް ފާޑުވިދާޅުވާ މީހުން ބުނަމުން އަންނަނީ އެއީ ކަލަ ގޮވުން ކަމަށެވެ.
އެވާހަކަތަކަށް ރައްދުދެއްވަމުން، ރޭ އައްޑޫ ސިޓީގައި ޖުމްހޫރީ ޕާޓީން ބޭއްވި ކެމްޕެއިން ޖަލްސާގައި އަމީން ވިދާޅުވީ ސަރުކާރުން ކުރާ ކަންތައްތަކުގެ ވާހަކަ ދައްކާއިރު އެއީ ކަލަގޮވުމަކަށް ނުވާ ނަމަ، އަމިއްލަ މީހަކު ކަމެއް ކޮށްދީފައި އެކަމެއްގެ ވާހަކަ ދެއްކެވުން އެއީ އެއްވެސް ހާލެއްގައި ކަލަގޮވުމަކަށް ނުވާނެ ކަމަށެވެ.
އަދި ގާސިމް ކަންކަން ކޮށްދެއްވީ އެމަނިކުފާނުގެ އަމިއްލަ ޖީބުން ބޮޑު ޚަރަދުކޮށްގެން ކަމަށާ، އެގޮތުން އެތައް ހާސް ކުދިންނަށް ގާސިމް ކިޔަވައިދީފައިވާ ކަމަށް އަމީން ވަނީ ވިދާޅުވެފައެވެ.
އައްޑޫ ސިޓީ ކެންޕެއިން ޖަލްސާގެ ތެރެއިން--ފޮޓޯ/ ޖޭޕީ
"ދިވެހި ސަރުކާރުން، އަޅުގަނޑުމެންގެ އަމިއްލަ ޖީބުން، ޓެކްސް ނަގައިގެން، ޚަރަދު ކޮށްގެން ބަނދަރުތަކާ، ސުކޫލުތަކާ، މިތަންތަން ހަދާފައި މި ބުނަނީ، ސަރުކާރުން މިހާރު ރައްޔިތުންނަށް މިތަށް ސުކޫލެއް ހަދައި ދީފީމޭ، މިތަށް ބަނދަރު ހަދައިދީފީމޭ، ތިމަންނަމެން މިހާރު، މިވެނި ކަމެއް ކޮށްފީމޭ. މިކަން ނުވޭ ކަލަ ގޮވުމަކަށް. އެކަމަކު އޮނަރަބަލް ގާސިމް އިބްރާހިމް، އެމަނިކުފާނު އެތައް މަސައްކަތެއް ކުރައްވައިގެން، ލާރި އެއްކުރައްވައިގެން، ރާއްޖޭގެ އެތައް ކުދިންނަކަށް ކިޔަވައި ދެއްވައިފި، ރާއްޖޭގެ އެތައް މީހެއްގެ ހިތް ބަދަލު ކޮށްދެއްވައިފި. ރާއްޖޭގެ އެތައް އިމާރާތެއް އަޅުއްވައި ދެއްވައިފި. ބަނދަރުތައް އަޅުއްވައި ދެއްވައިފި. އެމަނިކުފާނު މި ވާހަކަ ދެއްކެވީމާ މިވަނީ ކަލަ ގޮވުމަށް. މިއީ ކޮން ކަހަލަ ބޭއިންސާފު ވާހަކައެއް." އަމީން ވިދާޅުވިއެވެ.
ރައްޔިތުންގެ ފައިސާއިން ސަރުކާރުން ކަމެއް ކޮށްގެން، އެކަމުގެ ވާހަކަ ދެންނެވީމާ އެއީ ކަލަ ގޮވުމަކަށް ނުވަންޏާ، އޮނަރަބަލް ގާސިމް އިބްރާހިމް އެމަނިކުފާނުގެ އަމިއްލަ ޖީބުން ޚަރަދު ކުރައްވައިގެން އެވާހަކަ ވިދާޅުވީމަ އެއްވެސް ހާލެއްގައި އެއީ ކަލަ ގޮވުމަކަށް ނުވާނެ.
އަމީން އިބްރާހިމް
އަމީން ވިދާޅުވީ ގާސިމް ކޮށްދެއްވި ކަންކަން އެންމެނަށްވެސް ހަނދާން ކޮށްދެއްވަން ޖެހޭ ކަމަށެވެ. ރައްޔިތުންގެ ތެރޭގައި، އިހްސާންތެރި، އޯގާތެރިން އެނގެނީ އެފަދައިން ހަނދާންކޮށްދިނީމާ ކަމަށްވެސް އަމީން ވިދާޅުވި އެވެ.
Advertisement
This content is created and paid for by advertisers and does not involve Voice Journalists
