ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް އަކީ، މިވީ 40 އަހަރު ތެރޭގައި އެމަނިކުފާނުގެ ވިޔަފާރި ތަކުން ލިބުނު ފައިދާގެ 60 އިންސައްތަ ނިކަމެތިންނަށްޓަކައި ހޭދަ ކުރެއްވި ބޭފުޅެއް ކަމަށާ، އެހެން ކަމަށް އެފަދަ ބޭފުޅެއް، ވެރިކަމަށް ވަޑައިގެން އެމަނިކުފާނު ފުރުއްވަން އޮންނާނީ ކޮން ޖީބެއްތޯ، ގާސިމްގެ އަނބިކަނބަލުން އަދި ޓްރާންސްޕޯޓް މިނިސްޓަރު ޢާއިޝަތު ނަހުލާ ސުވާލުކުރައްވައިފިއެވެ. 

ގާސިމް އަކީ އަމިއްލަ މަސައްކަތުން އާމްދަނީ އިތުރު ކުރުމަށް ގިނަ ދާއިރާ ތަކަކުން ވިޔަފާރިތައް ހިންގަވަމުން އަންނަ ބޭފުޅެކެވެ. އެ ގޮތުން އެކި ރިސޯޓު ތަކުގެ އިތުރުން ފުލައި މީ ގެ ނަމުގައި އެއާލައިންއެއްވެސް ހިންގަވާއިރު ގާސިމްގެ ވިލާ ކުންފުނީގެ ފަރާތުން އެކި ކާބޯތަކެއްޗާ، ގެދޮރު އިމާރާތް ކުރުމުގެ ސާމާނު ވިއްކުމުގެ ވިޔަފާރިފަދަ ވުޔަފާރިތައްވެސް އަންނަނީ ކުރަމުންނެވެ.

އެހެންކަމުން ރިޔާސީ އިންތިހާބުގައި ގާސިމް އިބްރާހީމް ވާދަކުރައްވަން ނިންމުމާއި އެކު އެކަމަށް ފާޑުކިޔާ މީހުން އެންމެ އަޑު ގަދަކޮށް ދައްކާ އެއް ވާހަކަ އަކީ އެމަނިކުފާނު ވެރިކަމަށް ވަޑައިގެންފިނަމަ އެމަނިކުފާނު ހިންގަމުންދާ އަމިއްލަ ވިޔަފާރިތައް ފުޅާކުރައްވާ އަމިއްލަ ޖީބު ބޮޑުކުރައްވާނެ ވާހަކައެވެ. 

'ހާސްކަނޑާލާ ހަމަޖެހޭނެ' މި ޝިޢާރުގެ ދަށުން ޖުމްހޫރީ ޕާޓީން ކުރިއަށްގެންދިޔަ ޕްރޮގްރާމެއްގައި ވާހަކަ ދައްކަވަމުން ނަހުލާ ވަނީ އެ ވާހަކަ ތަކަށް ރައްދު ދެއްވާފައެވެ. 

އެގޮތުން ނަހުލާ ވިދާޅުވީ، އެމަނިކުފާނުގެ ވިޔަފާރި ފެއްޓެވިތާ މިހާރު ގާތްގަނޑަކަށް 40 އަހަރު ވެގެން ގޮސްފައިވާއިރު، އެވީހާ ދުވަހެއްގައި، ވިޔަފާރި ތަކުން ލިބުނު ނަފާގެ ގާތްގަނޑަކަށް 60 އިންސައްތަ އެމަނިކުފާނު ހޭދަ ކުރެއްވީ ރާއްޖޭގެ ނިކަމެތިންނަށް ކަމަށެވެ. 

އެހެންކަމުން ދަރަނިވެރިވެފަ އޮތް ދައުލަތަކާ އެމަނިކުފާނު ހަވާލުވެފަ ފުރުއްވާނެ ނުވަތަ ބޮޑު ކުރައްވާނެ ޖީބެއް ނެތް ކަމަށް މިނިސްޓަރ ނަހުލާ ވިދާޅުވިއެވެ.

ނަހުލާ ބުނީ، ރައްޔިތުން ފުންކޮށް ވިސްނާލައިފި ނަމަ އެ ހަގީގަތް ވަރަށް ސާފުކޮށް އެނގޭނެ ކަމަށެވެ. 

އަދި ކުރިއަށް އޮތް ފަސް އަހަރުގައި، ގާސިމް ވެރިކަމަށް އިންތިޚާބު ވެވަޑައިގެންފި ނަމަ، އެމަނިކުފާނު ވަރަށް ބުރަކޮށް މަސައްކަތް ކުރައްވަން ޖެހޭނެ ކަމަށްވެސް ނަހުލާ ފާހަގަކުރެއްވި އެވެ.