ބ.ކެޔޮދޫގައި ވެލާތަކެއް ފެޅި ބައެއްގެ މައްޗަށް އެންވަޔަރަންމެންޓަލް ޕްރޮޓެކްޝަން އޭޖެންސީ (އީޕީއޭ)އިން ކުރި ޖޫރިމަނާ ކުޑަކޮށްފިއެވެ.

ބ. ކެޔޮދޫގައި ބަޔަކު ވެލާތަކެއް ފަޅައި އެތަކެތި ކައްކަމުން ދާކަމަށް ރިޕޯޓް ކުރީ ޢާންމު ފަރާތަކުންނެވެ. އެރިޕޯޓާއި ގުޅިގެން  ފުލުހުން އެރަށަށް އެރީ ޖަނަވަރީ މަހުގެ 23 ވަނަ ދުވަހުގެ ހަވީރުއެވެ.

އެ މައްސަލައިގައި ޖޫރިމަނާ ކުރީ އެކަމުގައި ބައިވެރިވި ބ. ކެންދޫ ހަ މީހަކާއި އދ. ދިގުރަށު މީހެކެވެ. އޭރު އީޕީއޭއިން ބުނެފައި ވަނީ، އެއިން ކޮންމެ މީހަކު ޖޫރިމަނާގެ ގޮތުގައި އެއްލައްކަ 98 ހާސް ރުފިޔާ ދައްކަން ޖެހޭ ކަމަށެވެ.

ނަމަވެސް މިނިސްޓްރީ އޮފް އެންވަޔަރަންމެންޓް، ކްލައިމެޓް ޗޭންޖް އެންޑް ޓެކްނޮލޮޖީއިން އެ މައްސަލަ ބަލައި، ޖޫރިމަނާ ކުޑަ ކުރުމަށް އީޕީއޭގެ ގަވަރނިންގް ބޯޑުން މިނިސްޓްރީއަށް ލަފާދީފައި ވާތީ، މިނިސްޓްރީއިން ވަނީ މިކަމުގައި އެޓަރނީ ޖެނެރަލްގެ އޮފީހުގެ ލަފާ ހޯދާފައި ކަމަށް އީޕީއޭއިން ބުނެއެވެ.

އެލަފާގެ ދަށުން އީޕީއޭއިން ނިންމާފައި ވަނީ، ވެލާ ފެޅި ހަ މީހުންގެ ތެރެއިން ކޮންމެ މީހަކުވެސް ޖޫރިމަނާ ކުރެވޭނީ 33 ހާސް ރުފިޔާއިން ކަމަށެވެ.

އީޕީއޭއިން އަންގާފައި ވަނީ އެ ފައިސާ މަދުވެގެން އެއްމަސް ދުވަސް ތެރޭގައި ދައްކާ ހަލާސް ކުރުމަށެވެ.

މީގެ އިތުރުން އީޕީއޭއިން ބުނީ، ތިމާވެށި ހިމާޔަތް ކުރުމުގެ ގާނޫނުގެ ދަށުން، ޤުދުރަތީ ގޮތުން ނުވަތަ ޠަބީއީ ގޮތުން ހިމާޔަތް ކޮށް ރައްކާތެރި ކުރާ ދިރޭ ތަކެއްޗާ ގުޅޭގޮތުން އަމަލު ކުރުމަށް އެކުލަވާލާފައިވާ ޤަވާއިދުތަކާއި އުސޫލުތަކާ އެއްގޮތަށް އަމަލު ކުރުމަށް އެ ހަ މީހުންނަށް ނަސޭހަތްތެރި ވެ އަދި މިފަދަ ކަމެއް ތަކުރާރު ނުކުރުމަށް އަންގާފައިވާ ކަމަށެވެ.